創世記 34章1節 到 34章12節   背景資料  上一筆  下一筆
Chit章是由「祭司文獻」kah「耶和華文獻」ê資料混合編輯而成。「祭司文獻」包括有第1到2節a句、第4節、第6節、第8到10節、第13到18節、第20到25節、第27到29節。其餘ê lóng是「耶和華文獻」ê資料。

Chit章ê編輯真特別,因為kah前後文lóng互相無符合。Ē-sái講是,chit章卻講出相當重要ê內涵,至少它講出幾個重要ê信息:

一是後來雅各臨死前,kā大kiáⁿ ê名份由原本ê呂便,改做由第四個kiáⁿ猶大傳承ê原因(參考四十九:8-12)。原因是大kiáⁿ呂便因為kah雅各ê細姨辟拉睏(參考三十五:22),á第二kiáⁿ西緬kah第三kiáⁿ利未,則是chit-pái大屠殺ê主謀者。因為án-ne,chit章有意交帶猶大繼承大kiáⁿ名位ê歷史背景。

二是原本是kah上帝立性命ê約ê割禮記號,tī雅各ê gín-á手中,已經變成血腥屠殺ê手段,偏離了kah上帝立割禮之約ê記號ê神聖意義。

三是底拿所代表ê是一個非常弱小ê族群,因為被外族人欺負、污穢à。伊ê眾兄哥派人出來保護,討tńg來公道。M̄-koh,手段比底拿被姦污ê事koh khah殘酷。

四是作者有意透過chit-ê事件說明雅各ê kiáⁿ孫以色列人民,為甚麼會kah迦南人以及tī迦南地ê原住民有非常大ê敵意。

五是整篇記事mā說明一個基本信仰認知:罪kah罰,是相連做伙,無法度分開ê。

Tī雅各ê子女中,可能iáu有其他ê cha-bó͘-kiáⁿ,m̄-koh因為cha-bó͘-gín-áTī聖經時代ê地位甚低,通常lóng bē被記名落來。底拿ê名會hō͘記落來,就是beh說明雅各ê 眾kiáⁿ犯罪ê事。

第1到4節,tī第三十三章13節講雅各ê子女iáu真細漢,chit-má soah講底拿已經長大,thang外出訪問朋友。

示劍城ê酋長是「希未人哈抹」,伊ê kiáⁿ名叫「示劍」。Tùi chia thang看出舊約聖經中,有bē少名teh代表個人,mā同時teh代表城鎮、民族。這「示劍」名就是真好ê例,是teh代表哈抹ê kiáⁿ,mā teh代表chit座城,同時代表tio̍h「示劍」族人。

示劍看見底拿súi,就kā她「姦污」,這mā表示有權勢ê人欺負出外、寄居ê人。作者mā用chit種方式teh說明迦南人淫亂ê行踏。後來示劍想beh娶底拿做bó͘,真可能是因為驚雅各ê家族報復。因為雅各有能力用「一百塊銀á」買土地,mā teh表示雅各是一個有能力ê人,伊ê家族龐大。因為án-ne,聯婚ē-tàng排除兩者之間ê仇恨,mā thang因為án-ne親密結連做伙,另外一點,示劍想藉這壯大家己ê實力。

第5到7節,雅各知影chit件事,不吭聲,原因是伊ê kiáⁿ無tī厝裡,勢弱。等伊ê kiáⁿ lóng tńg來了,mā知影chit件事後,眾kiáⁿ大動肝火,認為底拿被姦污,是一件家族被「侮辱」ê大事。

第8到10節,tùi強暴到愛上底拿,hō͘哈抹用城主ê地位,親自去向雅各提親。哈抹提出ê要件,m̄-nā是in-tau裡ê親事,伊甚至允准hō͘兩個家族通婚,而且提出特別好ê貿易協商,thang自由買賣,購屋置產,隨意chhōe所在tòa等,chiah-ê lóng teh說明雅各ê家族kah示劍城ê居民,thang合做一個。

第11到12節,chit兩節說明m̄-nā是城主哈抹顯示出誠意,連示劍家己mā親自表明siōng大ê 誠意,只要允准伊娶底拿做bó͘,雅各家所提出ê任何條件,伊lóng會答應。


重新查詢 專卷研經 創世記系列
錯誤回報,請聯繫