Chit段經文君王怎樣參與獻祭禮儀，kah tio̍h注意ê事項。Á tùi第18節開始一直到第四十六章24節，chit段經文所記載ê內容有bē少kah摩西律法ê規定有差別，lóng是關係領袖、君王tī祭祀禮儀上應該有ê責任。

第18到20節，tī第18節提起「正月初一」是「潔淨聖殿」ê節期。這tī利未記第十六章有真詳細ê描述，he是屬tī贖罪日。而且時間是tī每年七月初十。祭司ài kā「贖罪祭ê血」分別「抹tī聖殿ê門柱、祭壇ê四角，kah進入內院大門ê門柱上」，chiah-ê表明潔淨ê意思。續落來是正月「初七日」ê獻祭，仝款是獻贖罪祭。因為人常常tī「無意中á是因無知而犯罪」。Án-ne看起來，tī七工之內，就beh獻兩pái贖罪祭，mā是潔淨聖殿ê祭。

第21到22節，「正月十四日開始，你tio̍h守Pôaⁿ過節七工」，這是摩西律法嚴格規定ê節期，mā是以色列民族siōng重要ê節期。Tī這七工之內lóng tio̍h食「無酵ê餅」。因為是siōng重要ê節期，因為án-ne，君王tī第一工tio̍h代表kui個民族獻祭，需「獻一頭公牛做贖罪祭」。

第23到24節，tī chit七工中間「tio̍h ta̍k工向上主獻七頭無殘缺ê公牛kah七隻公綿羊做燒化祭」，另外iáu koh khah「獻一隻公山羊做贖罪祭」，teh獻上chiah-ê公牛、公綿羊等cheng-seⁿ ê時，mā tio̍h同時搭配「十七公升半ê素祭，三公升ê橄欖油同齊獻上」，這mā說明只有君王、領袖chiah有chit種能力，因為伊ê財富來自人民ê稅賦，因為án-ne，伊所獻ê祭lóng是代表全體人民。

第25節，chia談起「Tòa棚節」，這mā是重大節期之一。時間是tùi「七月十五日開始ê七工期間」。而且這七工中間是「ta̍k工獻贖罪祭、燒化祭、素祭，kah橄欖油」，kah頭前Pôaⁿ過節ê獻祭仝款。