以賽亞書 42章1節 到 42章13節   背景資料  上一筆  下一筆
第四十二到四十三章lóng有一個非常重要ê主題,是論到以色列人民乃是上帝揀選ê奴僕,ná親像tī第四十章所提起ê,上帝beh祂ê奴僕去傳好ê消息hō͘ tī耶路撒冷ê受難子民,然後tī第四十一章提起上帝揀選塞魯士作為祂ê奴僕,興起伊,去為上帝完成懲罰悖逆子民ê工作。

chit-má第四十二章,koh一pái提起上帝揀選ê奴僕,因為上帝揀選一個民族á是一個人來做祂ê奴僕,是beh成做祂ê同工,並同齊參與拯救ê工作。因為án-ne,上帝一定會扶持伊、喜愛伊。然後繼續tī第四十九章1到6節、第五十章4到9節、第五十二章13到五十三章12節等等lóng有談論到上帝奴僕ê角色kah使命。

Chit段詩歌有一個重要ê主題,就是上帝揀選祂ê奴僕,是beh為上帝tī土腳行正義。作者並無明確講出chit位「奴僕」是甚麼人?m̄-koh tī第四十一章8到9節bat提起「以色列是我ê奴僕」,而且tī第四十三章10節koh一pái提起上帝選以色列作祂ê奴僕。M̄-koh tī先知耶利米ê信息中,巴比倫王mā bat經是hō͘上帝揀選出來ê「奴僕」(參考耶利米書廿五:9),用來懲罰背逆ê以色列人民。Á先知以賽亞tī第四十五章1節,則講上帝揀選塞魯士「做王」,這mā是teh表明伊就是上帝所揀選ê奴僕。因為án-ne,甚麼人是上帝ê奴僕?應該講是:甚麼人實踐上帝ê旨意,順從祂ê話語ê教導,chit種人、民族、國家,chiah是上帝所揀選ê奴僕。奴僕絕對不等於主人,koh khah無法度取代主人。

第1節,chia一開始就講「看ah,我ê奴僕,我扶持伊;我揀選伊,喜愛伊」,類似chit種句型kah耶穌tī約旦河領受行洗禮約翰ê洗禮了後,tùi天頂傳下聲音ê時所講ê仝款(參考馬可福音一:11)。聖經作者表示上帝所揀選ê奴僕,一定是祂所kah意ê對象,這是無庸置疑ê事。因為án-ne,上帝會「扶持」祂所揀選ê奴僕,mā會用祂ê「靈充滿」tī chit被揀選者ê身上。這「靈」字表示「活氣」、「風」,ná親像創世記第一章2節、第二章7節所用ê詞仝款。表明是一種特有ê氣力,thang完成上帝創造á是拯救ê目標。Á上帝揀選ê奴僕siōng重要ê使命,就是beh「為萬國帶來正義」,就親像上帝揀選亞伯拉罕仝款(參考創世記十八:19)。

第2到4節,chit位上帝揀選出來ê奴僕,外表並無起眼,bē引人注意。續落來用「壓傷ê蘆葦」kah「kā熄ê燈火」來代表hiah-ê受tio̍h壓迫,性命受tio̍h極大摧殘,hō͘人排擠到社會角落,lóng無生存空間ê邊緣人,上帝iáu-koh「不at斷」、「不吹滅」in。Chit位被揀選出來ê奴僕,「不失望mā不鬱卒」,會繼續無停tī土腳「伸張正義」,這是上帝揀選ê奴僕ê使命。

第5節,「上帝創造諸天」,chit句話真重要,mā是信仰告白siōng基本ê一句話。Chia清楚表示上帝是天ê創造者。Chit節ê第二句是上帝「造地kah地上ê一切生物」,結合前句「上帝創造諸天」,就是上帝創造「天地,kah地上ê一切生物」,這mā是創世記第一章6到13節所敘述上帝創造天地ê經過。第三句講上帝「賜hō͘人性命活氣」,chit句話thang參考創世記第一章26節所提起ê「形像」,kah第二章7節ê「性命ê氣」。

第6到7節,chit兩節一開始,上帝就宣佈beh「賜力量」hō͘祂所揀選ê奴僕。Ná親像頭前提起過ê,主要用意是beh奴僕「在世間主持公道」,因為上帝就是公義ê。只有án-ne才能彰顯上帝ê特性。上帝ê奴僕若是真實地去實踐上帝揀選ê使命,就會「成做萬國之光」,hō͘生活tī困境中ê hiah-ê人重燃性命ê亮光,ná親像開啟「盲人ê目睭」仝款。Hō͘ hiah-ê受掠ê人ná親像tùi「被囚」ê「監獄」中行出來仝款得tio̍h釋放而看見「光明」。

第8節,「我是上主;耶和華是我ê名」,chit句話thang參考出埃及記第三章15節b句。Chit句話mā是一種宣告,表明ê就是tī這宇宙萬物中,只有chit位創造ê神,chiah是真正上帝。上帝絕對不允准虛假ê偶像神明kah祂「共享」榮耀,這「榮耀」代表上帝拯救ê恩典(參考以賽亞書五十二:10)。

第9節,表示上帝早已經預定好beh成就ê事,taⁿ已經實現。這表示chit位創造宇宙萬物ê上帝,kah其它虛假ê神是完全無仝,這mā是tī以賽亞書第四十一章21到24節所提起ê,hiah-ê虛假ê神,m̄知家己ê未來,mā m̄知家己ê過去。無chit種能力ê神明,就m̄是真正神。

第10到12節,chit段詩歌通常hông稱做是普世性ê o-ló詩歌。詩人á是先知以賽亞teh呼籲所有ê人以及一切受造物,lóng同齊來歌頌上帝。詩人呼籲「全世界」所有地上ê國家,包括「海洋kah其中ê生物」,chiah-ê上帝親自創造ê萬有,mā包括tī「海島kah島上ê居民」,大家lóng beh同齊來歌頌上帝。

第11節,作者確實是視野真廣,tī二千多年前,就thang看tio̍h「海島kah島上ê居民」,mā看tio̍h「沙漠kah其中ê城市」lóng有居民khiā起tī中間。雖然ài tī「沙漠」中討生活真困苦,m̄-koh in mā是「tio̍h高聲歌唱」來o-ló上帝。

Chia提起幾個城市ê名,包括有「基達」,這是設tī亞giú伯沙漠以北地區,mā是貝度因人ê家園,chia以畜牧業出名(參考以賽亞書六十:7,以西結書廿七:21),當地人以游牧維生khah chē(參考耶利米書四十九:28—29)。「西拉」,這是以東人ê首都,因為chē岩石,而且峭壁koh chē,被稱做「峭壁之府」。

Án-ne,無論是海島上ê人,á是tī沙漠地帶ê居民,甚至世khiā起tī高山峭壁頂ê居民,大家lóng tio̍h同聲歌頌上帝ê救恩。

第13節,chit節講上帝已經準備好勢,beh開始進行審判ê工作,chit種審判就ná仝一個「勇士」lóng準備好勢了,beh向「敵人顯耀威力」仝款。

重新查詢 專卷研經 以賽亞書系列
錯誤回報,請聯繫