出埃及記 18章13節 到 18章27節   背景資料  上一筆  下一筆
Chit段經文說明以色列人民開始成做一個有組織ê族群,就是kah葉特羅ê建議有密切關係。雖然tī前面有kúi-nā pái提起以色列人民中間有「長老」、「領袖」(參考三:18、四:29、十二:21),表示in原本就有社群組織。M̄-koh chiah-ê人tī埃及做奴隸ê時chūn,並無甚麼仲裁權。現在in離開埃及為奴之地,進入曠野漂流時代,koh khah需要建立維護族群秩序ê管理者。

第13到16節,葉特羅看見摩西獨自一人teh處理以色列人民之間ê糾紛。伊問摩西是怎樣一tńg來事,摩西回答是只要有兩個人發生爭執,就來chhōe伊排解。

第17到20節,葉特羅聽了了後,認為án-ne只ē-sái摩西thiám pháiⁿ了身軀,無好。伊ài摩西先記tiâu伊應該教導人民認bat上帝ê救恩,並且遵tùi上帝ê律例kah指示,伊ê工作就是beh做chit件教導ê工作。然後kā chiah-ê處理糾紛ê事,hō͘其他ê人去做。

第21到23節,伊建議摩西採取「一千人」、「一百人」、「五十人」、「十人」等組織,每組lóng有人當領導者。這mā是後來in tī巴比倫做奴隸ê時,採用「有十個結過婚ê男人」做基礎,就thang成立一間「會堂」之原因。Chiah-ê領導者一定tio̍h是「敬畏上帝、可靠、不接受o͘-se ê人」,chit種人才ē-tàng tī裁決人民ê糾紛ê時,得tio̍h肯定、信任。這mā是一種所謂「司法」體系。用chit種方式,thang真緊hō͘人民彼此之間ê糾紛得tio̍h解決,á bē積怨tī心。

第24到27節,摩西果然聽從伊丈人葉特羅ê建議,就按án-ne執行管理ê政策。了後葉特羅mā就tńg去伊khiā起ê米甸。伊無介入管理ê工作。
Tùi第十九章到第廿四章,lóng是關於以色列人民kah上帝之間立約ê關係,以及上帝所頒賜hō͘ in「約」á是「法律」ê內容。Chit段經文對以色列人民kah今á日ê基督教會來講,lóng是非常有意義而且重要。
重新查詢 專卷研經 出埃及記系列
錯誤回報,請聯繫