申命記 22章1節 到 22章12節   背景資料  上一筆  下一筆
Chit章包含真chē單獨ê條例,ná親像teh苦勸、勉勵,無jōa sêng律法條文。因為tī chia並無提起若是違背chiah-ê條文,會受tio̍h ê懲罰。

Chit段經文共計列了九條ê條文,chiah-ê條文lóng是kah一般家庭生活相關ê事件。

第1到3節,這是一種勉勵人怎樣kah厝邊相處ê箴言,mā是勸人誠實相待, mài有貪ê念頭出現。因為發生tī別人身上ê事,mā可能會發生tī家己身上。Á「羊」是當時社會ê經濟來源,而且重要ê祭牲。「驢á」是重要ê交通運輸工具,衫褲是生活一定tio̍h用品,mā可能是sàn-chhiah人óa靠取暖bē-tàng á是缺ê重要物件。

第4節,thang參考出埃及記第廿三章5節。「驢á á是牛跌倒了」,一個人ê氣力無法度拉起來,一定tio̍h有koh khah chē人來協助。

第5節,禁止人穿異性ê衫褲á是打扮,主要是beh端正風俗,真可能當時迦南地民間宗教慶典活動,有人用chit種方式打扮,ná親像台灣民間宗教祭祀禮儀中,mā有cha-bó͘人扮演cha-po͘人角色(親像「五子哭墓」)。為避免耶和華宗教被混入chit種行為,因為án-ne,禁止擴大範圍到一般生活中。若是對照申命記第廿三章17到18節來看,當時迦南地ê寺廟已真盛行孌童、娼妓。因為án-ne,有chit項禁令,表示需要嚴格保持神聖ê行為,包括tī穿插頂面ê要求,以示對耶和華上帝ê尊崇。仝款ê,chit項禁令m̄-nā是用tī宗教禮儀,mā用tī一般生活中。

第6到7節,這是非常人道ê作法,因為取行母鳥,會hō͘整窩ê雛鳥死去。Chia雖然講「thang帶走細隻鳥á」,其實意思是teh指看見母鳥tī鳥巢裡撫育小鳥á是孵蛋ê時,就mài去驚動,hō͘鳥á ê性命thang延續落去。

第8節,ài tī厝頂ê四周設置欄杆,chit項規定真可能kah以色列人民習慣tī厝頂平台頂祈禱、睏、聚會有關。因為有chit種生活習慣,in ê厝頂通常lóng建造得真堅固(參考列王記下四:10)。有時in mā會tī厝頂平台頂曝粟á。Á peh上厝頂ê樓梯就tī厝ê外面,任何人lóng ē-tàng peh上厝頂。設置欄杆chit項措施thang預防意外ê傷亡發生。Á致意外發生ê時,mā thang免除屋主「流人血」ê罪名。

第9到11節,chit三節講出三項kah自然現象不搭配ê禁令。這mā講一個基本觀念:各歸其類,表明一種秩序ê意思。利未記第十九章19節mā真清楚提出chit種生存ê要件。「bē-tàng tī葡萄園裡栽種別ê農作物」,其原本ê意思是teh指仝一個果園mài有兩種果子樹。Tī耶穌ê譬喻中,特別用chit種譬喻,講出結果無收成(參考路加福音十三:6)boài hō͘「牛kah驢á並肩種作」,因為這是兩種無仝ê家畜動物,牛ê種作力比驢á大。因為án-ne,若kā兩個架做伙並肩種作,kan-taⁿ會造成事倍功半ê結果,甚至koh khah糟。因為chit兩種力道無仝ê動物,真oh同負一枷擔。「羊毛kah細麻紗」,這是兩種無仝ê材質,同齊混織成布,真容易hō͘衫褲變形。Chiah-ê lóng tī說明一個基本要件:有秩序,不混雜。上帝ê子民應該知影秩序ê重要性。

第12節,參考民數記第十五章37到41節ê規定。有關衫褲tio̍h「thīⁿ繸」chit條法令,是用tī以色列成年人ê男子身上。其主要目的是teh提醒以色列人民,tio̍h會記得上帝「一切ê誡命,並且遵行」。Á上帝ê誡命中有兩項siōng重要,就是「疼上帝kah疼厝邊」(參考路加福音十:27)。耶穌就bat譴責過hiah-ê宗教領袖,故意kā衫褲ê繸加長(參考馬太福音廿三:5),以顯示家己ê地位,這是錯誤 ê信仰態度。因為若m̄是真實遵行上帝ê旨意,就算加長了chiah-ê繸,mā是枉然。

重新查詢 專卷研經 申命記系列
錯誤回報,請聯繫