以賽亞書 59章9節 到 59章21節   背景資料  上一筆  下一筆
前段經文描述先知以賽亞明確指出以色列人民所犯ê罪過,而chit-má chit段經文則真類似哀歌一般,以色列人民已經體驗tio̍h家己ê罪過,kah因為罪而感受tio̍h性命ê脆弱、無力感。Ná親像大衛tī詩歌中所陳述家己痛悔之心意仝款(參考詩篇第五十一篇)。像chit種承認家己ê過犯,mā等於是teh祈求上帝ê憐憫仝款。

第9節,tùi chit節開始,一再出現「公平」、「公義」這用詞(參考第9節、第11節、第14節、第15節、第17節)。Chit兩個詞lóng是teh指上帝ê形像,mā是祂拯救ê疼。chit-má以色列人民感受tio̍h in因為欠缺這兩項,因為án-ne,in無法度看tio̍h「光明」kah「亮光」。

第10到11節,chit兩節講以色列人民ná親像「像盲人摸索」,看bē-tio̍h腳前ê絆腳石,因為án-ne,行路常跋倒、受傷,即使tī大日時頭mā仝款無安全。In過去無公平對待弱勢者,taⁿ換家己「渴望公平」臨到身上,m̄-koh即使親像熊仝款發出大聲ê「號叫」,á是軟弱到像「粉鳥哀鳴」一般ê haiⁿ-haiⁿ叫,「卻得bē-tio̍h」公平。說明性命已經lóng無希望。

第12到15節,chit兩節lóng是以色列人民teh表明懺悔ê態度。Thang參考耶利米書第十四章7到9節。In承認家己所犯ê過錯,包括「作惡多端」、「違抗」上帝ê旨意、「棄絕」上帝,進一步koh「壓迫別人」,而且有「謬誤」ê思想,以及滿口「白賊」等等。因為án-ne,tī in中間已經無法度chhōe-tio̍h「正義」、「公理」、「真理」、「公道」等代表上帝ê形像。Chhōe bē-tio̍h chiah-ê,等於chhōe bē-tio̍h性命ê ǹg望。這mā說明in處tī一個失去公平、正義,卻顛顛倒是非ê社會。Chit種社會,pháiⁿ人真囂張,連好人mā受in ê「欺負」。因為án-ne,上帝「看tio̍h這一切」,一定會「不悅」、受氣、忿怒,tòe後就會採取懲罰ê行動。

第16到18節,chit三節先知以賽亞講tio̍h上帝看見祂ê子民惡質ê行踏,絕對bē袖手旁觀。祂一定會採取行動。Tī chia,上帝「驚kah gāng去竟然無人幫助被欺壓ê人」,祂一定會伸手救助hiah-ê受tio̍h無公義對待kah欺壓ê人,hō͘ chiah-ê人「得勝」(參考以賽亞書四十五:8)。先知以賽亞tī chia用一種擬人化ê筆法,講上帝beh用「公義作鎧甲」,以「勝利作頭盔」,續落來是「報復作衫褲」,然後用「熱情作外袍」來進行祂ê拯救kah懲罰。Chia ê「頭盔」是軍人保護頭部ê護具,而chia ê「勝利」是一種榮耀ê象徵,「報復」是懲罰ê意思,「熱情」,表示對性命ê疼惜、燒熱愛。人無法度逃離上帝報復ê行動就算是bih-tī偏遠地區mā仝款。

第19節,「大水」、「旋風」,chiah-ê lóng是當時ê人所驚惶ê氣力。當上帝進行審判ê時,人人看見lóng會心生驚惶。

第20節,chit節thang參考以賽亞書第一章27節。上帝拯救ê恩典,m̄是一種廉價ê,卻是有代價ê。Chit種相對代價,就是「棄sak罪惡ê人」才能享受,繼續做惡事ê人是得bē-tio̍h ê。

第21節,chit節thang參考第四十二章6節,耶利米書第三十一章31到34節。

Chia講上帝beh「親自kah lín立約」,這是因為人已經棄sak罪惡,重新tńg來到上帝面前,上帝會用憐憫、赦免ê疼,kah chit種子民重新立約。立約,mā teh表明上帝揀選出來ê族群,上帝必定會拯救in。Mā特別勸勉in一定會「服從」上帝,甚至「kiáⁿ孫世世代代lóng服從」上帝,這是回應上帝立約之愛ê基本態度。

重新查詢 專卷研經 以賽亞書系列
錯誤回報,請聯繫