申命記 1章19節 到 1章33節   背景資料  上一筆  下一筆
Chit段經文是teh重複敘述民數記第十三章1到33節,就是每一個支派推舉代表,進入迦南地去窺探當地實況。

第19到21節,摩西回顧過去發生ê事,講伊bat鼓勵以色列人民,mài驚惶,tio̍h勇敢,只要遵照上帝ê指示kah帶領就ē-tàng。

第22到25節,以色列人民確實驚惶,in向摩西建議先派人入去窺探實況了後,koh來決定tio̍h行怎樣ê路線入去。摩西同意,差派每支派一個代表進入窺探,結果是真kah頂面仝款帝應允ê時所講ê,he是塊「非常肥ê土地」。

第26到28節,m̄-koh因為chit件窺探tńg來引發ê事件,hō͘人認為是背叛上帝ê旨意,因為去窺探迦南地ê人tńg來,只有約書亞kah迦勒兩位講應該攻打入去,其他人lóng講bē-tàng。Chiah-ê講bē-tàng入去ê探子講,迦南地ê人高大碩壯koh強悍,而且in ê城牆高聳入雲。Chiah-ê人並且四界去散播chiah-ê言論,重重地影響tio̍h民心ê安定。

第29到33節,摩西一再勸勉in tio̍h相信上帝,m̄是以色列人民teh相刣,是上帝teh替以色列人民戰爭,伊特別舉出tī埃及kah tī曠野,大家親身經歷過ê上帝奇妙作為。M̄-koh無論摩西怎樣講,以色列人民就是無願意聽從。就算是án-ne,chit位拯救ê上帝是慈愛ê,祂頭尾照所立ê約持守帶領以色列人民,行過每一個旅程。

注意第33節所提起ê「夜間用火柱,日時頭用雲柱,帶領lín ê旅程」,m̄-nā kan-taⁿ是表示上帝ê同在,mā teh說明上帝án怎保護in免tī死亡ê威脅;因為tī曠野,日時頭豔陽高照,koh無樹木thang遮蔭,人真容易tio̍h痧昏倒,甚至因為口渴死去。M̄-koh有雲柱teh遮陽光,hō͘ in感覺涼爽。Koh講,曠野白晝kah烏夜溫差非常大,日時頭燒熱度高,暗時則相當寒冷。因為án-ne,tī暗時,上帝用火柱溫暖in ê身軀。

重新查詢 專卷研經 申命記系列
錯誤回報,請聯繫