創世記 38章1節 到 38章11節   背景資料  上一筆  下一筆
Chit章是「耶和華文獻」ê資料,mā是真完整ê一篇故事,主要除了teh說明猶大ê兩個kiáⁿ兒法勒斯kah謝拉ê由來,mā koh一pái提起一個性命ê觀念:上帝是性命ê主宰者。什麼人刻意阻擋性命ê延續,lóng會引起上帝ê憤怒。猶大ê次子俄南ê行為tú好說明了chit-ê重要ê信息。Koh講,猶大ê事件,mā teh說明每一個人對性命ê延續lóng負有責任,逃避,kan-taⁿ會帶來koh khah大ê性命負擔。

另外一方面,創世記第十九章記載羅得kah伊ê cha-bó͘-kiáⁿ發生亂倫ê事件,tī chia是看tio̍h猶大kah家己ê新婦發生亂倫行為,這lóng tī說明一個事實:無一個民族ê血緣是「純潔」ê,因此,用「民族淨化」作藉口,進行種族歧視á是殺戮是真荒謬ê舉動。Chit點tī當今世界koh khah值得政治人物、軍事強人省思,ná親像耶穌所講ê:「遵照上帝旨意ê 人就是我ê 兄弟、姊妹kah 老母(全民版)」(馬可福音三:35)chit句話chiah是上帝所期待看tio̍h ê人類社會。

Chit件猶大kah新婦她瑪亂倫事件ê背景,kah申命記第廿五章5到10節摩西法律ê規定有真重要ê關係,而且為摩西chit條「利未拉特婚姻條例」作了真好ê詮釋。

第1到2節,「猶大離開伊ê眾兄弟」,chit句話mā說明chit份資料是比較晚期ê作品。因為猶大就是雅各後裔ê領導者。Á chit句「遇tio̍h迦南人書亞ê cha-bó͘-kiáⁿ,就kah伊結婚」是一記暗筆,除了說明猶大kah迦南人之間關係親密外,伊mā做以前伊ê阿公以撒kah阿媽利百加看做討厭ê事,就是kah迦南cha-bó͘-gín-á通婚(參考廿六:34—35、廿七:46、廿八:1、8)。因為bē記得祖先ê叮嚀,chiah會有後來亂倫ê事件發生。

第3到5節,chit三節是一份簡短ê族譜,說明猶大三個kiáⁿ ê名包括有「珥」、「俄南」,kah「示拉」,m̄-koh最後只有示拉活teh。

第6到11節,猶大kā珥娶bó͘, 她ê名叫「她瑪」,chit-ê名有「豎立」、「棕樹」ê意思。Chia並無說明「珥」到底做甚麼事得罪上帝,致使「上主就取伊ê性命」,照聖經作者時常表達ê方式,就是離棄上帝,去拜偶像,chit種人是上帝所厭棄ê對象。

第8節回應了申命記第廿五章5到10節ê摩西律法「利未拉特婚姻條例」ê規定。猶大ài俄南娶阿嫂她瑪做bó͘,並且強調這是「義務」,為tio̍h是beh替「兄哥傳後」。

第9節,thang看出俄南並無想beh遵守律法ê規定,原因是無想beh hō͘兄哥珥有後代,án-ne,伊就ē-tàng繼承兄哥ê產業。這是貪婪。貪婪等於「拜偶像」(參考以弗所冊五:5,歌羅西書三:5)。上帝看俄南chit種意念kah行為是邪惡ê,因此mā取伊ê性命(第10節)。

第11節,猶大生三個kiáⁿ,前兩個lóng死去,原因lóng kah上帝ê懲罰有關係。Chhun落來這siōng小ê「示拉」,chia並無說明伊ê年紀,只有猶大向她瑪表示, ài她先tńg去後頭厝等,因為示拉iáu軟chiáⁿ,等伊長大「成人」後就會叫她瑪tńg來。M̄-koh作者tī chia特別註明,事實上是因為猶大驚示拉也kah兩個兄哥「仝款死去」。她瑪聽ta-koaⁿ ê話tńg來後頭厝。



重新查詢 專卷研經 創世記系列
錯誤回報,請聯繫