以賽亞書 21章1節 到 21章17節   背景資料  上一筆  下一筆
Chit章總共提起三個族群,一是巴比倫,二是以東,三是阿拉伯。值得注意ê是,chit章kah第廿二章chit兩章編輯tī chia有kóa奇怪,因為以賽亞書第一部分,mā就是tùi第一到三十九章,一般來講是用主前第八世紀為主要背景。Á巴比倫ê滅亡,是屬tī主前第六世紀ê時代。因為án-ne,chit段經文可能比第十三到十四章ê背景tio̍h晚,m̄-koh應該比第四十到五十五章ê資料to̍h早。有一種看法是:chit章ê資料背景應該是tī主前第八世紀無錯,因為tī主前第八世紀,巴比倫就bat有過兩pái想beh擺脫亞述帝國ê控制,一pái tī主前722到710年間,另外一是tī主前705到702年間。Á chit-má chit段經文,真可能就是tī主前711年,先知以賽亞得tio̍h啟示,預言巴比倫會遇tio̍h嚴厲ê懲罰,果然,主前710年左右,亞述帝國確實phah敗巴比倫。

其實,tùi第三十九章thang看tio̍h巴比倫後來為tio̍h beh壯大聲勢,以及控制kui個巴勒斯坦,iáu bat派特使來到猶大,藉tio̍h請安希西家王,隱藏想beh窺探猶大國防防衛力量ê虛實。Chiâⁿ實tī主前587年,巴比倫舉兵入侵猶大,並且tī主前586年消滅了猶大。

第1節,chit章開始就真清楚是「有關巴比倫ê信息」,講出該國teh beh像被「旋風颳過沙漠」仝款,遇tio̍h慘重ê「災難」,而且其嚴重性是到à hō͘人窒息ê狀態。

第2節,chit節ê「以攔」是設tī底格里斯河ê下游平原。Chit-ê民族久長以來一直是亞述kah巴比倫人ê世仇,後來加入波斯ê軍隊,tī主前538年征服了巴比倫帝國。Á「米底亞」,koh稱做「瑪代」,chit-ê族群khiā起tī巴比倫帝國ê東北方,是後來波斯軍隊ê主力。

「上帝beh終止巴比倫帶hō͘人ê痛苦」,chit句話真清楚說明一個國家ê盛衰,lóng有上帝ê旨意在其中。若是無尊崇上帝,認為家己真有能力,無論是一個人á是國家、民族,lóng會tú-tio̍h仝款結果。

第3到4節,先知以賽亞用「像臨盆ê婦女陣痛仝款」來說明伊心內ê「痛苦」。先知以賽亞並且用「看bē-tio̍h」kah「聽bē-tio̍h」來形容伊知影chiah-ê消息了後,心中極大ê「驚惶痛苦」,並且描述出心內ê矛盾,一則希望看見巴比倫帝國被消滅,以減輕被伊統治ê人民ê痛苦。M̄-koh另外一方面,伊看見hit種受tio̍h新興帝國波斯軍隊強猛、勇猛所摧毀ê城邦,其人民面臨ê慘狀,心中koh開始有「恐怖」感,深驚這新ê帝國kan-taⁿ會koh khah殘酷。因為án-ne,產生「驚惶得pi̍h-pi̍h-chhoah」kah不安,致使「頭眩暈」。

第5節,記載tī巴比倫帝國首府內,大家正teh準備佳餚宴請賓客ê時,忽然有消息講波斯帝國ê軍隊已經來臨。M̄-koh就算in想趕緊整軍備戰,mā是來不及了。這就表示巴比倫帝國根本都無警覺國家teh beh發生危機,iáu家己認為真安全,無人會想tio̍h上帝kā出手懲罰。

第6到7節,上帝ài先知以賽亞去做一個守望者,專心斟酌看māi巴比倫遇tio̍h毀滅ê情形。「騎兵兩個兩個地過來」,這是古代亞述帝國ê戰術,in用一匹馬giú一戰車,車上khiā兩名騎兵。有一位駕馭tio̍h戰馬,另外一位可能就是弓箭手,á是槍手,án-ne,即使tī疾駛中ê騎兵mā ē-tàng真準確ê射箭、hiat槍。Á安排騎「驢á」者,是用來欺敵ê方式,先派騎驢á ê隊伍tī前,hō͘敵方城池瞭望台頂ê守衛掠做是是家己城內ê人,á是「駱駝」商隊來進行貿易。

