以西結書 24章1節 到 24章14節   背景資料  上一筆  下一筆
Chit章真重要,因為chit章是先知以西結受上帝呼召後,tú-tio̍h siōng嚴重ê衝擊,就是耶路撒冷城被圍困到hit-ê城被攻破,猶大國滅亡。特別ê是當先知以西結摯愛ê bó͘忽然猝死,卻bē-tàng為bó͘舉哀,chit種心靈ê痛苦、難堪,hō͘伊無法度言語。

頭前一再提起猶大人民所犯ê罪狀,現在則明確地指出chiah-ê罪kā為in帶來ê嚴厲懲罰,上帝親自揀選巴比倫皇帝尼布甲尼撒當做僕人(參考耶利米書廿五:9),帶兵來圍困耶路撒冷城。

第1到2節,chia清楚記落來巴比倫軍隊圍城ê時間是tī「流亡ê第九年十月初十日」,這tú好是主前588年正月15日。上帝beh先知以西結「記落來今á日這日子」,因為這是苦難ê開始,是「巴比倫王開始圍攻耶路撒冷」ê日子。

這日期在列王紀下第廿五章1到2節ê記載是:「西底家背叛巴比倫王尼布甲尼撒,因為án-ne尼布甲尼撒率領全軍來攻打耶路撒冷;hit時是西底家在位第九年ê十月十日。In tī城外紮營,繞tio̍h城牆築壘攻擊,一直圍困到西底家在位ê第十一年。」

第3到5節,這是用一首簡短ê詩歌做譬喻,來形容上帝透過巴比倫軍隊圍城ê譬喻,表明上帝beh懲罰「悖逆ê子民」因為in ê心是硬到極點,聽bē落去上帝勸勉ê話。

Chia用「Kā鍋khǹg tī火上,鍋裡貯滿水」,chia ê「鍋」表示耶路撒冷(參考以西結書十一:3、7、11)。「火」,是teh代表上帝ê懲罰懲罰。

「上等ê肉」、「siōng好ê羊肉」,chiah-ê用句lóng是teh kí上帝ê子民。現在,m̄是只有「上等ê肉」á是「siōng好ê羊肉」,連「特選ê骨頭」mā bē放過,這等於是全部lóng tio̍h khǹg入去鍋裡「煮」。而且iáu koh khah tī「鍋下堆滿木柴」,chia「木柴」teh代表巴比倫軍隊,為tio̍h beh hō͘火勢猛烈ê意思。

第6到8節,chia指出耶路撒冷是一個「充滿兇手ê城」(參考以西結書廿二:3),因為城內發生真chē殺害無辜ê人ê性命。

「生銹無洗過ê鍋」,表示已經pháiⁿ到極點,無法度修復ê意思。「銹」一字mā表示惡毒、罪孽之種ê意思。

「內面ê肉」,這是耶路撒冷城內ê以色列人民。「一塊塊地被夾出來,一塊mā不留」,表示城內ê以色列人民會被一個一個掠起來。

「濺tī光滑ê大石上」,表示chiah-ê殘害別人性命者,並m̄知家己罪惡chē深,iáu以刣人為樂,無kā被殺害ê人用土埋起來(參考利未記十七:13),反tńg會hō͘害者ê血跡留tī石頭殼頂,用來展寶家己殺害jōa-chē人。Chiah-ê被殘害者ê呼hoah聲音,上帝聽見了,祂beh伸手替in伸冤,上帝beh親自替chiah-ê受害者「報復」。

第9到12節,這是第二pái用「充滿兇手ê城」chit-ê詞句形容耶路撒冷。上帝beh「親自堆積木柴」,而且是beh繼續「添木柴,煽火」,hō͘鍋á滾燙得koh khah快、koh khah烈,然後「Kā肉湯煮乾,kā骨頭燒焦」,完全無存留任何一絲希望ê意思。當鍋理ê肉kah骨頭lóng煮到徹底了後,tio̍h拚出來。然後kā鍋á用燄火燒。為tio̍h是beh kā鍋á內ê「銹」去除掉,án-ne「鍋就潔淨à」。頭前講過,「鍋á」代表ê是耶路撒冷。Án-ne,就ē-tàng kā耶路撒冷徹底除掉過去所犯ê罪過,hō͘伊成做一個新ê城,這mā是後來先知以西結講tio̍h重建新ê耶路撒冷聖殿之背景。

「倒空了ê銅鍋」,表示kā耶路撒冷城內所有ê人lóng被趕出去,hō͘城內空無一人。Án-ne,整座耶路撒冷城就變成廢墟。

第13節,說明上帝會án-ne嚴厲懲罰,只有一個原因,是希望完全潔淨以色列人民,ē-tàng真心地歸向上帝。

第14節,「我beh採取行動ê時機到à」,chit句話表明上帝展開懲罰時刻到à。Ná親像第1節所提起巴比倫軍隊已經來圍困耶路撒冷城。當上帝懲罰ê時是「絕對bē憐憫,mā不闊容」,無koh hō͘ in任何機會。

重新查詢 專卷研經 以西結書系列
錯誤回報,請聯繫