創世記 16章1節 到 16章4節   背景資料  上一筆  下一筆
第十六章則由古老ê「耶和華文獻」、稍晚ê「以羅伊文獻」,kah「祭司文獻」合編而成。其中「祭司」ê資料只出現 tī第1、3、15到16節,á「以」典ê資料mā kan-taⁿ出現 tī第9、10兩節,其餘lóng是「耶」典ê文獻。

創世記chit本經典其實mā是一本講以色列chit-ê家族發展ê一本經典。Tùi第十六章開始,真具體講tio̍h chit-ê家族裡所發生ê各種人、事ê問題。親像有亞伯蘭kah 伊ê bó͘撒拉ê問題;有以撒kah伊ê gín-á以掃、雅各ê事;有雅各kah十二個gín-á之間ê互動關係,以及這十二個gín-á彼此之間互動所延伸出來ê問題。Mā有撒拉kah夏甲 ê糾紛,有利百加kah家己所疼ê kiáⁿ雅各之間發生ê問題。串連其中ê是利亞kah拉結兩位姊妹之間爭奪丈夫之戰。作者用chit種材料構成以色列十二支族間ê關係,同時用上帝立「性命ê約」來說明上帝ê揀選,kah祂拯救工作ê信仰意義。

續落去tī十五章了後,chit章說明亞伯蘭ê信心出了狀況。雖然上帝有應允,而且mā真清楚kā伊講,只有伊親生ê kiáⁿchiah是伊真正繼承人(參考十五:4b)。M̄-koh,無kiáⁿ續接產業,á是家族性命,tī當時ê社會乃是一件大事。因為án-ne,亞伯蘭ê bó͘撒拉對伊獻計,hō͘婢女夏甲來kah亞伯蘭同房,thang延續下一代ê性命。撒拉chit種作法,mā同時teh表明伊對上帝ê應允並無信心,á亞伯蘭會接受撒拉ê獻計,mā說明伊對上帝hō͘伊ê應允,無堅定ê信心。人用家己ê方式,取代上帝ê應允,結果kan-taⁿ會為家己帶來koh khah chē ê煩惱而已。

Chit段經文說明撒拉並無因為hō͘夏甲 kah亞伯蘭同房á hō͘家己ê計謀成功來歡喜,顛倒,卻為家己帶來koh khah大ê困擾,因為家己無法度有娠soah hō͘夏甲看bē起她。早期東方社會對cha-bó͘人hō͘ in ê評價,是看她是m̄是ē-tàng有娠生kiáⁿ來決定,一個cha-bó͘人ē-tàng有娠生kiáⁿ,chiah有存在ê價值。


重新查詢 專卷研經 創世記系列
錯誤回報,請聯繫