以西結書 32章17節 到 32章32節   背景資料  上一筆  下一筆
Chit段是關係上帝論到懲罰埃及ê最後一段。Tī chit段經文中記載,埃及會hō͘落去到「陰間」,這ná親像頭前所敘述ê泰爾仝款,會被關tī黃泉(參考廿六:20)。而且m̄-nā是埃及而已,連同過去kah它仝伴作惡、享福ê國家mā無法度佳哉免得。

Tī chit段經文中一再重複ê詞句是:「倒tī陰間」、「未受割禮」、「被刀劍刣死ê人」、「bat hō͘人驚惶戰慄」等,chiah-ê用詞主要teh表明,上帝ê審判一到,無論過去有jōa-chē榮華富貴kah權勢,落場lóng會跟hiah-ê邪惡ê人仝款。

第17節,chia提起上帝hō͘先知以西結信息ê時間是tī「流亡ê第十二年正月十五日」,m̄-koh tī希伯來文並無「正月」chit個月份時間,m̄-koh,有兩種觀點,一種根據中世紀猶太聖經學者ê註釋,認為是「十二月」,若是án-ne,時間就是主前586年4月13日到主前585年4月1日之間。另外一種是根據《七十人譯本》用「正月」,包括「耶路撒冷」版本、《現代中文》等,lóng是採用《七十人譯本》ê資料。Án-ne,就是主前586年4月27日。

第18到19節,這是另外一種輓歌ê方式,用「哀號」ê方式表達。M̄-koh重點lóng是teh說明埃及人民kah「其他強國同齊推入陰間」,kah hiah-ê「不虔不敬」做伙,表示埃及人無koh有甚麼了不起,in mā是別人看bē起ê對象。

第20到21節,chia所講ê「siōng英勇ê戰士kah埃及ê盟友」,是teh指過去kah埃及仝伴ê人。舊約聖經時代,英勇ê戰士tī社會上地位siōng koân,lóng受尊崇。M̄-koh現在chiah-ê lóng kā失去意義,因為in kah埃及人仝款同在陰間痛苦ê深淵中。Á「盟友」,就是參與做邪惡ê tāi-chì ê人,in mā無法度逃脫免除陰間之懲罰。

第22到23節,chia提起「亞述」,意思是teh指主前612年被巴比倫帝國消滅ê亞述,情形kah埃及teh beh面對ê懲罰仝款。過去「in活teh ê時chūn bat hō͘人驚惶戰慄」,現在上帝用埃及人對別人所做ê方法來報應in。

第24到25節,「以攔」,這是聖經時代ê一個國家,tī底格里斯河ê東邊。後來被波斯併吞,成做波斯ê冬季首都,目前mā是tī伊朗境內。仝款ê,in過去所做ê,taⁿ mā仝款受tio̍h報應,「倒tī陣亡ê人中間」落去到陰間「受別人侮辱」,kah hiah-ê「未受割禮」ê人同在同齊。原因是in mā「bat hō͘人驚惶戰慄」。

第26到27節,「米設kah土巴」,mā就是tī小亞細亞ê「弗呂家kah基利家」。In bat是泰爾ê貿易伙伴,過去是奴隸販賣ê中心,mā是銅器製造ê大城(參考廿七:13)。In仝款mā是tī上帝審判下,受懲罰落去到陰間去。Chiah-ê古代社會英勇戰士本來應該享受ê尊崇,tī上帝審判ê結果lóng是「倒tī陰間」。理由是過去in bat「hō͘人驚惶戰慄」。Taⁿ in受tio̍h懲罰,換in tī陰間戰慄驚惶。

第28節,「埃及會照樣被粉碎」,chit句話講出了埃及並無比頭前敘述過ê國家好jōa-chē,lóng是仝款悲慘地被落去到陰間。

第29節,chit節提起「以東」,in原本是以色列人民ê親人,m̄-koh因為mā參與掠奪猶大,因為án-ne,上帝mā會懲罰,hō͘伊「倒tī陰間」。

第30節,「所有北方ê首領」,lóng因in過去ê「權勢bat hō͘人驚惶戰慄」,現在mā lóng kah hiah-ê in眼中無甚麼水準ê「未受割禮、被刀劍刣死ê人同齊到陰間受辱,倒tī hia」,無甚麼差別。

第31節,chit節需要特別注意,因為chit節忽然講tio̍h「埃及王kah伊ê軍隊會因為看見chiah-ê tī刀下喪生ê人ê遭遇而得tio̍h安慰」,其實,這是teh指當時先知以西結是tī巴比倫ê奴隸營區,伊無指出巴比倫帝國有一工ê遭遇mā kā kah埃及仝款。其實,先知以西結是beh傳達chit-ê信息hō͘伊同受苦難ê同胞,beh hō͘ in知影有一工巴比倫ê遭遇會kah埃及仝款,當埃及王kah伊ê軍隊看tio̍h巴比倫王kah伊ê軍隊mā仝款來到陰間,就會「得tio̍h安慰」,因為摧毀in ê劊子手mā受tio̍h懲罰à。

第32節,chit節是chit段經文ê結語,表明ê是性命ê主權是tī上帝手中。人一定tio̍h真慎重tī土腳過日子,m̄-thang有欺負別人ê念頭á是行為。因為上帝會報應、懲罰。無論人擁有甚麼權勢、力量,lóng是仝款。

重新查詢 專卷研經 以西結書系列
錯誤回報,請聯繫