創世記 33章1節 到 33章11節   背景資料  上一筆  下一筆
Tī長到十二章有關雅各ê篇幅中,以第三十三章siōng ē-tàng看出以掃ê特性,kah雅各心中不安ê實況。Mā因為有chit章,對以掃ê瞭解有真大ê無仝;伊m̄-nā是一個bē記得仇恨ê人,而且是一個心胸相當廣闊ê兄哥。Ē-sái講是為甚麼上帝無揀選伊做族長,卻是選雅各?這是一個好問題,卻無人ē-tàng回答chit種問題。因為揀選ê主權是tī上帝。

第三十三章1到17節lóng是屬tī「耶和華文獻」ê資料,後頭第18到20節則「以羅伊文獻」ê資料。Chit章主要是由兩個情節來構成:一是第1到11節,兩兄弟相會面。二是第12到20節,兩兄弟分別順續tńg去厝裡。

Chit段經文繼續描述雅各對以掃是「心懷戒懼」,mā充滿tio̍h矛盾;伊一方面表現出真有「悔意」ê款,連續「七pái坦覆 (thán-phak)tī土腳」,hō͘伊ê兄哥以掃看tio̍h伊ê真誠,並且準備豐厚禮物做見面禮,希望ē-tàng因為án-ne得tio̍h兄哥以掃ê「赦免」。M̄-koh另外一方面,伊mā做完整防範ê準備,尤其是安排伊kah拉結、利亞生ê gín-á tī後壁,然後家己chhōa兩個細姨kah in所生ê gín-á行tī頭前。這明顯ê就是一種預防意外發生。

第1到4節,kā chit段續接tī第三十二章8節後面,讀起來會koh khah順暢。雅各kā gín-á分別由四個妻細姨帶tio̍h,然後細姨kah細姨所生ê kiáⁿ行tī頭前,續落來是利亞kah伊ê kiáⁿ,最後是拉結kah約瑟。Chit種隊伍真清楚,伊愛拉結kah約瑟贏過其他ê kiáⁿ kah妻細姨。萬一發生意外,siōng後面ê thang有koh khah充裕ê時間逃走。

雅各家己行tī siōng頭前,這mā表現出伊是一個大家長,有保護家族安全ê必要。

雅各看見以掃ê時chūn,伊ê第一個反應是「連連七pái坦覆 (thán-phak)tī土腳」,chit種方式表明伊尊敬以掃乃是當家主管、老大。Kah本來雅各騙取大kiáⁿ名份ê動作koh有完全無仝ê含意。雅各會有hiah-ni̍h大ê動作,lóng只有一個原因,希望ē-tàng因為án-ne得tio̍h以掃ê赦免。

第5到7節,可能是頭前hiah-ê進貢ê隊伍奏效,m̄-koh khah有可能是雅各chiah-ê卑微到極點ê動作感化了以掃本來忿怒ê心。以掃一看見雅各,隨時就「走來迎接伊,攬伊,kah伊chim嘴」,然後「兩人lóng哭了」。Chiah-ê動作lóng是當時中東地帶熱情歡迎親友ê一種方式,表示以掃已經kā過去所有ê怨恨lóng放棄了,伊真正原諒bat傷害過伊ê小弟雅各。

就án-ne伊問雅各身邊ê cha-bó͘人kah眾細kiáⁿ是甚麼人?雅各ê chit句「chiah-ê gín-á是上帝恩賜hō͘我ê」,mā說明性命tùi上帝來賞賜。Gín-á多,表示上帝賜福大。一方面teh向以掃表示:若是無上帝看顧、保守,伊無可能有chit種能力。續落來,伊一一紹介妻細姨kah kiáⁿ hō͘以掃認bat。

第8到9節,以掃詢問chìn前hiah-ê奴僕所帶領ê隊伍是作甚麼ê?mā就是第三十二章13到15節所提起ê hi̍t五百五十隻家畜動物,非常豐厚ê見面禮,hō͘以掃mā見識到雅各確實是有上帝賜福,力量絕對無法度看輕。

以掃ê「我甚麼lóng有」chit句話,tú好mā說明in老父以撒雖然無賜福伊,甚至用接近「詛咒」ê內容回應伊ê請求。M̄-koh上帝iáu是看顧伊,賜福hō͘伊,若無伊無可能有「四百人」kah跟tòe。伊向雅各懇辭chiah-ê豐厚ê見面禮。

第10到11節,雅各堅持ài伊兄哥以掃kā禮物收落來。因為chit批禮物實在是太豐厚leh,若以掃收落來,差不多每工lóng會看tio̍h chiah-ê家畜動物,而且iáu會繼續繁衍落去,án-ne,以掃就bē想起beh報復ê念頭。這mā是雅各聰明ê所在。伊tī拉班ê厝經歷二十年,深知培育羊群ê技巧。因為án-ne,若是以掃無beh kā伊打擾,而且ē-tàng以kah伊相安無事,伊就ē-tàng tī安定生活幾年後,koh重新繁殖koh khah chē羊、牛、驢等。

重新查詢 專卷研經 創世記系列
錯誤回報,請聯繫