以賽亞書 49章1節 到 49章7節   背景資料  上一筆  下一筆
Tùi第四十九到五十五章是第二時代先知以賽亞信息ê另外一個段落。Tī chit段落中,chit位詩人先知以賽亞提出一個重要ê中心思想:上帝ê奴僕受苦。Ná親像tī第四十八章16節所記載ê,chit位奴僕真清楚上帝差遣了伊,這tú好回應了第六章8節,當上帝teh呼召人去傳祂ê信息ê時,chit位奴僕自告奮勇地講:「我去!請差遣我!」m̄-koh上帝是提醒伊,m̄-thang過度樂觀,認為大家一定會聽從伊所傳講ê信息。若是會,in早就悔改歸向上帝而得醫了(參考六:10)。這就是先知耶利米一再向以色列人民提出ê,m̄是上帝m̄-chhap祂ê子民,祂一再派出奴僕去對以色列人民呼喊,ài in歸向上帝,m̄-koh in lóng拒絕聽從(參考耶利米書七:13、廿五:4—7、廿六:4—5),甚至後來以色列人民被掠到巴比倫去後,先知耶利米tī伊所寫hō͘以色列人民ê書信中,iáu是繼續呼籲in tio̍h聽從上帝ê話(參考耶利米書廿九:19—20)。

上帝盡忠ê奴僕一定會真忠實地kā上帝ê話傳達出來,而上帝ê子民若是遵從,上帝一定會看顧保守。因為án-ne,thang看出kui本聖經有一個中心信息:tio̍h聽從上帝ê話,因為上帝ê話語是永遠存在,其他ê物件lóng真緊to̍h會消失(參考以賽亞書四十:6—8)。

Chit段經文一直被看做是一首上帝奴僕ê詩歌。有時mā會hông稱做以賽亞書中ê第二首奴僕詩歌;第一首是tī第四十二1到4節。Á tī chit第二首詩歌中,koh一pái說明以色列就是上帝ê奴僕,這肯定表明出來:上帝並無棄sak kah祂立約ê子民以色列。

第1到3節,chit節強調無論khiā起tī tó位ê以色列人民,一定lóng tio̍h注意聽上帝ê呼聲(參考以賽亞書廿四:14—15a)。Chia ê「諸海島ê人!」、「遠方ê人!」,lóng teh表示khiā起在世界各地ê海島人民,就是teh指當時受賣到遙遠ê國家、地區去做奴隸ê以色列人民。值得注意ê是chia講chit位被選召ê奴僕是tī「出世以前」、「未出母胎」就已經被「指名呼喚」了,chit點tī第四十四章1到2節、第四十六章3節等等所在lóng bat提起過。這mā是先知耶利米親身ê經歷(參考耶利米書一:4—5)。Koh講,上帝選召ê奴僕傳達ê信息ná親像「銳利」ê劍(參考希伯來書四:12)。而且上帝所造ê「銳利ê箭」是「隨時thang發射」。這表示上帝選召ê奴僕,上帝會賞賜kā in賜福有完成任務ê能力。上帝bē選召一個人,卻hō͘ hit-ê人家己四界摸索。

第4節,chit節是奴僕teh回應上帝ê話。伊雖然是「努力工作,ē-sái講是lóng無效果」,chit句話mā講出上帝忠實奴僕出去努力傳上帝ê信息,ē-sái講是hiah-ê人無願意聽從。伊講「用盡氣力,猶原一事無成」,這就真親像第五十二章13節到第五十三章12節所描述ê hit位受苦之奴僕仝款。不過上帝忠實奴僕並無因為受苦而失去對上帝ê信心,伊深信上帝會為伊「伸冤」,而上帝會照忠實奴僕ê行為來「獎賞」伊。

第5節,thang對照第1節。上帝揀選ê奴僕是真「光榮」ê。Á伊ê氣力是tùi上帝來ê賞賜。

第6節,chit節koh一pái說明第5節ê奴僕ê使命,就是beh hō͘人認bat上帝ê救恩,hō͘眾人看見上帝拯救ê亮光。這「救恩普及天下」,這就是beh kā上帝ê疼傳開來,hō͘ koh khah chē人享受上帝ê救恩。

第7節,chit節濃縮了第五十二章13到第五十三章12節ê中心思想,上帝ê奴僕表面上看起來是受苦難,m̄-koh上帝透過chiah-ê苦難,進行祂奇妙ê拯救行動。人看做卑微ê「奴僕」,卻是teh代表上帝ê救恩。「上主必持守伊家己ê應允」,chit句話說明上帝ê話一出,事就必定成。因為祂是信實ê上帝,所講ê話,一定會實現。

重新查詢 專卷研經 以賽亞書系列
錯誤回報,請聯繫