使徒行傳 15章1節 到 15章21節   背景資料  上一筆  下一筆
Chit章ē-sái講是教會歷史上真重要ê文獻,記載耶路撒冷第一pái使徒會議,討論外邦人加入基督徒團契,是m̄是一定tio̍h遵守猶太人傳統ê割禮,結論是m̄免。

「有kóa人tùi猶太來到安提阿」,chiah-ê人是保守ê猶太人基督徒,in可能原本是屬tī猶太人法利賽派ê分子,非常堅持守割禮ê重要性。In去kā安提阿教會ê信徒講,摩西律法所規定ê割禮,比任何條件lóng重要。Chit種講法tī使徒保羅看起來,等於是kā耶穌ê救恩hō͘降低了重要性,in kā得救kah割禮劃上等號。

第2節,為tio̍h án-ne iáu造成安提阿教會內部發生爭執。就án-ne in決定差派「保羅、巴拿巴,kah當地教會ê幾個人上耶路撒冷」,去向耶路撒冷教會ê「使徒kah眾長老請示」。這mā說明耶路撒冷教會是教會權威ê中心教會。

第3節,chit節講出chiah-ê代表沿路lóng kah其他教會信徒分享tī外面邦開拓福音事工ê成果。

第4到5節,當in來到耶路撒冷教會ê時,確實有受tio̍h好ê接待。M̄-koh法利賽派ê信徒卻是強調「外邦人一定tio̍h接受割禮,mā一定tio̍h遵守摩西ê律法」。

第6節,chit pái ê會議是「經過長時間ê辯論」chiah做出結論。

第7到10節,chit段經文是彼得ê信仰告白。伊kā家己kah哥尼流相tú ê經歷說明出來,因為án-ne,肯定上帝ê聖神mā會tī外邦人中間做工。伊chit段話應該對hit-pái ê會議決定有非常ê影響力chiah-tio̍h。

第11節,彼得真清楚講,要求外邦人守割禮是「m̄-tio̍h ê」,伊強調得救是因為「藉tio̍h主耶穌ê恩典」。

第12節,並無詳細說明巴拿巴kah使徒保羅講kóa甚麼見證,m̄-koh「大家恬恬聽」in兩人tī外面邦地區傳福音kah「所行ê一切神跡奇事」。

第13到21節,chit段經文是耶穌ê兄弟雅各做出結論,可見伊當時已經是耶路撒冷教會ê領袖之一。如果koh再比較加拉太書第二章12到13節,就會發見雅各已經tī耶路撒冷教會得tio̍h非常重要ê地位,連彼得kah巴拿巴lóng對伊讓步。

由雅各做出chit pái議會ê結論:
(1)Bē-sái食祭過偶像ê食物。
(2)Bē-tàng有淫亂ê行為。
(3)Bē-sái食勒死ê cheng-seⁿ kah血。


重新查詢 專卷研經 使徒行傳系列
錯誤回報,請聯繫