Chit段經文大大無仝tī前段經文；Tī chit段經文中，對象是hiah-ê被掠到巴比倫去做奴隸ê猶大人民。而且chit段經文帶hō͘ chiah-ê受掠ê猶大人民來講，是極大ê安慰kah鼓勵，因為上帝m̄-nā為in留落來了劫後餘生ê子民，而且iáu beh kā in被敵人侵佔ê土地歸還kā in賜福。

第14到15節，提起耶路撒冷城內ê猶大人民，in teh談論有關hiah-ê被掠到巴比倫去做奴隸ê同胞。

「離開上主ê聖所siuⁿ遠了」，意思是teh指會失去上帝ê照顧，á是講離開上帝去拜別ê神明ê意思（參考撒母耳記上廿六：19）。Á講chit種話ê人，mā tú好顯示家己對上帝ê認bat錯誤。因為上帝並m̄是khiā起tī人所建造ê建築物內面，因為án-ne，遠離耶路撒冷聖殿，並無表示一定棄sak上帝。Á是講上帝會因為人遠離聖殿這建築物，就講上帝離開in，這是錯誤ê觀念。其實講出chit種話ê人，tú好講出了in心內ê意念kah不良ê動機，in認為hiah-ê被掠到巴比倫去ê同胞，就是hō͘上帝所懲罰ê，因為án-ne，in留落來ê土地、財產，就是上帝beh「賜hō͘」in chiah-ê無受掠ê人應得ê產業，這明顯是一種貪婪ê念頭。

第16節，「我iáu是beh kah in同齊tī流亡ê所在，當做in暫時ê聖所」，chit句話tú好回應了第15節所提起ê。上帝iáu是beh kah hiah-ê受掠ê猶大人民同在。即使in生活tī奴隸ê痛苦生活中，上帝mā tòe in同齊受苦。

「暫時ê聖所」，chit句話真可能就是成做後來形成「會堂」ê主要催化劑。有上帝ê話語，就有上帝同在。因為上帝就是用祂ê話創造宇宙萬物（參考約翰福音一：1—4）。人ê心中若有上帝ê話，就會遵守上帝ê教示，上帝必定會看顧chit種子民。

第17節，「領in離開我分散in去ê各國，kā in集合起來」，chit句話tú好說明上帝beh重新做以色列民族ê上帝，上帝放ta̍k in，mā tio̍h koh一pái帶領in。Chit種信息一再出現tī先知ê文獻中（參考以賽亞書四十三：5，耶利米書廿三：3、廿九：14、三十一：8、三十二：37）。

第18節，真重要，說明上帝對猶大人民唯一ê要求，就是猶大人民一定tio̍h對上帝忠實，就是kā所有其它偶像神明除掉，bē koh再重犯過去棄sak上帝ê愚戇行為，卻是會專心一意ê敬拜上帝。

第19節，講上帝beh重新改造祂ê子民，hō͘ in有顆「新ê靈、新ê心」，chit種新ê靈kah心，是會服從上帝ê心。這mā是一種期待，希望猶大人民會真正悔改（參考十四：6、十八：30、三十六：25—27）。

第20節，「in beh做我ê子民，我beh做in ê上帝」，chit句是非常典型ê立約句型（參考出埃及記六：7，耶利米書廿四：7、三十一：33、三十二：38）。
第21節，講出上帝會赦免、拯救ê對象，就是忠實tī祂ê子民。若是執迷不悟ê子民，上帝iáu-koh bē改變祂懲罰ê計畫。

第22節，teh說明ki-lō͘-pek決定怎樣行，in腳下ê輪á就跟tòe in轉向、行動（參考十：15—17）。上帝就是坐tī這ki-lō͘-pek寶座ê頂面。

第23節，thang續接第十章19節，講上帝ê榮耀離開聖殿ê東門後，就是「離開城，停tī城東邊ê hit座山頂」，chit座山就是橄欖山（參考撒迦利亞十四：4）。

第24到25節，講上帝ê「靈」kā先知以西結提起來，帶伊tńg來到原來ê所在—迦巴魯河邊ê營區。先知以西結非常清楚，伊ê工作kah使命就是beh kā上帝指示伊ê「一切lóng kā流亡ê同胞講à」，這是非常重要ê一件事，mā是先知是m̄是盡責ê重要分界線。忠實上帝ê先知，一定會kā所看見ê景象、聽見ê信息lóng傳達hō͘上帝指示ê對象。