以賽亞書 40章21節 到 40章31節   背景資料  上一筆  下一筆
Chit段詩歌是續接前段經文teh述說上帝ê偉大,相對ê,地上ê君王真渺小。

第21節,chit節連續提出四個問題,包括「m̄知」(兩pái)、「無聽見」、「m̄是有人kā伊講過」等,chiah-ê句話lóng是用一種疑問ê句型出現,表明ê是應該tio̍h知影,而不應該是chiah-ni̍h giâu疑無清楚。

第22節,chit節採用以色列人ê宇宙觀,描述上帝ê創造就是kā氣吹入穹蒼中,然後上帝就是坐tī這穹蒼ê頂面,表示比日月星辰iáu koh khah koânê所在,上帝tùi siōng koân ê頂面俯視地上ê人類,人ná親像「螞蟻一般」ê渺小,而人khiā起tī「帳棚」內,隨時beh收摺帳棚離開伊去(參考哥林多後書五:4)。

第23到24節,chit節thang對照第17節來看。tī土腳,人看做偉大ê君王,tī上帝ê眼中,並無算甚麼。只要上帝一出手,就ē-tàng hō͘ chiah-ê自視偉大ê君王「全歸烏有」,ná親像「細漢植物」仝款,真緊to̍h會因風吹雨phah、日曝而「枯乾」,á是親像糠秕「被風吹散」。

第25節,chit節thang對照第18節。注意chia強調「神聖」ê上帝,這「神聖」一詞,表示上帝kah人之間ê差別。以賽亞書ê作者共計用了廿六pái「神聖」一詞來形容chit位創造宇宙萬物ê上帝。Á chit位「神聖」ê上帝siōng忌諱人亂使用祂ê名,á是用其他物件來模仿取代祂(參考出埃及記二十:4—7)。

第26節,創世記第一章16節真清楚,講上帝創造日頭、月娘、星辰等會發光ê「光體」。因為án-ne,上帝ê命令in lóng會聽從,ná親像將軍「率領軍隊」,對麾下ê軍隊認bat得非常徹底、清楚,甚至thang「一一指名呼喚」。

第27節,tùi出埃及記thang看出陷tī苦難中ê以色列人民常發出「埋怨」ê聲音,認為上帝已經棄sak了in(參考詩篇八十八:14),原因是in認為上帝「不關心」in所遭遇ê「苦難」、「冤枉」。其實,人ê一舉一動上帝lóng非常清楚。

第28節,thang對照第21節,mā thang參考詩篇第九十篇1到2節。Chia用上帝bē「疲乏」、「困倦」來表示上帝絕對m̄是有限ê人ē-tàng清楚描述kah瞭解ê。

第29到30節,因為上帝是永恆ê造物主,人ê「力量」á是「氣力」lóng是祂賞賜ê。無論是jōa-ni̍h-á強壯ê人,lóng會有性命ê極限。「疲乏」、「困倦」lóng是人ê性命特徵,mā說明人ê有限、軟弱。M̄-koh相對ê,上帝卻是永遠bē「疲乏」、「困倦」。

第31節,對上帝絕對忠心ê人,一定會得tio̍h上帝賞賜ê氣力tī chit人ê性命中,hō͘伊「像la̍h-hio̍h仝款thí開翼股」,無論tī tó位奔走、飛馳,lóng bē困倦。

重新查詢 專卷研經 以賽亞書系列
錯誤回報,請聯繫