這是由「耶和華文獻」ê資料，kah「以羅伊文獻」ê資料互相交織編輯而成。有時真oh分得開。比較清楚ê經文是第2到4節、第10節、第15到16節、第19到21節、第24到25等節，lóng是「耶和華文獻」ê資料，á第11到14節a句、第22到23節、第26到27節等等是屬tī「以羅伊文獻」ê資料。其他ê經文lóng是chit兩種資料混合做伙編撰起來ê。

Chit章ê重要性真清楚，以色列人民從來m̄-bat有組織，進入到有系統ê組訓工作。這當然kah經歷過拾（khioh）嗎哪、鵪鶉，以及kah亞瑪力人ê作戰有關。而且tùi in ê組織有十人、五十人、一百人、一千人等編制，ē-sái講是分得相當細，對當時án-ne一支龐大民眾來講，是相當無容易ê，因為án-ne thang hō͘ in面對外族人挑戰ê時，m̄免驚惶。Koh講，tú-tio̍h欠缺食物、水ê問題ê時，mā thang真有規律kā它節制。Á對tī彼此之間發生紛爭ê事，mā會好好á處理。

Chit章mā kā咱講，替摩西獻策略ê是伊ê丈人葉特羅。Koh khah可貴ê是，當伊看tio̍h摩西靈活運用伊ê策略了後，就tńg去厝裡à。伊m̄是beh分享權力ê人，卻是盡家己ê智慧，提供意見，並且幫助執行策略完成。Chit種心志真值得學習。

Chit段經文講摩西ê丈人葉特羅來看伊，並且帶摩西ê bó͘-kiáⁿ來kah摩西相會，算是家族團圓。

第1到7節，葉特羅帶摩西ê bó͘西坡拉kah伊ê兩個kiáⁿ，一個叫「革舜」，另外一個叫「以利以謝」來見摩西，án-ne，mā是摩西帶以色列人出埃及後，第一pái kah bó͘-kiáⁿ相會。Tī第二章22節bat記載革舜ê出世，m̄-koh以利以謝是甚麼時chūn出世，就無記錄。M̄-koh tùi第4節thang推斷是tī摩西逃出埃及後出世ê。

葉特羅先託人帶信hō͘摩西，說明in會面ê所在是tī「聖山」。照第三章12節ê記載，這「聖山」是teh指何烈山，這mā thang講是「上帝ê山」，意思是teh指「敬拜上帝ê所在」。

第8到12節，摩西kā chit一路行過來所tú-tio̍h ê事，lóng一五一十地kah伊丈人葉特羅報告，伊聽了後，非常歡喜，就發出感恩ê詩歌。因為葉特羅是米甸ê祭司，因為án-ne，伊就pái設祭壇「獻上燒化祭kah其他祭物」hō͘上帝。