申命記 4章15節 到 4章31節   背景資料  上一筆  下一筆
Chit段經文主要teh強調一點:bē-tàng雕製任何偶像來拜,因為上帝並無hō͘以色列人民看見祂ê形像。

第15到19節,chit段經文mā ē-sái講是十誡ê第二誡之濃縮,bē-tàng為家己á是任何對象塑造形像來拜。

第20到24節,chia強調是上帝kā以色列人民tùi埃及「熾烈ê火爐裡搶救出來」ê(20、37節),chit位上帝是用「大能大力」kā以色列人民救出來,這並m̄是任何神明ē-tàng做會到ê事。第21節摩西講是為tio̍h以色列人民ê緣故,上帝不准摩西進入迦南應允之地。這thang參考第一章37節、第三章26節等等。摩西mā知影家己會死tī約旦河東岸,是伊kah以色列人民準備過去ê所在。雖然伊無法度過去,m̄-koh伊iáu是勸勉以色列人民一定ài會記得kah上帝之間所立ê約,一定會遵守祂ê誡命,絕對m̄去拜任何偶像。

第25到31節,摩西Tī chit段經文真清楚提出嚴厲警告,若是以色列人民不聽伊勸勉kah警告,成(chiâⁿ)實去拜偶像神明,伊「呼喚天地前來做證」,以色列人民會因為án-ne soah被滅亡,只有少數人ē-tàng存活,而且會被趕散去做奴隸。Chiah tī苦難中回想起拯救in離開埃及ê上帝。Chit位上帝iáu-koh是仁慈ê,會拯救in,會記起所立ê約。其實,摩西án-ne講,是beh kā以色列人民講,siōng好mài tú-tio̍h苦難ê時,chiah想起chit位仁慈ê上帝。意思是mài因為上帝仁慈,就無在意,認為祂bē受氣發怒,chit種觀念是錯誤 ê。


重新查詢 專卷研經 申命記系列
錯誤回報,請聯繫