第8節,「日瞑tī chia khiā崗」,表示看守城牆ê警衛非常警醒,無怠懈職責ê意思。

第9節,chia講確實有看見「有騎兵兩個兩個起來」,表示來者是勝利者tú-teh接近城門,而且是成群結隊地起來,這表示波斯ê軍隊已經逼近了。因為án-ne,守望者chiah會hoah出「巴比倫傾覆了」。

「偶像lóng被phah碎tī土腳」,tī古代社會lóng是kā in敬拜ê神,當做戰爭ê守護者。因為án-ne,攻擊對敵ê一方ê時,一定會連帶ê kā敵方所拜ê神明同齊phah碎,並燒毀寺廟。Án-ne,敵方所拜ê神明就bē koh來復仇。

第10節,上帝講過去以色列人民ná親像「篩á裡被篩ê麥á」,表示以色列人民ná親像巴比倫人á是chìn前ê亞述人手中收割ê「麥á」一般。意思是in是任人宰割ê、thang隨意處理ê族群。M̄-koh chit-má先知以賽亞去傳「好消息」hō͘「以色列同胞」。Chia雖然無講出是甚麼「好消息」,m̄-koh tī第四十章到2節講,ná消息就是上帝決定赦免in了。

第11到12節,chit兩節真特別,談起以東ê信息,m̄-koh無說明以東會tú-tio̍h ê結果,不過tī其他先知ê文獻中,卻thang真清楚描述以東ê慘狀。包括有耶利米書第四十九章7到22節;以西結書第廿五章12到14節提起,上帝kā對以東人進行「報復」ê行動;阿摩司書第一章11到12節;俄巴底亞書ê描述篇幅koh khah chē,kui卷lóng是談論有關以東ê事;瑪拉基書第一章2到5節,先知稱以東是「罪惡ê國家」。Chia ê背景真可能是tī先知阿摩司時代ê主前第八世紀,mā是亞述帝國國勢siōng興旺ê時代。

「有人tùi以東問我」,這表示以東人mā有人聽聞先知ê信息,而且深信tī先知以賽亞所傳出ê信息,必定是tùi上帝來,而且一定會實現。問ê人連續用兩pái「暗夜快過了pah」chit句話,「暗夜」teh代表危險、不安、驚惶等。Á先知以賽亞ê回答是肯定ê,而且表示「天快亮了」,m̄-koh chit種天光ê時間真短,因為續落來是「暗夜beh koh再來」,這清楚講出以東並bē-tàng脫離災難,即使有,時間mā是真短促。

第13到15節,chit段經文是有關阿拉伯ê信息。

「底但ê人」,mā是亞伯拉罕ê kiáⁿ孫(參考創世記廿五:2—3),是阿拉伯人ê一個遊牧部落。Á「提瑪ê人」,這是設tī亞giú伯沙漠ê北pêng,是一個綠洲城市。因為án-ne,生活用品夠額。先知以賽亞建議in,當難民走來向in請求食物ê時,m̄-thang拒絕。當chiah-ê難民需要水來止渴ê時,就beh kā in賜福水lim,而bē-tàng拒絕伸出援手。因為in lóng是tī「刀下逃生,弓下逃命」ê戰爭難民。

第16到17節,「tī一年內」,這表明是一個非常確定ê時間,ná親像「雇工合約」期滿仝款。「基達」,chit-ê族群雖然是沙漠中siōng強猛民族貝督因人ê祖先,m̄-koh in會tī一年內消失,無koh存在。

Tùi頂面所講chiah-ê信息thang看出阿拉伯人ê chiah-ê小聚落民族,真緊to̍h會hō͘亞述帝國吞滅。In lóng無法度抵抗亞述ê大軍壓境。

重新查詢 專卷研經 以賽亞書系列
錯誤回報,請聯繫