以西結書 3章16節 到 3章27節   背景資料  上一筆  下一筆
以西結書一再提起上帝ê僕人真重要ê工作之一,就是成做國家、民族ê「守望者」,這守望者ê主要工作,就是beh提醒家己ê同胞、國家,是m̄是有危險來侵犯。Tī本冊ê第三十三章1到9節有真清楚說明守望者ê角色kah使命。

Chit段經文mā說明先知以西結koh一pái hō͘上帝ê靈充滿了後ê現象,就是先知以西結第二個身軀語言ê動作,伊kā家己關tī厝宅裡,上帝beh hō͘伊成做啞口,無法度講任何信息,直到上帝重新開啟伊ê嘴巴,伊chiah ē-tàng繼續傳達上帝beh伊講ê話。

第16到17節,chia講經過了「七工以後」,表示經過了一段含有上帝特殊旨意ê時間了後。上帝派先知以西結「做以色列國ê守望者」,這是心靈ê守望者,替上帝看守祂ê子民,kā上帝ê話語傳達hō͘被揀選ê子民,hō͘ in時刻注意是m̄是有違背上帝ê旨意(參考耶利米書六:17),先知哈巴谷mā是án-ne(參考哈巴谷書二:1)。

第18到19節,chit兩節是相對句型,thang參考以西結書第三十三章1到9節。

「邪惡ê人」chit-ê詞tī聖經內面通常是teh指棄sak上帝而拜偶像為神ê人,特別是teh指上帝子民去做chit種事,是上帝所無法度容忍ê事。上帝beh先知以西結去勸勉in「改邪歸正」,悔改歸向上帝。如果先知以西結確實是傳講,án-ne伊確實是盡到守望者之責任者,bē受tio̍h上帝ê懲罰。M̄-koh若以色列人民不聽從上帝ê話,「iáu-koh作惡」,in就beh「因家己ê罪」受罰「死亡」。

第20到21節,chit兩節mā是相對句型。

Chia所謂「好人」,意思是teh指有照上帝ê話去行ê人,若是「開始作惡」,chit種人必定會「tú-tio̍h危險」,被誘惑而失迷性命ê方向。先知以西結tio̍h親像一個守望者仝款,去警告伊,若無,「伊一定會死」。Á上帝mā「不記念伊做過ê好事」若是守望者無去警告,上帝beh向伊「追究責任」。因為伊ê疏忽á是怠慢應該盡ê責任。相對ê,若是守望者確實做到à伊該做ê事,「警告」chiah-ê原本是「好人」ê人,hō͘ in因為「接受」聽tio̍h ê「警告」而知影悔改「無koh犯罪」,án-ne,這「好人」kah守望者lóng會「活teh」,ē-tàng「bē死」。

第22到24節,chia講上帝「能力大大地充滿」tī先知以西結身上,然後伊聽tio̍h上帝beh伊到「山谷」去,tī hia會聽tio̍h上帝ê聲音。結果伊看見ê是kah chìn前tī「迦巴魯河邊」ê提勒亞筆(參考第15節)仝款,lóng是「看tio̍h上主ê榮耀」,這榮耀hō͘先知以西結只有「坦覆 (thán-phak)tī土腳」,m̄敢看tio̍h上帝ê面。Chit pái上帝beh先知以西結kā「家己關tī厝宅裡」,這是繼第三章2到3節記載上帝beh伊食下一書卷了後ê第二個奇特動作。
第25到26節,當先知以西結kā家己關tī厝宅裡ê時chūn,上帝講「人tio̍h用索á」kā伊「捆起來」,而這除了先知以西結外,並無其他ê人tī chia。Chit時上帝ē-sái先知以西結「變成啞口」,無法度去「警告chiah-ê叛逆ê人民」,án-ne in就無法度聽tio̍h上帝ê信息。

Kā chit兩節合併來看,thang講當先知以西結想beh傳達上帝ê信息ê時,當時ê人kā伊禁錮起來,m̄准伊tī公共場合傳揚上帝ê信息,m̄-nā án-ne,iáu限制伊只有ē-tàng tī厝內,ná親像kā伊軟禁仝款,m̄准伊kah外界ê人接觸,án-ne,伊就ná同啞口一般,無法度傳出任何信息。

第27節,「後來」,上帝koh一pái開啟先知以西結ê口,hō͘伊「恢復」講話ê能力,伊就會kā上帝ê信息傳達出去。M̄-koh結果是「有ê肯聽,有ê m̄肯聽」

重新查詢 專卷研經 以西結書系列
錯誤回報,請聯繫