申命記 30章11節 到 30章20節   背景資料  上一筆  下一筆
Chit段經文真清楚teh強調一個基本要點:m̄免chhōe任何理由來表示遵行上帝ê誡命真困難。原因是上帝ê誡命lóng是tī生活中就ē-tàng實踐出來ê。

第11到14節,這是真有意思ê一段話,每一個時代tī上帝ê選民中,lóng會有人chhōe真chē藉口,講遵守上帝ê命令真困難,包括講hiah-ê律法窒礙oh行lah、bē合ê時宜lah等等chit類ê理由。M̄-koh,摩西tī chia強調,上帝lóng是ē-tàng遵行ê,若無,祂bē ài祂ê子民去實踐出來,祂甚至kā以色列人民講,遵行上帝ê律法,其容易之情況ná親像存在tī咱ê心中、嘴裡仝款ê近,只要伸出手就thang the̍h-tio̍h,只要願意,想得tio̍h,就ē-tàng做會到。使徒保羅mā採用第14節chit句話,講出伊對羅馬教會信徒ê勸勉講:「上帝ê 話tī 你ê 身邊,tī 你ê 嘴裡,tī 你ê 心內。這就是阮所傳ê 信ê 道理。你若用嘴告白耶穌是主,心內 mā 相信上帝 hō͘祂tùi 死人中koh 活,你就會得tio̍h 拯救。(全民版)」(羅馬書十:8—9)

第15到20節,chit段經文thang講是申命記ê總結。

第15到16節,摩西koh一pái勸勉以色列人民一定tio̍h做出明確ê選擇,到底是歸向上帝,á是beh去拜別人ê神明,這絕對無法度兩pêng lóng tio̍h。因為只有chit位帶領in離開埃及ê上帝,chiah是真正上帝,是獨一、創造宇宙萬物ê上帝。只要堅守對上帝忠實ê心,就會得tio̍h上帝ê賜福,chit種賜福m̄-nā tī個人,而且kui個民族國家ê興旺、穩定。

第17到18節,chit兩節是相對tī前兩節。Chit兩節提起若是成(chiâⁿ)實去拜偶像神明,m̄-nā國家會滅亡,in mā會淪陷成做他國驅逐ê對象。

第19到20節,「呼喚天地來做證」,chit句話表示一種誓約ê方式。表示大家lóng看會tio̍h chit-ê約。「選擇性命!」chit句話成做摩西hō͘以色列人民最後ê箴言。疼上帝,連帶ê賜福就會延綿到後代kiáⁿ孫身上。最後第20節引用「亞伯拉罕、以撒、雅各」等以色列人民ê祖先,講tio̍h上帝ê應允,mā teh表明若是以色列人民確實遵守kah上帝所立ê約,上帝對in祖先ê應允,就會繼續落去,永bē改變。

重新查詢 專卷研經 申命記系列
錯誤回報,請聯繫