使徒行傳 17章1節 到 17章9節   背景資料  上一筆  下一筆
使徒保羅kah西拉離開腓立比城後就來到帖撒羅尼迦。Ná親像往常仝款,in iáu是歡喜先去猶太人會堂見證、分享福音ê信息。M̄-koh真清楚,猶太人不時會teh聽in ê講道了後,kah in辯論。第3節,「我對lín傳揚ê chit位耶穌,就是基督。」chit句話就是使徒保羅tī各地傳福音siōng主要ê內容,mā是kui本新約聖經ê中心主題。m̄-koh beh說明chit句話,就一定tio̍h用koh khah chē ê時間解釋:為甚麼耶穌會受難tī十字架頂,以及伊koh活顯現hō͘眾人看見ê信息。耶穌如成(chiâⁿ)實是猶太人所期待來臨ê基督,ná伊為甚麼會受難?Chit-ê問題mā是早期教會眾信徒共同ê問題,這mā是福音書作者們努力beh處理ê問題之一。

第4節,chit節講:「有kóa敬拜上帝ê希臘人kah婦女界ê領袖mā信了」。Tī腓立比有販賣紫色布匹ê婦女呂底亞kah伊ê全家同齊受洗信耶穌,chit-má tī帖撒羅尼迦chit-ê所在則有婦女界ê領袖信耶穌了,這說明婦女tī福音事工上扮演重要ê角色。M̄-nā án-ne,iáu有人mā加入了福音事工。

第5到9節,有福音ê所在,就有人反對福音ê事工。「當地ê猶太人心內嫉妒,召集了一kóa市井無賴,糾合成群,tī城內引起暴動」,想kā使徒保羅phah死。In衝進耶孫ê厝,真可能是伊ê厝已經成做聚會ê場所。In掠耶孫kah信徒去官府,控告in收留「攪亂天下ê人」。M̄-koh顯然地,in並無充足ê證據,因為án-ne,官員只好ài in交保就tháu放。Ná親像耶穌tī各地傳福音,mā一定有反對福音ê人teh鬧台。這說明聖神teh做工,魔鬼mā想beh teh破壞聖神所做ê事工。

重新查詢 專卷研經 使徒行傳系列
錯誤回報,請聯繫