Ná親像創世記仝款，出埃及記mā是由幾種無仝ê傳統資料混合編輯而成ê。包括siōng古老，出現tī主前950年代左右ê「耶和華文獻」；tī主前750年左右出現ê「以羅伊文獻」；主前550年代ê「祭司文獻」。

Tī第一章mā是用chit三種文獻混合編輯。第1到5節、第7節、第13到14節等等，lóng是屬tī「祭司文獻」。第6節、第8到12節等等，lóng是屬tī「耶和華文獻」ê資料。Á第15到22節則「以羅伊文獻」ê資料。

Chit段經文thang看tio̍h「祭司文獻」ê特色，就是族譜ê記載相當詳細。除約瑟外，作者kā雅各kah伊十一個「直系」gín-á ê名lóng寫出來。總數是「七十人」。Chia所講ê「七十人」是包括約瑟家ê口數在內（參考創世記四十六：27）。M̄-koh，tī使徒行傳ê資料卻講有「七十五人」（參考使徒行傳七：14）。

第5節，chia特別指出雅各帶入埃及ê人口，因為約瑟是早就受賣到埃及，而且因為約瑟當上了埃及宰相，chiah hō͘雅各有機會帶tio̍h家族進入寄居。

第6節真清楚講「約瑟死去，伊ê眾兄弟kah in ê同輩mā lóng死去」，這是teh指第2到4節所提起ê hit一代ê人。其實chit節mā為出埃及記以後ê故事留一個伏筆，因為約瑟kah伊同輩ê人lóng死去，mā是teh表示埃及人已經漸漸bē記得in過去tī埃及所做一切ê事。

第7節，chit節是kui個出埃及故事ê背景siōng重要ê經文。因為chit節mā teh說明後來以色列人民tī埃及受tio̍h苦難ê主要原因，是危kah埃及社會ê穩定。Tùi雅各chhōa「七十人」進入埃及到chit-má，已經是「koh chē koh強盛，遍及埃及全境」。這說明雅各ê kiáⁿ孫tī埃及發展了相當快速，已經m̄是用一個家族chit種觀念thang形容，á是beh用大族，而且有發展出大國ê趨勢。因為án-ne，無koh用「雅各」ê名稱，á改用「以色列人」，表明ê是十二支派ê總和。