約翰三書 1章1節 到 1章15節   背景資料
這是約翰所寫ê第三封phoe,chit張phoe kah第二封phoe比較無仝款ê所在,就是寫明了收phoe者ê名叫該猶,伊應該是作者ê好朋友。其它方面,第二書信kah第三封phoe lóng真相近,寫phoe ê人lóng自稱做「長老」,並且tī第9節指出伊bat寫一封phoe hō͘教會,ē-sái講是並無得tio̍h回應。Mā因為án-ne,作者繼續寫這第三封phoe。

	Chit張phoe非常簡短,總共只有十五節,計二百二十個字。因為第二封phoe是寫hō͘教會,m̄-koh用「女性」來稱呼,就án-ne有人認為第二封phoe是寫hō͘姊妹,而chit張phoe是hō͘一位兄弟讀ê。仝款ê,第三封phoe雖然收phoe者是一位兄弟,m̄-koh伊所代表ê mā是一間教會,作者mā是希望chit張phoe ē-tàng公開傳閱,hō͘ koh khah chē ê人知影。因為phoe內所談ê,是kah教會信仰秩序有密切關係,而這就m̄是個人問題而已,是kah全教會ê秩序有關係。

Chit張phoe mā是講tio̍h有人tī教會裡傳講異端ê信息,而且已經影響tio̍h教會信仰秩序,因為án-ne,作者寫chit張phoe hō͘該猶,肯定伊tī持守真理之道ê用心,mā同時tī phoe中嚴詞譴責狄特腓chit-ê人,講伊破壞教會秩序。Tī phoe中公開chit種人ê名清楚表示chit-ê人已經嚴重攪亂了教會應有ê秩序,為教會帶來真大ê紛爭、困擾。因為án-ne作者寫chit張phoe是希望大家注意防範。Koh講,因為收phoe人該猶是當時教會ê領袖,hō͘伊清楚問題ê所在,同時鼓勵伊會koh khah積極整理教會信仰ê秩序。

第1節,作者表示家己是「長老」,m̄-koh並無署名是甚麼人。這「長老」一詞是猶太人表示長輩、領袖ê意思。Tī希臘文化通常會用「監督」,表示tī一個機構中ê行政首長。Chia真清楚寫出chit張phoe是寫hō͘「該猶」ê。
該猶,chit-ê名tī新約中出現kúi-nā pái,是羅馬人不時使用ê名。真oh確定到底是toh一位,m̄-koh知影伊一定是當時教會中lóng受尊敬ê一位信徒,mā是教會中ê領袖。

「親愛ê」、「誠心所疼ê朋友」,chia連續兩pái所用ê「愛」字,lóng是用希臘文ê「愛」字(agape),表示作者對該猶 ê疼,是真實、無私、奉獻ê疼。Mā thang tùi chia看出伊kah該猶之間親密ê關係。

第2節,作者tī踏話頭ê請安中,mā帶入了祝福ê話語。非常有意思ê,就是作者除了祝福該猶「事事順利」之外,mā祝福伊身軀健康,而且是kah「靈性健全仝款」。Chit種祝福已經teh表示該猶確實在信仰上有真美好ê見證。

第3節,chia開始講tio̍h「真理」chit-ê詞,作者tī短短ê只有十五節經文中,共計提起有五次之多。作者提起伊聽tio̍h該猶「對真理忠誠,一向以真理為生活ê中心」,tùi chit句話thang明白該猶確實在信仰有真好ê見證,因為án-ne,tī第2節作者講伊是一個「靈性健全」ê人。

「對真理忠誠」,chit句話thang參考約翰一書第五章6節所提起ê「聖神就是真理」。約翰三書ê作者beh表明ê點:公開承認耶穌基督降生tī chit世界上ê人,就是有「真理ê靈」tī伊性命裡ê人。Á chit種觀點mā出現tī約翰一書第四章2到3節。該猶就是一個有真實聖神同在ê人,伊就是teh見證耶穌基督確實降生tī這世間ê信息,無偏離基督ê要理。

Koh講,作者講該猶是「以真理為生活中心」,chit句話真清楚說明該猶 m̄-nā維持了信仰原則,而且koh kā信仰用tī生活上,這是講伊是kā「彼此相疼」ê教示運用tī生活中,而伊chit種推動「彼此相疼」ê行動mā hō͘真chē人感受tio̍h「被愛」ê溫暖,因為án-ne,chiah有人kā伊chit種見證傳hō͘作者知影。

