Chit段經文真清楚講tio̍h耶路撒冷淪陷à。先知以西結傳達上帝hō͘伊ê信息hō͘猶大人民知影。Tī chit段信息中mā凸顯了一個重要問題：甚麼人chiah是上帝真正子民？是hiah-ê無hông擄去做奴隸ê？á是hiah-ê受掠ê人mā是？m̄-koh真正ê問題並m̄是tī甚麼人受掠，卻是有無聽從上帝ê僕人先知傳達ê信息，án-ne chiah是真正ê問題所在。就算hiah-ê kah先知以西結仝款被掠到巴比倫ê人，mā無想beh聽，koh khah免講留tī故鄉耶路撒冷ê猶大人民mā仝款，大家就算聽，mā無動tī衷。

第21節，chia講時間是tī「流亡ê第十二年十月初五日」，這是主前585年1月8日。

「有一個tùi耶路撒冷逃出ê難民」，chit-ê人對先知以西結講「耶路撒冷城已經陷落了」，chit-ê逃走出來ê人算是好字運ê，因為當時以東人bat堵tī城門口協助巴比倫軍隊掠人、刣人（參考俄巴底亞書第14節）。Chit-ê消息對受掠tī巴比倫ê猶大人民ē-sái講是非常大ê震撼，m̄-koh對先知以西結來講並m̄是新鮮事，因為早tī以前，上帝已經啟示伊，hō͘伊知影巴比倫軍隊圍困耶路撒冷城ê事（參考以西結書廿四：1—2）。

第22節，tī chiah-ê逃難出來向伊報告chit-ê消息ê人來ê「前一晚」，先知以西結koh一pái得tio̍h「上主ê靈臨到」伊ê身上，並且「恢復」了伊「講話ê能力」，因為chìn前上帝hō͘伊失去講話ê能力（參考廿四：27）。現在上帝beh先知以西結傳出信息hō͘猶大人民。

第23到24節，「以色列境內hiah-ê荒城ê居民」，這是teh指hiah-ê無被掠到巴比倫去，留落來ê hiah-ê「siōng窮苦ê人」（參考列王記下廿四：14、廿五：12）。Chiah-ê留落來ê人就認為in「應該得chit塊土地」，意思是in想beh佔有hông擄去ê人所留落來ê土地產業。Chit種態度早tī上帝對先知以西結ê啟示中就有提過（參考以西結書十一：14—15）。看起來in原本是弱勢ê一陣，現在卻反tńg變成強勢一陣。其實，in無hông擄去巴比倫做奴隸，並m̄是因為in比較khah潔淨、忠實tī上帝，卻是因為in比較khah衰弱無做奴隸ê生產能力。現在in m̄-nā無憐憫hiah-ê受掠ê人ê心，koh khah無因為親友受掠而哀傷，反卻是心中沾沾自喜，認為ē-tàng藉這佔領荒廢落來ê土地。

第25到26節，先知以西結tùi上帝得tio̍h啟示，回應chit群想beh佔有別人產業ê人ê話，一一地指出in ê罪狀包括有：「食帶血ê肉」，這是摩西律法所嚴格禁止ê事（參考利未記三：17、七：26—27、十七：10）；「拜偶像」，這koh khah嚴重，因為這是所有罪中siōng嚴重ê一件，mā是十誡第一到二誡ê禁令；「刣人」，這是違背第六誡ê誡命；「做hō͘人憎惡ê事」，kah拜偶ná親像仝款ê行為；「ta̍k個姦污厝邊ê bó͘」，這是teh指in被巴比倫佔領後，大部分ê cha-po͘人lóng被掠到巴比倫去做奴隸，留落來ê chiah-ê人並無好好á彼此互相照應，卻姦污了hiah-ê失去丈夫ê婦女。Á這mā是犯第七條誡命。以上chiah-ê lóng是嚴重敗壞ê行踏，而且lóng是違背摩西律法ê行為，「憑甚麼iáu敢講chit塊土地」是in ê？這是先知以西結提出ê質疑地。

第27到29節，chit段是上帝做出ê審判。包括有：

一是tī城內ê會「死tī刀下」，這是teh指戰爭中死亡。

二是「野外ê」會「被野獸食掉」，這表示饑荒嚴重，餓死mā無人埋葬。

三是「bih tī山頂á是洞穴裡ê人會病死」，這是teh指瘟疫會肆虐猖獗，死亡iáu-koh會繼續落去，而且是嚴重。

因為上帝beh「徹底荒廢」kui個迦南地，因為土地ê荒廢，mā就「無人會經過」該地，這是因為上帝「懲罰」所帶來ê結果。

第30到33節，chit段經文講出猶大人民lóng知影先知以西結是上帝ê僕人，是真正先知。In「聚集做伙ê時lóng tī談論」tio̍h先知以西結ê事，m̄-koh「in聽，卻無實行」，而且是「一句mā不實行」，然後kā先知以西結所傳達ê信息「當耳á邊風」，這kah先知耶利米所tú-tio̍h ê情況仝款（參考耶利米書二十：8b）。其實，in會有今á日chit種落場，就是因為無kā上帝ê信息當做一回事。Tī in眼中，先知以西結只不過像是一個娛樂別人ê「歌手」，而且是「kan-taⁿ會唱唱情歌、彈彈豎琴」ê藝人而已。

這kah耶穌teh譴責當時ê猶太人領袖是仝款ê，in「kan-taⁿ會講，bē做」（參考馬太福音廿三：3）。耶穌勉勵祂ê眾門徒，ài kā聽tio̍h伊ê話而去實行，chiah會像kā厝起tī石磐頂，永遠堅固、bē搖動；若是聽m̄去實行，就ná同kā厝起tī沙土上仝款脆弱（參考馬太福音七：24—27）。

第33節，上帝koh一pái對先知以西結保證ài伊去傳ê信息，「一定會實現」，到ê時猶大ê以色列人民就會知影in「bat有一位先知tī in中間」，m̄-koh為ê時已晚。