提摩太前書 1章1節 到 1章11節   背景資料  下一筆
真清楚,使徒保羅對伊得意ê門徒提摩太確實有堅決ê信任,並且對伊有真chē期待。

Tī chit章經文中,thang分做兩段落,一是第1到11節,伊勸勉提摩太一定會嚴厲譴責hiah-ê tī教會中虛假ê教導。二是第12到20節,使徒保羅一貫ê思想,就是tńg來到耶穌基督ê救恩裡,只有án-ne,人chiah ē-tàng看見上帝憐憫ê疼。伊同時指責悖逆真理ê舒米乃(許米乃Hu-mé-nái) kah亞歷山大兩人。

Tī chit段經文中,使徒保羅用第1到2節講chit張phoe ê信徒就是伊所歡喜ê門徒提摩太。然後tùi第3節開始,伊提起tī教會中有人傳講hiah-ê無正確ê信息,而chit種現象m̄是只有一間教會,卻是真chē教會lóng有仝款ê問題。

第1到2節,使徒保羅就以「使徒」自稱。為甚麼伊會án-ne?就是因為早期教會內,lóng是有人歡喜講權威,認為「使徒」siōng重要,地位siōng koân,而使徒保羅並m̄是in認定ê使徒。M̄-koh使徒保羅自認伊之所以當「耶穌基督ê使徒」,是因為「上帝」kah所「ǹg望基督耶穌ê命令」下而擁有「使徒」ê身分。然後伊講提摩太是伊tī「信仰上ê真kiáⁿ」,chit句話已經表明伊kah提摩太之間有ná老父和kiáⁿ一般ê親密關係(參考腓立比書二:22)。使徒保羅一向kā聽tio̍h伊所傳ê福音而信主耶穌基督ê人,看做是伊tī信仰上所生ê「kiáⁿ」,連伊所建立ê教會mā是用chit種看法(參考哥林多前書四:14—15)。

	續落來,使徒保羅用「主耶穌基督賜恩典、憐憫、平安」做祝福提摩太ê話語。這通常mā是當時羅馬人書寫信函ê一種方式,會tī phoe ê起頭先請安對方,並祝福收phoe者。

第3節,tī chit段經文中,使徒保羅提起伊寫chit張phoe ê主要原因之一,就是希望提摩太繼續留tī以弗所城,主要原因是該教會有人teh傳「無正確ê教義」。Chia並無提起甚麼是「無正確ê教義」?m̄-koh tùi提多冊第一章10節thang發見所謂傳「無正確ê教義」ê人,就是「主張受割禮ê猶太基督徒」,in認為:無論甚麼人,若無按照摩西律法ê規定接受割禮,就無法度得救(參考使徒行傳十五:1),chit-ê問題m̄-nā發生tī以弗所教會,mā發生tī安提阿、加拉太等地ê教會。使徒保羅為tio̍h án-ne非常受氣,嚴厲譴責傳chit種信息ê人,就是teh傳「另外一種福音」,伊甚至嚴肅地警告講,傳chit種信息ê人應該受tio̍h詛咒(參考加拉太書一:6—9)。

另外一點,所謂「無正確ê教義」,真可能kah早期教會內非常流行ê觀念有關,就是「諾斯底主義ê思想」,chit種思想強調人ê性命thang分做兩個主要部分,其一是肉體ê,另外一個是靈魂ê。Chit種思想認為肉體是敗壞ê,因肉體是hō͘邪惡ê氣力控制,靈魂chiah是屬tī上帝ê。因為靈魂是聖潔ê,而上帝是聖潔ê上帝。如果是án-ne,就會延伸出一個koh khah嚴肅ê問題出來,耶穌基督並無真正地生存在chit-ê世界,伊只是「暫時借tòa」tī邪惡ê肉體中,因為án-ne,當伊往生ê時,神聖ê靈魂就離開了chit-ê邪惡ê肉體。若án-ne推演落去,耶穌基督就無真正koh活。

第4節,chit節hō͘咱看tio̍h使徒保羅提醒提摩太到以弗所教會去ê時chūn,beh指導該教會ê信徒,「放棄hiah-ê荒唐ê傳說kah冗長ê族譜」。Tùi chit句話中,ē-tàng看出,這並m̄是來自外邦人ê問題,卻是一陣猶太基督徒對信仰ê看法產生ê錯謬。使徒保羅是強調,siuⁿ chē chiah-ê「傳說」對信仰並無真實ê意義,因為信心mā一定tio̍h建立tī理智、知識ê範圍內,chiah bē hō͘信仰變成迷信。Á族譜代表血緣ê傳承,hō͘人會因為án-ne想獨佔上帝ê救恩,而kā耶穌基督救恩限制了,對上帝拯救ê恩典一點幫助mā無。

第5節,ē-sái講是使徒保羅「命令」提摩太前往以弗所教會ê主要用意,伊希望提摩太帶hō͘以弗所教會ê,就是beh hō͘ in知影怎樣彼此互相激勵tī疼心ê事頂面多下功夫。伊特別提起三點有關疼心ê認bat:一是純潔ê心。意思是teh指無不良ê動機,是真實ê心內意念。二是潔白ê良知。這是teh指心內反省ê能力,對道德行為有良善ê準則。三是純真正信心。表示一個人對上帝絕對忠實,無虛假ê態度。另外一個重要ê意思,是teh指真誠。親像發見有錯誤ê行為,就beh指證出來,m̄是驚得罪人,koh感覺pháiⁿ勢。

第6到7節,使徒保羅提醒提摩太注意,教會內部會發生ê問題,就是有kóa人kā前述三種tī信仰團契中真重要ê要件hō͘疏忽了,in去聽hiah-ê「無正確ê教義」、「荒唐ê傳說kah冗長ê族譜」。換句話講,已經有信徒離開了教會,去追逐chiah-ê荒謬ê邪講。Chit種行踏m̄-nā hō͘家己陷入迷信,mā會造成教會ê傷害。

第8到10節,tùi chia thang看出使徒保羅並m̄是反對摩西律法,伊甚至tī chia真清楚講「ē-tàng合宜地使用律法,律法原是好ê」。Tī chia伊提起一個基本觀念:一個基督徒ê得救,是因為伊清楚知影並m̄是因為遵行律法ê規定,卻是因為耶穌基督ê救恩,chit點mā是伊所有書信中所siōng重視ê信仰觀念。使徒保羅tī chit兩節中,提出一kóa tī伊看起來行為已經背離了社會生活規範ê事。其實,chiah-ê列舉出來ê共計有十四項,其中前六項,ē-sái講是kah對上帝ê忠實有關,後八項則kah社會生活相連接。Mā tùi chia ē-tàng看出,chiah-ê所列舉出來ê事項,有十誡ê內涵。

第11節,chia提起「健全ê教義」,意思是teh指幫助人領受福音了後,所帶來豐富ê性命。Mā就是kui個性命kah上帝相連結。Á ē-tàng hō͘人kā全部性命連結tī上帝ê,就是透過耶穌基督ê福音。

重新查詢 專卷研經 提摩太前書系列
錯誤回報,請聯繫