但以理書 2章14節 到 2章23節   背景資料  上一筆  下一筆
Tùi第14節開始,作者kā焦點lóng khǹg tī但以理身上,就是beh hō͘讀者知影:但以理就是一位真正有智慧ê人,伊知影tī性命tú-tio̍h siōng危險ê時刻,一定會óa靠上帝ê帶領,chiah ē-tàng度過性命ê危險。

第14到15節,chia講但以理一知影尼布甲尼撒王ài beh進行chit項誅kah全部參謀策士之令後,伊馬上就去chhōe國王身邊ê侍衛長亞略。Tī第一章記載但以理bat因為伊kah其他三位被選入宮廷ê青年拒絕食無清氣ê食物chhōe過太監總管亞施比拿。現在則為tio̍h全部ê參謀策士趕緊去chhōe侍衛長亞略;伊是執行國王這道命令ê負責人。但以理tùi亞略嘴中知影kui個事件ê始末。

第16到18節,伊問清楚侍衛長實情後,隨時就進宮廷去晉見國王,請求國王hō͘伊一kóa時間,伊就ē-tàng回答國王所提出來ê問題:一是國王所做ê夢為何?二是夢ê意義為何?伊mā kā chit件事kā另外三個同在王宮內ê朋友講。但以理要求chit三個朋友kah伊同齊「向天頂ê上帝祈禱,求伊憐憫,啟示這夢ê奧秘,hō͘ in bē致使kah其餘ê巴比倫顧問同齊被刣」。

第19節,上帝果然聽但以理等四人ê祈禱,hō͘但以理tī異象中看tio̍h上帝對伊啟示「奧秘」。Chia所講ê「奧秘」,就是用人ê智慧、知識、能力、經驗所無法度明白ê事,m̄-koh tī上帝指引之下,人就ē-tàng明白chiah-ê kah性命有關ê事。因為án-ne,當但以理得tio̍h上帝hō͘伊ê啟示了後,伊隨時歌頌上帝ê偉大。 

    第20到23節,這是一首頌讚ê詩歌。是但以理teh歌頌上帝偉大koh奇妙所做ê o-ló詩歌。Chit首詩歌雖然是只有短短ê四節,m̄-koh卻是真精美ê詩歌,內容tùi歌頌上帝開始,然後用感謝做結束。

	第20節ê「願上帝ê名得tio̍h稱頌」,這mā是以色列人民tī信仰上必定會表達ê方式,就是無論tī甚麼處境之下,lóng是先tùi歌頌上帝開始,因為每一件事lóng有上帝奇妙ê旨意在內面。

	「世世無窮」chit句thang kah第21節ê「改變時間、季節」相配合來看。這表示tio̍h上帝是永恆ê,m̄-koh人ê世界是一直teh替換、改變。

	第21節講上帝thang改變「時間、季節」,同時mā thang「廢王、立王」,這說明了聖經作者提供ê一個基本觀念:權力乃是tùi上帝來賞賜。因為án-ne,君王主要目的就是回應上帝ê揀選,m̄是隨心所欲(參考羅馬書十三:1)。而且上帝mā賞賜「聰明」、「智慧」hō͘敬畏祂ê人。

	第22節,chit節講出了chit位啟示奧秘hō͘人知影ê上帝kah其它ê神明有極大ê無仝;其它ê神明並無法度啟示人性命ê奧秘,ná親像hiah-ê術士、占卜者tī當時ê社會中hō͘人認為是siōng有智慧、能力ê人,m̄-koh in mā講in ê神明乃是無法度明白奧秘ê事,mā不khiā起tī人間。Á但以理等chit四位所信奉ê上帝,卻是一位ē-tàng啟示性命奧秘ê事hō͘人知影、明白ê上帝,m̄-nā án-ne,chit位上帝iáu ē-tàng明白人tī暗中所隱藏ê一切,因為tī上帝眼中,無任何事物ē-tàng遮蓋祂ê目睭(參考詩篇一三九:1—6、12)。

第23節ê chit句「祖先ê上帝」真重要,因為作者就是beh kā hiah-ê受tio̍h迫害中ê同胞講m̄-thang bē記得眾祖先ê經歷,in mā bat經因為懷疑上帝ê同在,而受tio̍h非常嚴重ê懲罰。另外一方面,談起「祖先ê上帝」chit-ê詞句ê時,就是beh hō͘讀者m̄-thang bē記得祖先親身體驗ê經歷,特別是出埃及ê經歷。但以理講chit位上帝垂聽伊ê祈禱hō͘伊知影國王所眠夢,並「指示」伊「該怎樣向王解夢」。

重新查詢 專卷研經 但以理書系列
錯誤回報,請聯繫