撒母耳記下 4章1節 到 4章12節   背景資料  上一筆  下一筆
Tùi撒母耳記下第四章他施波設被暗刣ê事件,就thang看出押尼珥ê重要性,至少伊穩定了北部以色列ê軍心,會繼續擁護掃羅ê政權。M̄-koh押尼珥被殺害後,其他ê軍事強人就想beh搶功,m̄-koh chit兩位重要軍官所做ê事,卻是大衛所討厭ê行為。作者透過chit種方式teh說明一件事:bē-tàng殺害無辜ê,chit點mā是聖經非常重要ê教導。特別是擁有權力者若是會殺害無辜ê,ná會造成社會ê混亂kah不安。Koh khah嚴重ê是án-ne ê行踏,等於teh藐視上帝創造性命ê榮耀kah尊嚴。

第1到3節,chit段經文先提起他施波設kah以色列人聽tio̍h押尼珥被謀刣了後,lóng恐慌不安,ná親像頭前所講ê,押尼珥確實是北部以色列ê領導者,卻m̄是他施波設。Chia mā先紹介他施波設身邊ê兩位重要軍官—巴拿kah利甲。

第4節,「米非波設」,chit-ê名原本是teh指「米力‧巴力」(參考歷代志上八:34),意思是teh指:巴力ê敵人。編者kā chit節編輯tī chia,用意beh說明掃羅家siōng優先繼承王位ê人,並m̄是他施波設,卻是約拿單。M̄-koh,約拿單戰死戰場,而hit時米非波設因年紀chiah kan-taⁿ五歲而已,無可能繼承王位,加上伊ê奶媽帶伊逃亡ê時,不慎跋倒而hō͘伊因為án-ne變成瘸腿,根本就無條件kah siōng小ê a叔他施波設á是其他有意爭奪王位ê人爭權。chit-má他施波設已經統治以色列七年了,米非波設mā應該是十二歲,作者特別beh hō͘讀者知影,就算chit-má米非波設想beh繼承王位,mā會因為尚且年輕,而容易被擁有軍權ê 將領所挾持。

第5到8節,他施波設身邊ê兩位軍長巴拿kah利甲,利用炎熱ê中晝侵入伊寢室刺殺伊,可見當時ê軍隊已經bē穩定。而且刺殺ê手段非常殘忍,in是kā他施波設ê頭割落來,然後手the̍h頭顱去見大衛,chit種情形ná親像hit位亞瑪力人割落掃羅ê頭仝款(參考一:10)。In對大衛講he是伊ê「仇敵掃羅ê kiáⁿ他施波設ê頭」,其實,tī大衛ê心中,掃羅並m̄是伊ê仇敵,是掃羅kā大衛看做是仇敵,因為án-ne掃羅chiah會一直想beh殺害大衛ê行動。顛倒,大衛一直尊崇掃羅是上帝所揀選ê君王,因為án-ne,伊一再強調上帝揀選ê君王m̄-nā bē-tàng刣(參考撒母耳記上廿四:6、10、廿六:9),卻是只有ē-tàng保護。為tio̍h án-ne,當巴拿kah利甲kā他施波設ê頭帶來hō͘大衛ê時,iáu認為是替大衛報仇。M̄-koh大衛kah他施波設之間根本lóng無仇恨thang講。

第9到12節,大衛m̄-nā無接納in ê作法,甚至嚴厲責備in chit種bē-tàng原諒ê行踏。大衛指「永生上主chiù-chōa」,表示chit位上帝是永活ê上帝,祂親目看tio̍h chit兩位軍長所行ê惡質ê行為。因為án-ne,人ê任何動機kah行為lóng無法逃過上帝ê目睭。大衛強調他施波設是「無辜ê人」,chit-má,chit兩位軍長竟然是侵入國王ê厝,teh beh tī睏落眠中ê國王刣死,koh khah是罪bē-tàng赦。因為án-ne,大衛責備in是「罪大惡極ê人」。值得注意ê是,大衛ē-tàng處理chit兩位軍長ê惡質行踏,卻無法度處置約押抗命ê行為。理由是chit兩位軍長,並無真正實力,為tio̍h án-ne ê時ê北部以色列已經因押尼珥往生而失去戰鬥力。M̄-koh約押是南部猶大ê主kā,猶原擁有極大ê軍權。Koh講,大衛稱他施波設是「無辜ê人」,並無講伊是上帝所揀選ê君王,kah伊一再稱呼掃羅是「上帝所揀選ê君王」,真無仝款。顯然ê,他施波設tī大衛眼中,地位並無高。M̄-koh大衛iáu-koh認為chit種謀害人ê事,是bē-tàng原諒ê,何況是謀害家己ê國王,koh khah是罪bē-tàng赦。就án-ne大衛下命令kā chit兩位軍長處死,而且是用接近分屍ê極刑。然後大衛kā他施波設埋葬tī「押尼珥ê墳墓內」,表示kā它埋葬tī以色列ê國家墓園。然後,kā chit兩位軍長ê屍體「掛tī希伯崙ê池旁」,chit種處理屍體ê方式,kā它稱做「曝屍」,是一種嚴厲懲罰被處死ê人(參考約書亞記八:29),用來表示chit-ê人ê後代kiáⁿ孫,bē有幸福、安定ê生活,這mā是聖經時代中東地區ê社會,侮辱被處死者了kiáⁿ孫ê方式(參考列王記上十六:4)。

重新查詢 專卷研經 撒母耳記下系列
錯誤回報,請聯繫