耶利米書 16章1節 到 16章13節   背景資料  上一筆  下一筆
Chit章thang清楚看tio̍h上帝忠實奴僕先知耶利米ê心境是án-ne孤獨,其實m̄-nā是先知耶利米án-ne,真chē先知lóng是án-ne。眾先知之所以感受tio̍h極大ê孤獨,乃是因為in所傳出ê信息lóng是kah當時社會hiah-ê人所想beh聽ê無仝款。特別是每pái眾先知嚴厲批判當時ê社會,尤其是領導者ê時,就會有chit種遭遇出現。Á真正先知一定會忠實tī上帝ê付託,kā上帝ê信息一五一十地宣揚出來(參考列王記上廿二:14)。只有假先知chiah會盡講當權者歡喜聽ê話,結果是加速了kui個社會ê墮落,並陷人民生活tī不安ê環境中。這mā是為甚麼真實ê上帝奴僕先知,會受tio̍h排擠而hō͘家己陷入孤獨ê環境中ê原因。Ná親像先知以利亞仝款,伊面對ê乃是群體ê、御用ê四百五十名先知,以伊單獨一個人ê氣力beh對抗chiah-ni̍h chē ê先知,koh加上御用先知ê背後是國王teh支持,這thang想像得出伊是jōa-ni̍h-á孤獨了。先知耶利米所講ê「人人lóng詛咒我」(參考耶利米書十五:10)chit句話,mā看出伊心內中hit種極大孤獨ê感受kah無奈。
Chit一章ê主要內容,是用先知耶利米被禁止結婚生兒育女來表明伊ê孤獨,甚至是連一般喜慶之宴mā tī被禁止之內,作者用chit種方式說明先知耶利米被隔離,以及心內孤獨ê情形。Mā用chit種方式teh表明:猶大國ê以色列人民,kā ná親像先知耶利米被隔離出來仝款,是孤獨、無助ê族群。

Chit段經文除了描述先知耶利米被上帝命令bē-tàng結婚,mā不ē-tàng為親朋好友tú-tio̍h ê悲傷ê事舉哀,同時,iáu ài伊tī國家kah同胞面臨極大ê苦難中,繼續真實地傳達上帝beh伊傳講ê信息。上帝就是beh先知耶利米用chit種方式來形容猶大國teh beh面臨ê處境,ná親像伊所tú-tio̍h ê情況仝款。

第1到3節,「tī án-ne ê所在」,表示國家已經面臨滅亡ê處境之環境中。Tī國家teh beh面臨滅亡ê時,上帝ài先知耶利米「bē-tàng結婚,mā bē-tàng生兒育女」,這真清楚teh表示先知耶利米已經無法度享受tio̍h家庭所帶來ê安慰kah支持,伊只有ē-tàng孤獨遞過一生之日。上帝是beh藉tio̍h伊獨身來說明猶大國ê猶大人民會「遭遇」ê災難。

第4節,chit節說明猶大ê災難包括有:「疫症死亡」ê,這是teh指瘟疫,m̄-koh lóng「無人好哀悼in,埋葬in」,這有兩種原因,一是死亡ê人數siuⁿ chē,差不多每一個家庭lóng有,無人有空去幫助別人(參考以西結書廿四:23)。最後只thang hō͘屍體「像肥料堆tī土腳」,「成做飛鳥行獸ê食物」。

第5到7節,mā thang參考以西結書第廿四章15到17節、22到23節等等。

為死去ê親人舉哀,這是非常基本ê生活倫理。以色列人民ê社會裡,若有人來報親友ê喪訊ê時,親人á是朋友會馬上kā家己身上ê衫褲拆裂,表示非常哀傷,然後kā粗麻製衫褲披在身上,無法度穿內衫,一定tio̍h thǹg掉腳上ê鞋á行路到喪家去。Mā tio̍h kā頭巾the̍h掉,披頭散髮,並tī頭殼頂灑灰,kah喪家同齊坐tī土腳哀傷。喪家無法度沐浴,mā不煮飯,lim食lóng由厝邊á是親友供應。Án-ne守齋時間是七工ê時間。上帝確實是決定「無koh賜平安」、「無用慈愛憐憫」對待猶大人民,這是表示上帝beh用chit種方式來表示kah in切斷關係。當國家面臨滅亡來臨ê時,已經無任何人thang例外,「無論貧富仝款」lóng會死亡,mā是仝款,bē有人哀悼,為in哀哭。因為差不多每一個家庭lóng有人死亡,因為án-ne,無辦法去「安慰」別人,mā bē有時間去為喪家準備食物kah in「同齊lim食」同齊哀傷。甚至嚴重到「連喪父á是喪母ê人mā無人表示同情」,chit句話tú好說明每一個家庭lóng有發生,大家lóng teh為家己ê親人哀傷啼哭。

第8到9節,既然無法度kah哀傷ê家庭同哀傷,相對ê,就算有喜慶ê婚宴,mā仝款lóng tio̍h禁止。因為這是上帝ê懲罰,hō͘「in有生之日會親身經歷chiah-ê事」。

第10到13節,chit段經文thang對照第九章12到16節。

上帝hō͘先知耶利米知影當伊傳上帝ê信息ê時,猶大人聽了後會反問伊上帝為甚麼會chiah-ni̍h「嚴厲懲罰」in?Mā會問到底in「犯甚麼罪」?Chit時chūn,先知耶利米一定tio̍h清楚指出tùi in ê祖先開始,就棄sak上帝,去「服事別ê神明」,「m̄聽從」上帝ê教示。Á in chit-ê代ê人比起in ê祖先是「koh khah 可惡」、koh khah「頑劣」,悖逆上帝ê行為koh khah嚴重。因為án-ne,上帝懲罰ê方式,就是hō͘ in被掠到ná「日瞑拜別ê神明」,而hit所在是in祖先mā m̄-bat去過,是一個生份ê地域。這表示上帝離in koh khah遠了,in kā得bē-tio̍h上帝ê「憐憫」。

重新查詢 專卷研經 耶利米書系列
錯誤回報,請聯繫