第4節,thang看出chit位「長老」作者是kā該猶當做ná親像家己ê「kiáⁿ」一般看待。Chit種寫法主要teh表達寫phoe者kah收phoe者之間有非常親密ê關係,而寫phoe ê人ná親像是老父仝款ê長輩,而收phoe ê人就ná親像kiáⁿ一般是晚輩。Tī看tio̍h家己ê kiáⁿ m̄-nā遵守信仰ê規矩,而且iáu會用信仰規矩來生活,任何當老父ê,一定會感覺非常ê「快樂」。
第5節,作者o-ló該猶對所有ê信徒lóng是用仝款「真誠」ê態度對待,無分別。原因是作者有認bat一陣福音ê伙伴,路經該猶所屬ê教會受tio̍h真好ê款待,而chit群人就是chia所講ê「生份人」,in是一陣真正四界去傳福音ê使者,已經去過該猶所屬ê教會,而且帶tńg來對該猶真好ê評語hō͘作者。

第6節,作者寫這信ê原因,就是chit-má chit群傳福音ê工作者又ài koh一pái經過該猶 ê地區,作者請in kā信帶去hō͘該猶,除了鼓勵該猶之外,mā同時請求該猶盡力協助in tī傳福音ê補給上hō͘ in必要ê協助。
第7到8節,ná親像頭前已經敘述過ê,早期教會傳福音ê特色,教會m̄是只顧家己,卻是知影怎樣協助hiah-ê tī各地傳福音ê工作者,因為支助in,就等於是tī參與chiah-ê「為真理工作」作見證者ê行列。

Chia提起「不接受非信徒ê幫助」,因為非信徒並m̄-bat福音,in提供財物並m̄是為tio̍h見證福音。這mā說明m̄是只要有人捐款協助教會就好,應該tio̍h明辨捐助者是為tio̍h甚麼,á是講想beh tùi幫助中得tio̍h甚麼。

	第9節,chia提起「想作領袖ê狄特腓」chit-ê人。Chit-ê人到底是甚麼人?聖經並無hō͘咱koh khah chē ê資料,只知影伊是tī教會中扮演真重要ê角色(領袖)。

    第10節,作者tī chit節中指出狄特腓幾點惡質ê行為,包括:
一是「m̄-chhap」作者寫hō͘伊ê信。chit-má已經無法度查到作者chìn前寫過ê phoe內容為何,有可能就是beh請求協助接待kah支持傳福音ê同工。另外,作者指出狄特腓所犯ê過錯。

二是狄特腓故意「造謠」生非,「毀謗」作者傳福音ê工作。Chia ê「毀謗」,就是講不誠實ê話,故意傷害別人。

三是siōng惡質ê行為,家己拒絕「接待外來ê信徒」無啥要緊,連想beh「願意接待」好參與福音事工ê人,mā kā伊威脅beh「趕出教會」。
	作者tī chia明白寫出chit位狄特腓ê問題,thang看tio̍h chit-ê人其實就是控制了教會,ná親像是kā教會當做個人私有ê財產仝款,對教會ê存在kah發展來講並無健康。

第11節,作者會tī chit封書信中特別提起狄特腓,伊勸勉該猶「m̄-thang學」狄特腓ê「pháiⁿ」款式,並提醒該猶「tio̍h學好」,這ê「好」是teh指「愛」講ê,意思就是beh用疼來贏過hiah-ê做pháiⁿ事ê人,án-ne chiah ē-tàng看出基督徒kah非基督徒tī信仰上ê差別所在。因為只有「好行為」chiah ē-tàng見證上帝ê慈愛。

第12節,chit節提起另外一個人,就是「底米特」。Chit-ê人是甚麼人?並無詳細ê資料thang佐證。雖然有ê學者認為tī使徒行傳第十九章24到27節提起有一個名叫「底米特」ê銀匠,á是tī歌羅西書第四章14節提起使徒保羅之傳福音伙伴「底馬」可能就是「底米特」,m̄-koh資料lóng m̄齊全。M̄-koh chia講「底米特」確實是tī福音事工上有美好ê見證,tú好kah頭前提起ê狄特腓顛倒。

第13到14節,chit段結尾ná親像第二封phoe仝款,作者lóng講想beh「當面」kah該猶見面,因為「iáu有真chē話」想kah伊懇談。Chit張phoe表示作者可能真緊會去chhōe該猶。

第15節,「願你平安」,這是作者直接對信徒該猶 ê祝福。Tùi chit節mā thang看出作者kah該猶 ê教會之信徒真熟,chiah會ài該猶替伊向所有ê信徒「一一請安」。

重新查詢 專卷研經 約翰三書系列
錯誤回報,請聯繫