何西阿書 3章1節 到 3章5節   背景資料  上一筆  下一筆
這是另外一個情節ê開始,mā是teh描述先知何西阿怎樣勸勉浪蕩ê bó͘歌蜜tńg來到伊身邊來。伊用真真貴ê價錢kā當妓女ê bó͘贖回來。並且勸勉伊m̄-thang koh再離家出去。先知何西阿用chit種方式來kā以色列人民講,一定tio̍h回歸到上帝面前,伊講上帝一定會赦免以色列人民悖逆ê罪。

第1節,這是另外一個情節ê開始。作者tī chit章是以「第一人稱」來寫,真可能就是先知何西阿ê手筆。Ná親像第一章2節踏話頭ê第一句話所講ê,是tùi上帝來ê命令語句,上帝ài先知何西阿tio̍h koh再去愛hit-ê棄sak丈夫去「另結新歡」ê bó͘。上帝卻ài先知何西阿án-ne做ê主要目的就是以此來比並以色列人民,看māi上帝無比ê疼,因為以色列人民ná親像淫婦hit種,悖逆了上帝,m̄-koh上帝卻iáu是án-ne深teh疼in。

Chia提起「祭過偶像ê葡萄餅」,chit種餅是以色列軍人出征ê時chūn必備ê軍糧,mā是一般以色列人民外出長途旅行ê時必帶ê食物。Chit種餅ê營養高,而且容易保存。以色列人民m̄-nā無因為有夠額ê葡萄thang製成葡萄餅而知影感謝上帝,顛倒地卻用葡萄製成ê餅來祭拜巴力偶像神明(二:8—9),認為chiah-ê偶像神明會賜福kā in賜福栽種ê葡萄樹結出koh khah chē ê葡萄。M̄-koh真正會幫助、賜福in ê是上帝。

第2節,chit節講先知何西阿照上帝ê指示,伊「用十五塊銀á kah一百五十公斤大麥ê代價買tńg來chit-ê cha-bó͘人」。照利未記第廿七章3到4節ê記載,一個人還願ê時,二十到六十歲ê cha-po͘人一定tio̍h用五十塊銀á,cha-bó͘人用三十塊銀á。現在,先知何西阿是用十五塊銀á,án-ne只付了一半價錢,另外一半價錢就是用一百五十公斤ê大麥。Thang比較列王記下第七章1節ê記載,一塊銀á thang買tio̍h六公斤siōng好ê大麥,án-ne,一百五十公斤就一定tio̍h花去二十五塊銀á。Án-ne算起來,先知何西阿總共是用去四十塊銀á ê代價chiah贖回伊ê bó͘,比規定ê三十塊銀á koh khah-chē ê價碼。

第3節,先知何西阿對伊ê bó͘歌蜜提出一個重要ê條件:tòa做伙,m̄-koh無koh kah伊「同房」。為tio̍h是beh hō͘伊ê bó͘ ē-tàng潔身自愛,除去淫婦ê心思意念。仝款ê要件mā用tī以色列人民kah上帝之間ê關係;上帝需要以色列人民經過心靈ê洗盪,hō͘ in知影怎樣kā過去錯誤ê心靈潔淨落來。

第4到5節,chit節是比較khah麻煩,因為chit節到底是teh指以色列人民亡國被掠到外國去做奴隸過艱困ê日子?是teh指in確實悔改ê生活態度?經文讀起來是真親像tī亡國tī亞述。Chia講in雖然是hō͘掠到外國去,m̄-koh in確實是過一個非常敬虔ê聖潔生活,有上帝kah in同在。In過了一段「無祭祀,無石柱,無偶像kah神明thang占卜」ê陶冶ê時間後,知影「koh一pái 回心轉意,走chhōe上主—in ê上帝,án-ne,就會知影怎樣「敬畏上主,領受伊豐富ê賞賜」。

Chia ê「歸回」一詞,是何西阿chit本經冊中ê主題之一。上帝用盡一切辦法,beh hō͘棄sak ê以色列人民知影悔改,m̄-thang koh再繼續過拜偶像ê生活。「歸回」mā是teh表明「悔改」ê意思,這是非常重要ê信息。

重新查詢 專卷研經 何西阿書系列
錯誤回報,請聯繫