Chit段是大家熟悉ê經文，mā是頂港有名聲下港有出名ê神跡故事。彼得kah約翰醫好一位生落來就瘸腿ê人。

第1到5節，chia開始提起「祈禱ê時間」。Tī舊約時代是每工早起kah下晡各有一pái祈禱ê時間。頂真ê猶太人會每工祈禱七pái（參考詩篇一一九：164）。耶穌ê時代，一般猶太人已經習慣每工有三pái祈禱，時間是tī早起九點、下晡三點，以及下晡六點。因為án-ne，第1節講彼得kah約翰下晡三點到聖殿去，mā可能就是beh去祈禱ê時chūn，tī聖殿ê美門前tú-tio̍h chit位乞丐teh行乞。

第6節，是kui個神跡ê中心。Chit節kā神跡ê氣力kah傳耶穌ê福音親密地結合做伙。另外一方面，chit節mā驗證了耶穌hō͘門徒ê應允，只要奉祂ê名求，伊必定應允（參考約翰福音十四：13）。

第7到10節，確實，tī眾使徒ê身上是充滿tio̍h聖神ê氣力，hō͘ in也ē-tàng行神跡奇事，因為這醫ê神跡，hō͘眾人lóng「大感驚異」，而chit-ê被醫好ê乞丐，則「邊行邊跳，頌讚上帝」。Chit-ê醫ê神跡mā是teh回應第二章43節。