申命記 20章1節 到 20章9節   背景資料  上一筆  下一筆
Chit章談ê lóng是有關戰爭生死ê問題。Tī第七章17到26節已經講tio̍h有關進入迦南地必定會tú-tio̍h戰爭,chit-má koh khah具體地論到關係戰爭tio̍h注意ê細節。以色列人民teh beh進入迦南地一定tio̍h面對ê戰爭看做是「聖戰」。這「聖戰」ê觀念m̄-nā是因為迦南地是上帝所應允賞賜ê土地,koh khah重要ê是tī戰爭ê時,上帝會親自kah in同齊kah敵人相刣,chit種觀念早tī出埃及進入曠野時代,就已經建立起來。Mā tùi「聖戰」ê觀念中,thang看tio̍h以色列人民已經kā kui個民族完全kah「耶和華宗教信仰」結合做伙,無法度分開。

Chit段經文真清楚講tio̍h,mài因為對敵ê一方人chē勢眾就驚惶。因為這是上帝允准ê戰爭,上帝一定會伸手參與,因為án-ne m̄免驚惶。

第1到4節,真清楚,只要是上帝同意ê戰爭,就會有上帝ê幫助。Tī上帝帶領下ê戰爭,kah軍隊ê軍事武力強弱無關,因為上帝就是以色列軍隊ê總指揮官(參考耶利米書五十一:27—28),這mā是詩人ê詩歌中所歌頌ê(參考詩篇三十三:16—18)。若是無上帝允准,即使真有士氣,結果仝款kan-taⁿ會慘敗(參考民數記十四:39—45),這mā是以色列人民tī曠野漂流期間親身ê經驗。

Koh講,既然是有上帝ê允准chiah ē-tàng出征,因為án-ne,tī出征chìn前tio̍h由祭司先向軍隊進行鼓舞講話,有ná今á日軍隊戰前ê「精神訓話」仝款。

第5到7節,這幾節經文講tio̍h幾種m̄免出去戰爭ê人,一是tú建造好厝á iáu未舉行新屋落成感恩禮拜ê人,這mā表示iáu未搬入去tòa ê意思;二是新栽種葡萄園iáu未收成初熟果子奉獻hō͘上帝ê人,照利未記第十九章23到25節ê記載,ē-tàng收tio̍h初熟果子是第四年了後ê事;三是訂了婚m̄-koh iáu未結婚ê人,照申命記第廿四章5節ê記載,結婚ê hit年,是無法度調去做兵ê。

第8到9節,規定驚惶相刣ê人mài出征,因為chit種人m̄-nā會影響士氣,mā teh表明對上帝無信心。Chit種人m̄-nā bē-tàng出征,koh khah無法度擔任指揮官,á是帶兵官。

重新查詢 專卷研經 申命記系列
錯誤回報,請聯繫