出埃及記 6章28節 到 7章7節   背景資料  上一筆  下一筆
第七章主要是由「祭司文獻」(第1到13、第19到20節a句、第22節等等)組成,加上「耶和華文獻」ê資料(第14到18節、第20節c句到21節、第24到25節等等),以及「以羅伊文獻」ê資料(第20節b句、第23節等等)等混合編輯而成。

Ná親像頭前提起過ê,tùi第六章2節開始直到第七章13節,chit段lóng是屬tī「祭司文獻」ê資料。繼續teh描述上帝iáu-koh無放棄揀選摩西當做祂ê奴僕ê計畫,為tio̍h是ài伊去帶領以色列人民離開埃及。

第六章28到30節,chit三節thang參考第四章1到17節。Chia ê資料是「祭司文獻」,á第四章是「耶和華文獻」ê資料。雖然是無仝ê資料,卻記載仝款ê記事。Kui個呼召摩西ê過程中,摩西lóng一再推辭,m̄-koh上帝是一再堅持。最後,伊只好順服。

第七章1到7節,chia koh一pái強調上帝ài摩西tī埃及國王面前代表祂,á亞倫thang替摩西發言,這thang參考第四章16到17節。

第3節thang參考第四章21節,已經提起過,上帝hō͘埃及國王ê「心剛硬」,表示埃及國王無法度忍受一個曠野ê神,對伊下命令,若是伊聽從,表示伊比chit-ê一無所有ê曠野之神iáu不如。Chia mā提起無論上帝行了jōa-chē神跡奇事,埃及國王iáu是bē聽從,chit句話thang參考第三章20節。

第4到5節,chit兩節說明埃及國王就是因為心硬,直到上帝忍無thang忍之下,「伸手懲罰in」,而且相當嚴厲ê懲罰了後,in chiah放手,hō͘以色列人民離開。這寫法mā為後段開始直到第十二章ê十大災難續接teh來,chiah逼hō͘埃及國王就範臣服鋪陳。

第6到7節,chit兩節表示摩西kah亞倫無koh推辭,in順服上帝ê命令去做。Chia講摩西開始chit項工作ê時,是「八十歲」,後來猶太人kā摩西ê一生劃分做三個階段,每一個階段lóng是四十年(參考使徒行傳七:23、30、36),這可能是kah伊死ê時是一百二十歲有關係(參考申命記三十一:2、三十四:7)。

亞倫比摩西大三歲,chit時受呼召是「八十三歲」。

重新查詢 專卷研經 出埃及記系列
錯誤回報,請聯繫