以賽亞書 24章1節 到 24章23節   背景資料  上一筆  下一筆
Tùi第廿四章開始到第廿七章止,這四章通常lóng被稱做「以賽亞式ê啟示文學篇」(Isaiah Apocalypse)。Tī舊約聖經中,屬tī啟示文學ê作品bē少,其中包括以西結書、但以理書、撒迦利亞書、阿摩司等先知書中mā lóng有出現部分類似chit種啟示作品。Tī新約聖經中以啟示錄siōng-kài典型。

Tī chit段經文中,作者強調當世人kah上帝ê關係修好了後,新ê時代就會來臨,chit種新時代是koh khah án怎都無死亡(參考廿五:8),而且已死ê人會koh活(參考廿六:19)。M̄-koh前提一定tio̍h是:kah上帝有和好ê關係。Á這mā是使徒保羅一再強調ê,咱是藉tio̍h耶穌ê koh活kah上帝和好(參考羅馬書三:22)。

第1到4節,「上主beh毀滅大地」,這kah創世記第六章所描述ê仝款。主要原因是kah人ê罪有關係。Chia講上帝毀滅ê方式是hō͘大地「荒涼」,表示地kā不再生產五穀,人ê生存mā kā因為án-ne發生危機,ná親像第3節所提起ê仝款。當大地荒涼到「虛空」ê狀態,chit時chūn任何人lóng仝款,無人thang避免飢荒ê重創。

第5到6節,chit兩節是chit段經文ê中心。Chia真清楚提起上帝會án-ne hō͘大地荒涼到虛空ê狀態,就是因為上帝ê子民m̄遵守律法誡命,違背in kah上帝之間所立ê約ê結果。

第7到9節,因為上帝懲罰ê結果,就是天無koh降落雨水,所有一切變成荒涼後,hiah-ê人會因iau餓難耐,已經無法度發出任何慶祝歌唱ê聲音,只有「悲傷」,而且都無受氣ê現象出現。

第10到13節,iau餓siōng容易反應出來ê社會景象,就是動盪不安,搶奪四界可見,弱肉強食必定會有。因為án-ne,家家戶戶必定會關ân門戶。因為大家lóng teh chhōe食ê食物,chhōe bē-tio̍h就會四界破壞公共建築,城牆因為án-ne m̄免敵人來攻打就會「倒伊」,「城門」mā會hō͘摧毀,無人ē-tàng管chiah-ê事,因為大家lóng teh chhōe食物。

第14到16節a句,chia用「西方」kah「東方」,表示全世界ê意思。Chia講「劫後餘生ê人」會因為得tio̍h新性命而「快樂歡唱」,而全世界lóng kā為tio̍h án-ne而講述上帝奇妙ê作為kah偉大。所謂「劫後餘生ê人」,mā就是所謂「殘存ê人」,意思是teh指tī上帝特別憐憫之下所留落來ê子民。

第16節b句,tùi chit節開始,直到第23節止,koh tńg來到前段審判ê內容。先知以賽亞發見,性命有新ê希望,是知影上帝會憐憫、赦免,伸手救助苦難中ê子民。M̄-koh若是chiah-ê苦難中ê子民m̄知悔改認錯,只有期待上帝ê拯救,he是真愚戇koh不切實際ê。這就是先知以賽亞感覺非常痛苦ê原因,因為「背信ê人繼續背信」,繼續去做可惡ê事。

第17到20節,chit段經文講上帝必定會採取嚴厲ê懲罰,hō͘ chiah-ê m̄知悔改ê人無法度逃避「恐怖、陷阱、羅網」ê懲罰。Koh khah嚴肅ê是會面臨嚴酷飢荒ê打擊,差不多無法度重建恢復起來。

第21到23節,「上帝懲罰ê時chūn到à」,chit句話就是teh指「到hit日」ê意思,是teh指上帝審判ê時刻。Hiah-ê平時hō͘人民供奉ê虛假之神mā會列tī懲罰ê對象中,mā包括「地上ê統治者」,因為chiah-ê君王chiah是帶頭hō͘人民棄sak上帝ê主要原因。當上帝ê懲罰來臨ê時,連日頭kah月娘lóng會感覺見笑,無面出來kah人見面,in kā家己隱藏起來。Á這mā teh表示另外一個意義,就是kui個受造物lóng已經敗壞到無甚麼thang hō͘人期待ê了。只有知影悔改ê人chiah會清楚上帝是一切ǹg望ê中心,只有tńg來到上帝ê面前,才能看tio̍h性命ê新希望。

重新查詢 專卷研經 以賽亞書系列
錯誤回報,請聯繫