以西結書 7章15節 到 7章27節   背景資料  上一筆  下一筆
Chit段經文講述當敵人來攻擊ê時,發生tī耶路撒冷城內ê景象,是悲慘ê,因為in過去所膜拜、尊崇為神ê偶像神明,teh發生危機ê時,是連一點路用mā無。因為無任何力量ē-tàng抵抗上帝決定ê懲罰。Ná親像頭前經文一再提起ê「終局」來到仝款,上帝決定beh án-ne做,因為只有án-ne chiah hō͘猶大人民確實知影甚麼人是真正神。

第15節,chit節koh一pái看tio̍h「戰爭」、「瘟疫饑荒」,chiah-ê lóng是上帝用來懲罰祂ê子民ê方法。Tī第14節講無人出去相戰,後來逼得一定tio̍h phah開城門出去迎戰ê時,mā是仝款,一點功用mā無,因為出門去相戰ê人,lóng會「死tī刀下」,而城內ê人並無比較khah好字運,因為有瘟疫致使「病死」,因缺糧嚴重而活活「餓死」。

第16到20節,描述面臨chit種重大災禍來臨ê時,hiah-ê人反應出來ê跡象,包括有ná親像受tio̍h驚惶ê粉鳥;腳手lóng發軟無力;穿麻衣為死去ê親人哀傷;剃光頭表示tú-tio̍h侮辱;原本看做貴重而且窮畢生之力teh追求ê金銀財寶mā會棄sak扔tī街路任人去拾,因為擁有chiah-ê無法度解決iau餓,況而且chiah-ê金銀珠寶是誘惑in棄sak上帝chiah致使taⁿ ê結果。先知以西結用chit種方式teh描述:當人棄sak上帝,去拜偶像神明ê時,過去擁有ê一切榮華富貴lóng會變成相對ê結果,就是一貧如洗,而且是見笑到極點。 

第21到22節,上帝懲罰以色列子民ê方式,就是hō͘「外國人搶奪in」,洗劫in所有ê一切貴重物件,甚至上帝mā會允准chiah-ê敵人進入原本用來敬拜上帝ê神聖聖殿,因為tī敵人尚且無進入耶路撒冷前,上帝ê子民猶大人民,已經tī聖殿內置放偶像神明teh崇拜了,in已經比敵人koh khah早就侮辱了上帝ê神聖à。因為án-ne,hō͘敵人進入玷污聖殿,mā等於是teh玷污hiah-ê置khǹg tī聖殿中ê偶像神明。

第23到24節,上帝hō͘「siōng凶惡ê民族」(指巴比倫人ê強猛,kah暴力之重非常厲害)進入城內,進行殘暴ê行為,連猶大人民看做「siōng強猛ê勇士」,(這是teh指過去專門teh欺負家己人民ê hiah-ê有權勢ê人),見tio̍h chiah-ê外族人來入侵,mā會失去「勇氣」,因為in kan-taⁿ會欺負家己弱小ê同胞,遇tio̍h強敵入侵是lóng無能力去抵抗。

第25節,「絕望ê時chūn到à」,這是kah頭前所講ê「終局」仝款ê意思。

「chhōe求和平」,表示想用金錢換取敵人撤軍,已經無可能。Chia「和平」一詞,表示「平安」ê意思。

第26節,提起「先知」、「祭司」、「長老」等,chiah-ê lóng是當時以色列民族ê社會菁英、領袖。In應該是維護社會安定kah導正社會秩序ê領導者,m̄-koh in並無án-ne,顛倒ê,ná親像耶利米書第二章8節所提起ê,先知kah祭司lóng bē記得上帝,這就thang看出問題ê嚴重性。因為án-ne,「災難接踵而來;pháiⁿ消息接連不斷來傳過來」,其實是一點mā不足為奇。

第27節,講出上帝是報應ê神,以色列社會中強勢者怎樣欺負弱勢者,上帝mā kā用in欺負人ê方式回報in。

重新查詢 專卷研經 以西結書系列
錯誤回報,請聯繫