但以理書 2章24節 到 2章49節   背景資料  上一筆  下一筆
聖經作者講出一個明確信息:智慧,是tùi上帝來ê賞賜,有智慧ê人,就是有上帝恩賜ê人,chit種人才是真正認bat上帝(參考箴言九:10)。但以理書ê作者就是tī說明,但以理ê成功,並m̄是因為伊有甚麼能力,á是有甚麼特殊ê才華;卻是因為伊óa靠上帝,走chhōe上帝ê帶領,chiah ē-tàng tī siōng危險ê時刻得tio̍h「智慧」,知影怎樣克服性命中ê危機。
但以理因為得tio̍h上帝賞賜hō͘伊ê啟示,因為án-ne,伊決定親自向國王講出國王所做ê夢,以及夢境ê啟示。

	第24到25節,chit兩節看tio̍h非常有趣味ê對照;當但以理自我推薦kā侍衛長亞略講伊ē-tàng解釋王ê夢。Á侍衛長亞略卻teh對尼布甲尼撒王講伊chhōe-tio̍h ê有一個會解王ê夢ê猶太人。真可能伊對但以理表現出來ê樣式真有信心,mā有可能是kah頂pái但以理拒絕接受宮廷提供ê lim食之事件有關pah,hō͘伊對但以理ê認bat非常清楚,知影伊有特別ê智慧,只要伊講得出口,就必定ē-tàng完成。 

	「我tī猶太俘虜中chhōe-tio̍h一個人ē-tàng解釋陛下ê夢」chit句話,確實有特別ê意義。因為tī當時ê社會,並無會kā一個hō͘ in tī戰爭中phah敗ê對象看做是有智慧、有能力ê人。特別是當巴比倫帝國內ê hiah-ê有學問ê人lóng無法度知影到底國王夢見甚麼,並且明白其所做ê夢ê內容ê時,竟然tī俘虜中ē-tàng chhōe-tio̍h chit種人,這當然是非常令巴比倫王尼布甲尼撒非常驚kah gāng去並且不得不懷疑,因為這mā thang表示tī巴比倫帝國境內siōng優秀ê知識份子,竟然khah輸一個hō͘ in俘虜ê以色列人民。

    第26節,尼布甲尼撒王以懷疑ê語句詢問但以理是m̄是真正ē-tàng kā伊ê「夢講起來,並且解釋它ê意思mah?」。

	第27到28節,chit兩節講出但以理書ê中心信息:只有啟示「奧秘」ê上帝,chiah ē-tàng hō͘人知影夢。因為夢tùi上帝來ê啟示,mā是上帝用來向人顯現伊家己ê一個方式。但以理講上帝透過夢kā「將來beh發生ê事」講出來,這就是上帝啟示ê「奧秘」。

	「奧秘」,這mā是聖經學者kā但以理書列為「啟示文學」ê原因。因為chiah-ê「奧秘」lóng kah上帝未來ê審判有關,mā kah上帝teh beh執行祂對受造ê萬物之計畫有關。

第29到30節,但以理真清楚hō͘尼布甲尼撒王知影,伊無比別人聰明,而是beh上帝beh hō͘伊來幫助國王「知影這夢ê意思kah王心中ê意念」。

	第31到35節,chit段經文ê內容lóng是有關尼布甲尼撒王所做ê夢。Tī chiah-ê夢中thang看tio̍h ê就是一座非常奇怪ê大雕像,包括五個部分,有金ê頭、銀ê胸坎kah手股頭、銅做ê腰kah尻川斗、鐵做ê腿,以及鐵kah土混合做成ê腳。

	如果照chit-ê夢ê圖像去造一座chit種雕像出來,一定會發現這是一座頂下真不搭調ê雕像,因為頭部是用金製造ê,而腳卻是鐵kah土製成ê。Koh講,鐵kah土是無法度混kah做伙ê物件,án-ne混合起來ê物件,一定會脫落,無法度結合做伙成做器物。第三,tùi頭到腳,是tùi貴重ê金子,到鐵kah土ê混kah物。Án-ne ē-tàng看出chit座雕像ê底座siōng脆弱,材質是siōng粗糙。Thang講它會是不堪一擊ê雕像,因為腳無法度承受任何打擊。

	第34到35節提起有一塊未經人手開鑿ê巨石tùi山岩上滾落來,phah中了chit座雕像,用腳頭u想mā知,siōng不堪一擊ê必定是腳部了,因為腳部是用鐵kah土混合造成ê,腳部馬上被砸碎了。Á腳部被phah碎,表示chit座雕像無法度koh再khiā立,當然整座雕像就倒à落來粉碎了,甚至嚴重到被風吹得連碎片mā chhōe bē-tio̍h。

	Koh講,hit塊「巨石卻jú滾jú大,最後變成一座大山,覆蓋大地」。Chit-ê句話一定tio̍h kah第34節描述chit塊巨石ê特色對照teh看;作者講chit塊巨石是一塊未經人ê手開鑿ê石頭。顯然ê,無經過人ê手開鑿ê山頂巨石,怎樣會滾落來?án-ne就表示chit塊巨石會滾動落來,乃是其背後有大大超過人ê氣力chiah有辦法移動它,親像大地動之類ê氣力。如果這真正是大地動hō͘巨石移動,它所beh代表ê就是造物主上帝ê氣力。

