出埃及記 13章17節 到 13章22節   背景資料  上一筆  下一筆
是由「耶和華文獻」、「以羅伊文獻」,kah「祭司文獻」等三種資料交織編輯而成。

Tùi第17節到第十四章31節,lóng是記載有關上帝怎樣保護以色列人脫離埃及ê追兵。除了雲柱kah火柱之外,siōng出名mā一再被以色列人提起ê就是過紅海ê神跡。Tùi第17節開始,直到申命記結束,lóng是記載以色列人tī曠野漂流ê經過,chit-ê漂流就長到四十年時間。

第17到18節,因為驚以色列人tú-tio̍h困難就會對出埃及ê艱辛路徑產生iáu豫,所以上帝親自帶領in行比較遠ê路,mā是比較安全ê路徑,免得受tio̍h非利士人ê騷擾。

注意第18節,chia提起in行ê路線是「紅海」。Chia ê「紅海」,是teh指「蘆葦之湖」ê意思,整片是沼澤地區,並m̄是指現今「紅海」。Koh講,chit節講以色列人出埃及ê時chūn,「已經武裝好,準備隨時作戰。」chit種寫法kah-ná無jōa正確。In原本是奴隸,無可能有武器thang隨時準備作戰。比較khah正確ê講法是,in出埃及ê時,帶tio̍h兵器,á chiah-ê兵器真可能就是tī in出埃及ê時,隨手the̍h ê防身武器(請參考十二:36),即使無埃及ê追兵,in tī經過ê路途中,mā會tú-tio̍h想beh搶奪in ê人。另外一方面,根據第六章26節,in出埃及ê時,已經真有組織à。

第19節,chit節回應創世記第五十章25節記載約瑟臨終前ê交帶,ài kā伊ê骨骸帶出埃及。後來in進入迦南地了後,kā約瑟埋葬tī示劍(參考約書亞記廿四:32),mā就是雅各用一百塊銀á向示劍ê老父哈抹ê後代買來ê土地(參考創世記三十三:18—20)。

第20到22節,以色列人離開埃及進入曠野ê沙漠地帶,這是早暗溫差相當大ê地域,因為án-ne,日時頭上帝用雲柱遮tio̍h陽光,hō͘ in bē因為án-ne被日曝所傷,暗時真冷,上帝用火柱照亮in,hō͘ in會得thang保暖,而且上帝是「行tī in頭前」,hō͘ in跟tòe行。這ná親像顧羊人帶領羊群仝款,行tī羊群頭前,hō͘ in thang行正確ê路徑。

重新查詢 專卷研經 出埃及記系列
錯誤回報,請聯繫