Chit段經文是繼續紹介腓利kā福音往外邦人傳開ê一個具體例。Mā tùi chit段經文koh一pái看見作者路加所強調ê，福音事工m̄是óa靠人ê能力，卻是上帝ê靈親自在作工。

第26到33節，chit段經文講tio̍h上帝ê使者hō͘腓利知影，怎樣幫助一個衣索匹亞ê高級財務官員。衣索匹亞是設tīchit-má蘇丹南部境內ê部落，是烏人族群。Chit位官員mā加入了猶太宗教，因為án-ne，beh上耶路撒冷去朝聖，tī車頂讀以賽亞書。因為án-ne，聖神引chhōa腓利去見伊，主要是beh幫助伊koh khah明白福音ê信息。果然，腓利照聖神ê指示tú-tio̍h chit位衣索匹亞官員，這官員表示家己並bē明白所讀ê chit段以賽亞書第五十三章7到8節經文ê意思。

第34到38節，腓利因為有聖神充滿，就真清楚kah chit位高級官員「講解關係耶穌ê福音ê事」，以及受聖神感動，hō͘官員請求腓利為伊行洗禮。就án-ne，伊成做第一位受洗歸屬基督ê外邦人。作者路加有意表示：後來衣索匹亞ê福音事工ē-tàng建立起來，必定kah chit位官員有密切關係。Tùi chia mā看tio̍h早期教會傳福音ê具體型態：用洗禮來表明chit-ê人已經領受了基督ê記號。

第39節，thang了解腓利是受tio̍h聖神帶領去幫助chit位衣索匹亞官員認bat福音ê信息。Á當腓利完成chit項工作了後，上帝ê靈就kā腓利帶離開現場，chit對此官員來講，有強化信仰、堅定信心ê作用。

第40節，腓利是一個真有傳福音恩賜ê人，tī使徒行傳第廿一章8到16節有記載，腓利m̄-nā家己認真傳福音，伊有四個cha-bó͘-kiáⁿ「lóng有傳講起帝信息ê恩賜」。