第36節,tùi chit節開始到第45節,lóng是teh解釋頭前所提起尼布甲尼撒王所做ê夢。

第37到45節,但以理解說尼布甲尼撒王ê chit-ê夢裡,真特別地說明了四個帝國ê出現。Tùi巴比倫帝國開始,然後接落去有「另外一個帝國出現」,以及「第三個」kah「第四個」帝國出現。Tī第七章mā會看tio̍h「四頭巨獸」ê夢,有kóa聖經學者講chia ê四個帝國,kah第七章ê「四頭巨獸」mā有譬喻上ê關係。

Chia並無明確kā四個帝國ê名稱寫出來,一般來講kā chiah-ê帝國歸類成兩種講法;第一種講法是第一個帝國代表ê就是巴比倫,mā就是現在尼布甲尼撒所掌權ê帝國。續落來ê第二個是瑪代帝國,第三個帝國是波斯王朝,第四個帝國是希臘。第二種講法是第一個帝國乃是巴比倫、第二是波斯、第三是希臘、第四是羅馬帝國。M̄-koh大多數ê人比較khah傾向支持第一個講法。

Teh討論中比較khah值得注意ê乃是tī第40到43節所提起ê,就是tī第40節提起ê hit-ê「像鐵仝款堅強」ê帝國,指ê乃是希臘王朝時代ê亞歷山大大帝;tī伊ê時代,hō͘希臘帝國非常強盛,國勢達到顛峰ê狀況,伊所帶領ê軍隊所向無敵。M̄-koh tī伊死後緊續落來ê帝國,呈現出來ê就是用「鐵kah土」混合而成ê帝國。頭前已經講過,chit兩項物件是無法度混合做伙ê,如kā它混合做伙mā一定會分裂。Á事實mā確實是án-ne,tī亞歷山大大帝死後,帝國之內隨時分裂做做兩個主要國家,並且是彼此互相對敵,chit兩個國家就是「多利買」王國kah「西流古」王國;前者用「土」代表,後者用「鐵」表示。Á tī第43節解釋了第33節所提起「腳」ê部分,是用鐵kah土混合做ê,意思是teh指通婚。Mā就是講,這分裂ê兩國,其統治者lóng想用通婚ê方式來teh象徵兩個國家乃是和好如初。M̄-koh以通婚ê方式表示和好,骨底卻是各懷鬼胎,彼此lóng想beh爭取統治霸權,chit種通婚kan-taⁿ會帶來koh khah chē ê憎恨,對tī已經分裂ê帝國並無實質ê幫助。

Chit-ê夢siōng重要ê是tī第44節,但以理講上帝beh建立一個永遠bē敗壞ê王國,chit-ê王國beh kā所有頂面所講ê四個帝國消滅。其實作者是用chit種講法beh表明一件事:tī西流古王朝ê末代皇帝,mā就是安提阿哥四世ê時代,因為強制ài tī其統治區內徹底執行「希臘化」運動,堅持所有人民一定tio̍h放棄割禮,並且m̄准限制食ê物件,安提阿哥四世並且下命令檢查所有統治區內ê猶太人是m̄是有實行割禮,如果發現有猶太嬰á實行割禮,就beh kā它刣死,並且kā屍體掛tī母親ê頷頸上遊街示眾,而拒絕食豬肉ê猶太人,則kā豬肉塞入去in ê嘴中。阿提阿哥四世並且tī耶路撒冷聖殿至聖所ê祭壇頂以豬肉獻祭,而且kā豬血灑tī祭壇上,用chit種方式污穢、侮辱猶太人,主要目的就是強迫猶太人屈服成做一個希臘化ê子民。Chiah-ê資料lóng thang tùi「次經」ê「馬加比傳」上卷看ê到,mā是引起主前第二世紀ê猶太人反抗運動之主要背景因素。

第45節講hit塊未經人手開鑿ê巨石,會消滅所有chiah-ê「金、銀、銅、鐵、kah泥做ê像」,ná chit-ê帝國指ê是甚麼?照第44節所提起ê,he是上帝beh建立ê一個「永無盡期ê王國」。

作者khah強調tī所有chiah-ê大帝國ê統治者,若是以非常強猛ê手段迫害被統治ê人民,伊ê統治時代總有一工是會過去ê,m̄-nā án-ne,上帝一定會拯救祂ê子民,絕對bē hō͘ chiah-ê以殘酷手段對待人民ê統治者逍遙長遠。上帝會親自掌權、管理祂ê子民。

	第46節,尼布甲尼撒王聽但以理ê解說了後,隨時向但以理—chit-ê被俘虜來ê奴隸下拜,並且iáu下令臣僕beh向但以理「獻供物燒香」。Thang想像會tio̍h,當尼布甲尼撒王向但以理下拜ê時,其他在場ê臣僕必定也kah做。Chit種動作ná親像kā但以理當做「神明」看待ê方式。換句話講,作者用chit種描述方式,說明有智慧ê但以理tī尼布甲尼撒王ê宮廷中所享受ê特殊地位是非常重要ê,甚至有夠額ê氣力影響tio̍h國家決策。

    第47節,chit節是尼布甲尼撒王聽但以理解說了後ê反應,伊o-ló但以理ê上帝,乃是「萬王之主,是啟示奧秘ê上帝」。

    第48到49節,尼布甲尼撒王照家己所講ê,賞賜hō͘但以理真chē貴重ê禮物,mā提升伊,「委派伊管理巴比倫省,並任伊做王家顧問之首」。Á但以理則請求國王kā管理巴比倫省ê事務交由另三位朋友負責,伊專心留tī王宮裡服侍國王。

重新查詢 專卷研經 但以理書系列
錯誤回報,請聯繫