撒母耳記下 16章15節 到 16章23節   背景資料  上一筆  下一筆
Tùi第十六章15節開始直到第十七章14節止,chit段經文就是teh描述一個tùi大衛身邊叛變ê顧問亞希多弗,kah一直忠心tī大衛ê身邊親信戶篩,in二人之間ê「鬥智」經過。作者最後補上了一句押沙龍ê話,講:「戶篩ê建議比亞希多弗ê好。」就án-ne說明大衛會koh一pái tńg來到耶路撒冷重掌王權,而押沙龍最後則phah敗仗來死。

Chit段經文主要teh說明亞希多弗án怎幫助押沙龍,hō͘以色列人民中知影,押沙龍確實是已經取代了大衛ê王權。Á伊ê建議是用當時中東地帶普遍流行ê方式,就是kā前代王朝ê宮女接收成做家己ê妃嬪,而這tī以色列人民ê信仰中,看做是一種亂倫ê行為。

第15到17節,戶篩看見押沙龍kah擁護伊ê隨從進入耶路撒冷ê時,就趕緊出去迎接,並用真虛假ê話奉承押沙龍。Á押沙龍是一見面就用真諷刺ê話語問伊講,為甚麼無koh對大衛忠chiâⁿ了,意思是teh指戶篩為甚麼棄sak大衛。

第18到19節,這是戶篩回答押沙龍ê話。戶篩講伊會án-ne留落來,是因為伊「忠於hit位被上主、人民,kah所有以色列人揀選ê人」,chit句話聽tī押沙龍ê耳á一定真感動會信認為真。戶篩是故意作態表示全力支持押沙龍,其實,伊真實ê目的是beh獲取情報,是對老主人大衛效忠。

第20到21節,押沙龍想beh了解伊繼承王位了後,應該做kóa甚麼事?伊問亞希多弗ê意見。亞希多弗建議押沙龍去kah老父大衛ê妃嬪「睏」,這是當時中東地帶ê慣例,表示繼承前朝所留落來所有權,bó͘ kah細姨表示全部權利(參考三:7,列王記上二:22)。亞希多弗會án-ne ê建議,其實就是beh hō͘押沙龍kah老父大衛完全斷絕父子關係,這是非常殘忍ê建議。M̄-koh chit種建議,已經破壞了原本摩西律法對以色列人民ê教導。Mā thang án-ne講,押沙龍是擁有政權,卻破壞了宗教信仰ê規律。Chit種傷害比奪tio̍h政權、擁有政權,對以色列人民造成ê傷害iáu koh khah嚴重。

第22到23節,果然,押沙龍聽從亞希多弗ê建議,就tī大家金金teh看下tī王宮ê陽台頂kah大衛ê妃嬪同床,這m̄-nā是teh侮辱家己ê老父,mā等於是宣告伊kah大衛之間已經完全斷絕à。作者有意說明一件重要ê信仰認知:當人自認為真聰明ê時,tī上帝看起來可能是愚笨ê;相對ê,當人忠實tī上帝ê話語,tī人看起來可能是愚戇ê,m̄-koh tī上帝眼中,he是聰明ê選擇。過去大家lóng認為亞希多弗是真有能力、真聰明ê好幕僚,因為過去tī大衛王朝ê時代,亞希多弗bat是朝廷中lóng受尊崇,chit-má伊是受tio̍h押沙龍ê倚重。M̄-koh若m̄是出tī上帝ê旨意,人ê自認為聰明可能就是愚笨。

重新查詢 專卷研經 撒母耳記下系列
錯誤回報,請聯繫