以賽亞書 44章1節 到 44章20節   背景資料  上一筆  下一筆
Tī chit章中先知以賽亞繼續提起一個重要ê信息:真正上帝,是宇宙萬物ê創造主。Tī chit世界上,無任何一個神明ē-tàng kah祂比並。若m̄是chit位創造主所揀選、指定ê奴僕,就是假ê,bē-tàng信,ná親像hiah-ê崇拜偶像神明ê愚戇者仝款。

Chit段繼續前第四十三章所提起ê,先知呼籲以色列人民tio̍h聽從上帝ê聲音。因為in是屬tī上帝揀選ê子民,是上帝ê奴僕。先知以賽亞Tī chit段經文中mā真清楚teh譴責hiah-ê棄sak真正萬軍統帥—救贖主,而去拜虛假ê神明ê人,in ê愚笨tú好kah hiah-ê無用ê虛假之神仝款。

第1到2節,chia連續兩pái lóng講以色列民族是上帝ê「奴僕」,而且是上帝ê「選民」,是上帝所「意愛ê選民」,表示tī上帝對以色列民族確實是情有獨鍾,對in mā有特別ê期待。

第3到4節,因為是上帝親自揀選,因為án-ne,上帝「賜力量」,hō͘以色列民族,hō͘ in thang tī艱困、惡質ê環境下,mā thang生長kah像栽種tī溪水邊ê青草、楊柳樹一般,生做非常「茂盛」,永遠bē lian去。

第5節,因為有上帝ê靈(力量)灌ak tī以色列民族ê身上,而且lóng tī in ê「手股頭上刺tio̍h上主ê名號」,因為án-ne,吸引koh khah chē人趨之若鶩,跟tòe嚮往beh來分享。Koh講,chit種「上主ê名號」mā代表in kah上帝有特殊關係。古代奴隸lóng會tī手股頭á是額頭殼頂刺tio̍h主人ê記號,表明主僕ê關係。以色列民族就是上帝ê奴僕,後來改變用割禮做記號。

第6到7節,chia用「開始」kah「終結」Chit兩個詞來形容chit位創造主是永恆ê上帝,mā是人類kah世界ê主宰(參考四十一:4,啟示錄一:8、17)。Tio̍h注意ê是「開始」Chit-ê詞,意思是teh指祂m̄是tùi甚麼所在出現,mā m̄是tùi某一個存在物開始,祂是原本就已經有ê,而且萬物lóng是因為祂「開始」。Á「終結」Chit-ê詞有兩種意義;一是teh指萬物lóng終結ê時chūn,祂iáu是繼續存在。Koh講,祂無hông時間所限制。這就是chia所beh表達ê信仰觀念:除了chit位創造萬物ê主宰,無任何上帝、神明,ē-tàng kah chit位宇宙萬物ê主相比。

第7節,chit節koh一pái強調真正神,是會預言將來beh發生ê事,而且所預言ê,lóng必定會實現。因為萬物kah萬事lóng是tī chit位創造主ê手中才能出現、發生。Chia用「預言將來ê事」、「Kā beh發生ê事宣佈出來」、「甚麼人ē-tàng做我做過ê事」等句話,表示無任何一位神明有án-ne ê能力。

第8節,上帝beh祂揀選ê以色列子民m̄免「非常驚惶」,原因上帝是歷史ê主宰,卻m̄是人tī創造歷史。In是上帝「大能力」ê見證人。Chia ê「大能力」,另外一個意思是teh指「石磐」、「óa靠ê氣力」ê意思。表明是永遠可靠ê氣力。

第9到11節,chit三節經文m̄-nā提起虛假ê神,是用人ê手所雕刻出來ê偶像,而去拜chit種假神ê人,mā會kah in仝款受tio̍h侮辱。Chia特別指出「造偶像ê mā是人,並無比別人高明」,chit句話已經說明人人tī上帝面前lóng仝款,m̄是甚麼人ê手藝精巧細膩,造出來ê神明就會比較khah有能力,所有ê人tī上帝看起來lóng是仝款,無論伊身懷任何絕技,到上帝面前受審判ê時,lóng會「驚惶見笑」,因為ài面對真神ê審判。如果in所雕刻ê神明是真正,就m̄免án-ne「驚惶見笑」了。

第12節,這是描述用「金屬錘鍊」鑄造偶像ê情景,古往今來lóng仝款。有限ê人無可能造出無限ê物。Koh講,chiah-ê師傅mā會餓會渴,若是m̄食不lim,就會「疲勞困倦」,這tú好說明師傅ê軟弱,伊ê手所造出來ê神像mā必定kah伊仝款脆弱無力。

第13節,前一節提起鐵匠鑄造金屬神明,kā它「做成人ê形像」,然後khǹg tī「廟宇內」供人崇拜ê荒謬。

第14到17節,chit段經文是描述chiah-ê師傅所用ê材料lóng是tùi上帝來ê賞賜,hiah-ê樹木本來是上帝賞賜hō͘人遮蔭、取暖á是烘火做食物,taⁿ卻被師傅the̍h來當做神明,這是非常諷刺ê話語。Chia特別提起「香柏樹」、「橡樹」、「檜樹」、「松樹」等等chiah-ê品質極佳ê木材,lóng需要上帝tùi天頂降落ê「雨水」才能「hō͘它長大」。換句話講,chiah-ê人看做siōng珍貴ê材料lóng是tùi上帝來賞賜,為甚麼不敬拜上帝,卻去敬拜上帝落雨灌ak才能長大ê樹木?如果chiah-ê樹木lóng是神明,就bē-tàng當做生活用品,用來「烘火取暖á是烘餅」,因為án-ne做,對神明是非常不敬ê態度。Ē-sái講是人卻用來當做神明膜拜,koh khah害ê是向chiah-ê「柴頭」神明祈求拯救。若是chiah-ê柴頭偶像thang救人,它就ē-tàng救家己免受爐火ê火燒,mā m̄免hō͘人用鋸子鋸斷,而且hō͘人用來雕刻。

第18到19節,chia thang參考第六章9到10節。Chia指出雕刻chiah-ê偶像神明ê人,真正是非常「愚戇」,只要in小khóa「動點腦筋」,就會醒悟起來。M̄-koh真清楚ê,chiah-ê師傅á是去膜拜chiah-ê偶像神明ê人lóng是無醒悟ê人。

第20節,「the̍h灰充飢」,意思是teh指chiah-ê柴頭燒成了灰了後,是無法度用來當做食物。人若是iau餓iáu是仝款會感覺iau餓,拜chiah-ê虛假之神,對人生存ê迫切需要iáu-koh lóng無路用。

重新查詢 專卷研經 以賽亞書系列
錯誤回報,請聯繫