以賽亞書 29章1節 到 29章24節   背景資料  上一筆  下一筆
Tùi chit章開始到第三十二章止ê經文lóng teh描述亞述帝國對南國猶大ê侵略。

第1節,tùi第廿八章開始到第三十四章止,先知以賽亞提起六個災禍。第廿八章1節一開始就講tio̍h第一個「受災」ê以色列國,chit-má第廿九章1節提起第二個「tio̍h受災」ê對象就是「耶路撒冷本身」。雖然耶路撒冷lóng照例tī節期中舉行各種祭典,看起來kah-ná對上帝真忠心,其實並m̄是真正親像án-ne。

第2到4節,延續第1節,提起上帝降災難tī耶路撒冷了後,人民會「haiⁿ-haiⁿ叫哀號」,而且是「全城tio̍h變成一座血淋淋ê大祭壇」,這已經清楚teh說明是上帝允准以色列人民ê仇敵來攻打in。Á chiah-ê攻擊非常嚴厲而且殘酷,致使耶路撒冷ê人民lóng「m̄敢作聲」,只有ē-tàng「蹲tī土腳」thèng候災難趕緊過去。因為若發出聲音就會hō͘敵人聽見而暴露行蹤,為家己帶來koh khah大ê災難。

第5到8節,chit段經文tú好kah前段第1到4節所描述ê景況完全顛倒。Tī chit段經文中,先知以賽亞傳出上帝拯救ê信息。伊講「忽然,出乎意料」,上帝會用各種人料想bē到ê方式來趕散敵人,chit種方式包括「雷轟」、「地動」、「暴風」、「巨浪」、「燄火」等,chiah-ê lóng m̄是任何國家ê氣力ē-tàng阻擋會tiâu。上帝用chiah-ê當做工具來拯救以色列人民,hō͘攻擊耶路撒冷ê敵人lóng無招架ê餘力。

第9到12節,chit段經文是teh指猶大kah埃及聯盟是愚戇ê想法。先知以賽亞一再提醒以色列人民,上帝bat kā in ê祖先tùi被奴役之地埃及搶救出來。chit-má雖然受tio̍h亞述帝國ê威脅,m̄-koh只要專心óa靠上帝ê保守帶領,必定ē-tàng安然無恙。棄sak上帝而去走chhōe埃及ê支持是非常「愚戇」ê想法。M̄-nā án-ne,採取chit種策略就kah chheⁿ-mê-.ê人仝款,是「盲目」ê行動,mā像lim「醉」了ê人仝款,隨時會倒落去。先知以賽亞提起一個重要ê觀念:若是無上帝啟示,無論是世間ê「飽學之士」,á是「目不識丁」ê人lóng kā無法度明白上帝所啟示ê意義。

Koh講,chia mā有另外一個意思,就是無論是甚麼人,大家lóng無想用時間去解讀上帝「冊卷」—聖經中ê話語(參考以賽亞書一:1),kan-taⁿ想beh請人讀kā in賜福聽,m̄-koh即使請了飽學之士講解,若是無上帝啟示mā是枉然。

第13到14節,chit段經文tú好講出假先知kah祭司虛假ê信仰態度,kah in誤導人民對上帝之敬拜行為—欠缺真誠ê心,這tú好顯示in tī信仰ê程度上真膚淺。先知以賽亞強調上帝真痛心猶大ê人民,kan-taⁿ會用「唇舌」嘴中唸唸有詞地敬拜祂,m̄-koh in ê「心卻遠離」,講穿了,都無用真心實意ê態度敬拜上帝。先知耶利米mā指出伊hit時代ê以色列人民有仝款ê問題(參考耶利米書十四:11—12)。Chia koh khah清楚指出「in ê宗教kan-taⁿ是人間ê一種規條傳統,熟讀暗唸而已」,這是teh指外表ê行為。為tio̍h án-ne,上帝一定會嚴厲懲罰in。上帝ē-sái「聰明人ê聰明」、「精明人ê精明」lóng變成無用ê物件。

第15到16節,chit兩節指出人心中認為「無人曉得in teh做甚麼」,m̄-koh,聖經作者講上帝是無所不在ê神,無論是上到siōng koân ê天,á是落去到地底siōng深ê深淵,lóng會tú-tio̍h上帝(參考詩篇一三九:7—8)。耶穌就真清楚ê講,人tī「隱密」中所做ê事,上帝lóng看kah非常清楚(參考馬太福音六:4、6、18)。當chiah-ê領導者「顛顛倒是非」ê時,tú好說明in心中根本無上帝。

第17節,chit節成做下段經文ê一個轉折點。主要teh說明,真正改變一切ê,就是上帝,只有祂chiah有能力hō͘「荒地tio̍h變成肥田;肥田tio̍h變成荒地」。因為萬物lóng是tùi上帝來ê創造,mā tī祂ê手中成就歷史大事,因為一切萬事lóng帶有上帝ê旨意在其中(參考詩篇一三五:6)。

第18到21節,這是一段美好ê信息,mā是審判ê信息,hō͘ hiah-ê忠於上帝ê子民,就是「臭耳聾會聽見」、「盲人會thí開目睭」,這lóng tī回應第10到11節本來盲目的心靈,kā koh一pái重新開啟。Tī以賽亞書第三十五章5節,先知ê預言中,講「chheⁿ-mê-.ê ē-tàng看,臭耳聾ê ē-tàng聽」,這是上帝極大ê救恩。當以色列民族chit群劫後餘生ê子民看見上帝ê奇妙作為,tī上帝帶領in回歸故鄉後,in就會ná親像開了耳ákah目睭ê人仝款,明白並遵從上帝ê話。

第22到24節,chit段經文koh一pái說明上帝對以色列子民ê期待,希望in會知影帶領in祖先離開埃及ê上帝,一定會保護in,in mā kā看見上帝所賜ê各種福氣,而會「敬畏」上帝,甚至連「愚笨ê人」mā會因為án-ne而認bat上帝ê救恩。

重新查詢 專卷研經 以賽亞書系列
錯誤回報,請聯繫