以賽亞書 51章1節 到 51章16節   背景資料  上一筆  下一筆
Tùi chit章開始一直到第五十二章12節止,chit段經文提起有關上帝beh重新建造、復興耶路撒冷。Tī chit段經文中thang看tio̍h先知以賽亞kā kui個重點khǹg tī第五十一章7到10節,形容hō͘上帝拯救tńg來到故鄉ê以色列人民,歡欣鼓舞地唱歌頌讚上帝,因為上帝已經「tńg來到錫安」,重新作以色列人民ê王。Tī chit段經文中,mā看tio̍h先知重複提醒以色列人民,一定會注意聽上帝ê聲音(話語)。因為只有聽從上帝ê聲音,chiah會發見上帝ê救恩就在身邊環繞tio̍h,祂永遠bē bē記得kah家己立約ê子民。

Chit段經文ê第1節、第4節、第7節等等共計有三pái用「聽」上帝ê呼聲作為主要基礎。其實,kui本聖經lóng是teh kā上帝ê子民講,一定會聽從上帝ê話,才能安然存活tī上帝賞賜khiā起ê土地頂面。

Chit段經文mā有一個特色,就是用對話ê方式編排,透過先知向以色列人民呼求,然後上帝回應以色列人民ê呼求。Chit段經文mā teh提供一個重要信仰觀念:凡是誠心實意悔改並呼求上帝拯救ê人,上帝lóng會垂憐並救援。

第1到2節,chit節開始就提起chhōe上帝救援ê人「lóng tio̍h聽我(上帝)ê話」,chit點mā是kui本聖經ê教導中心。然後連續有四pái「想看māi」,tio̍h以色列人民回顧歷史腳跡,就會看見上帝呼召了in ê祖先亞伯拉罕,hō͘伊tùi一無所有到擁有一切,特別是hō͘伊有眾chē ê kiáⁿ孫。若án-ne,in就會清楚明白上帝chiah是性命kah生存力量ê「源頭」。

第3節,chit節繼續第1到2節所提起ê,講出上帝對受掠ê以色列人民「施憐憫」,帶領in重回家園,並且hō͘已經ná親像「廢墟」、「荒蕪」ê故鄉,koh一pái像「伊甸園」般súi。並且hō͘ in「有喜樂」、「有歡欣」、「有o-ló感謝」ê聲音出現等等,chiah-ê lóng tī說明將來會kah in過去tī巴比倫奴隸ê生活完全顛倒,kā有新ê開始,性命充滿活力。

第4到5節,koh一pái呼籲四散各地ê以色列人民tio̍h「聽」、「注意聽」,上帝teh-beh「馬上救援in」,m̄-nā án-ne,上帝iáu koh khah「親自」以「公義」來統治in。

第6節,chit節thang對照第四十章7到8節。說明世間ê一切會有變化,m̄-koh上帝拯救ê計畫永bē改變。Chia ê「我ê拯救」,是teh指上帝ê救恩,而上帝ê救恩是來自祂ê話語。「我ê勝利」,是teh指上帝ê公義kah愛。

第7到8節,這是chit段經文第三pái提出呼籲,ài大家lóng聽上帝ê話。只有會注意聽上帝ê話ê人chiah會知影「甚麼是公正」,並且因為實踐上帝ê話語而「m̄驚」別人ê「侮辱kah嘲(sau)笑」。相對ê,侮辱kah嘲(sau)笑上帝奴僕ê人,終會親像破銅爛鐵仝款朽pháiⁿ、腐爛,像花草一般真緊to̍h會凋謝lian去,只有上帝ê話「永無停止」、「世世長存」。

第9到10節,聖經作者ài用「擬人化」ê筆法來描述上帝。Chia用上帝kah-ná iáu teh「睏」無「醒起來」ê款。因為án-ne,上帝聽bē-tio̍h以色列人民Tī痛苦中ê哀求。其實,這是以色列人民ê一種感受,因為in tī苦難中向上帝祈求,ǹg望上帝ē-tàng趕緊伸出救援ê手。Chia是用出埃及過紅海、約旦河等為背景。Koh講,chia提起「海怪拉哈伯」,這是代表邪惡ê氣力。通常lóng用來代表埃及帝國。「戾龍」,這是teh指魔鬼、撒旦、邪惡ê氣力(參考啟示錄二十:2)。

第11節,chit節指出以色列人民ē-tàng tùi奴隸之地被釋放tńg去故鄉,這是一件非常重要而且奇妙ê性命經歷。因為án-ne,in「快樂地歌唱,大聲叫」,並且kā「無koh憂愁悲傷」,這lóng是teh指一個全新ê性命kah生活。

第12到14節,chit節開始到第16節,是上帝teh回應前段第9到11節以色列ê人民呼求上帝拯救ê話。詩人先知以賽亞明確地傳達上帝已經赦免、赦免以色列人民過錯,勸勉以色列人民m̄-thang koh再óa靠人ê氣力,mā m̄-thang驚惶「逼」in ê人,有創造天地ê主宰上帝thang做為óa靠,人無法度傷害in,m̄-nā án-ne,上帝會賞賜kā in賜福「自由」,in kā tī上帝賞賜ê土地頂面「享長壽」、「得飽足」,bē有欠缺。

第15到16節,chit兩節用來表示性命真正óa靠,應該是chit位有能力「攪動海洋,hō͘波浪洶湧」,以及「鋪張天幕」,「立落來地ê根基」ê上帝。Chit句「你是我ê子民」,是「立約」ê典型句話,說明上帝kah祂揀選ê以色列民族之間,有特殊、親密ê關係,祂一定會「保護」祂ê子民。

重新查詢 專卷研經 以賽亞書系列
錯誤回報,請聯繫