創世記 4章1節 到 4章16節   背景資料  上一筆  下一筆
Chit段經文描述該隱刣死家己ê小弟亞伯ê經過,以及上帝怎樣懲罰該隱。

第1到2節,「同房」,chit-ê詞講出kui章故事ê重點,上帝雖然對人違抗命令有嚴厲ê懲罰,m̄-koh iáu是賜hō͘人有延續性命ê氣力。「同房」mā講出夫妻之間ê關係,m̄-nā kan-taⁿ是「性」事,chit-ê字本身就是teh指「認bat」、「知影」ê意思。夫妻tio̍h彼此認bat chiahē-tàng算是夫妻,chiah ē-tàng「赤身露體」mā bē見笑。Chit節mā提供另外一個重要ê信息:性命是上帝所賞賜ê。無上帝ê祝福,性命bē出現。有上帝ê幫助,chiah有性命。因為án-ne,亞當kah夏娃就是tī上帝賜福下 kā「該隱」生落來。

「該隱」ê名ê意思是「得tio̍h」,而且歡歡喜喜得tio̍h,表示性命ê喜樂。Á「亞伯」ê名有兩種意思:一種意思是teh指「目nih-á」。Mā就是講「亞伯」ê性命所帶來ê喜樂時間是目nih-á久。另外一種意思是teh指「苦難」,表示死亡,是被謀殺來死。

第3到7節,該隱是「作穡人」,這表示是真進步ê時代。Á亞伯是「顧羊人」,表示比較困苦。M̄-koh上帝看重亞伯ê奉獻,卻「拒絕該隱kah伊ê祭物」。為甚麼上帝會歡喜亞伯ê獻祭,卻無接受該隱ê奉獻?聖經無說明,只表示該隱無「做該做ê事」(第7節)。

第7節是kui個故事ê重點,作者說明一點:做應該做ê事,chiah是siōng重要。真正ê問題是該隱無去做該做ê事,á是講伊做無應該做ê事。Ē-sái講是作者並無說明伊忽略甚麼,á是做甚麼無應該做ê事。

第8節,該隱果然是kah上帝所講ê仝款,繼續去做無應該做ê事,就是刣死小弟亞伯。

Chit節講出第四章siōng重要ê一件事:罪已經擴大到殘害上帝用祂ê形像所創造ê性命。原本上帝創造萬物ê性命是看做好,人卻用殘酷ê手段kā它殺害,這講出人ê罪之重。

第9節,上帝問該隱,該隱回答「m̄知」,chit-ê字tú好就是「同房」(認bat)ê反意,意思是:我根本就「m̄-bat」亞伯。意思是伊表示家己無義務照顧伊ê小弟亞伯。

第10到11節,chit兩節講出一個真重要ê希伯來生活文化觀念:血,teh代表性命。因為án-ne,in m̄食帶血ê食物(參考利未記十七:11)。Koh講,上帝創造ê萬物是有性命ê,土地就是其中之一。受冤屈ê性命ê血流入去土地,土地會替受冤屈ê伸冤。

第12節,thang看出該隱所受tio̍h ê懲罰比以前亞當所受tio̍h ê懲罰koh khah嚴重,因為人tùi伊甸園hông驅逐出來了後,chit-má soah連上帝ê面mā見bē-tio̍h。見bē-tio̍h上帝ê面,等於性命無保障仝款。

第13到14節,該隱知影chit種懲罰會hō͘伊成做被報復ê對象,因為án-ne,伊向上帝傾訴無法度承受án-ne重ê懲罰。

第15到16節,聖經一再強調慈悲ê上帝,會縮短á是降低祂ê懲罰。祂tī該隱「額頭做記號」,當做保護,免得伊遇tio̍h殺害。


重新查詢 專卷研經 創世記系列
錯誤回報,請聯繫