創世記 20章1節 到 20章7節   背景資料  上一筆  下一筆
「基拉耳」,這是設tī非利士人ê境內,大概就在地中海岸邊ê迦薩城kah別示巴之間。這附近地區ê人對亞伯拉罕並無生份,因為tī第十二章9節、第十三章1節等等lóng有提起亞伯拉罕行到「迦南南部」ê所在。

第2節,chit節是為tio̍h第3到13節之間ê對話chhōe切入口。亞伯拉罕會kā家己ê bó͘講做小妹,其實這mā是早期游牧民族來到一個新ê所在,保護家己家族成員ê一種方式,mā m̄是每pái lóng需要án-ne,卻是tú-tio̍h地主á是強勢者出現時,普遍採用ê一種方法。

第3到5節,chit段經文說明亞比米勒並m̄是故意,á是tùi亞伯拉罕手中強奪伊bó͘撒拉。Koh講,chia講上帝tī「夢」中出現對亞比米勒講話,這tú好是「以」典資料ê特色,說明上帝會透過天使、夢、異象等向人啟示祂ê旨意。Á無親像「耶」典上帝是直接kah人面對面講話。

亞比米勒真清楚向上帝表明家己ê「無辜」,mā同時確信上帝絕對bē hō͘無辜ê受tio̍h懲罰。

第6到7節,上帝是無所不知ê神,祂當然清楚甚麼人是有意á是無辜。上帝回應亞比米勒ê擔憂,mā hō͘伊知影上帝確實知影伊是無辜ê,因為án-ne chiah出現阻止chit件事。

第7節是真特別ê一節,mā是第一pái提起亞伯拉罕是「先知」,mā說明先知會替上帝ê子民祈禱(參考耶利米書七:16、十一:14、十四:11、三十七:3)。上帝嚴厲警告亞比米勒一定tio̍h隨時kā撒拉還hō͘亞伯拉罕,若無,會帶來嚴重ê後果。


重新查詢 專卷研經 創世記系列
錯誤回報,請聯繫