Chit段經文記載約櫃送tńg去以色列ê過程，同時描述以色列人中間有人因為偷窺約櫃來死亡ê悲劇。

第13到16節，chit-má chia講約櫃tńg來ê時chūn，tú好是麥á收割ê時chūn，chit時應該是tī五、六月間。因為án-ne，推算tńg去，約櫃被奪去ê時間，大約是tī年前ê十一月。正tī麥田收割ê以色列人民看tio̍h約櫃tńg來ê時，hit種興奮ê心情用腳頭u想mā知。這teh表示過去七個月，in差不多無法度聽tio̍h上帝ê聲音。因為約櫃不tī in中間，上帝mā bē出現kah in講話。以色列人民隨時kā載運約櫃kah賠償禮物ê車當柴火，並kā兩頭母牛當祭牲禮，獻hō͘上帝。表示因為約櫃重頭tńg來in中間，beh向上帝獻上感恩。而同來ê五個非利士人領袖因為達成任務，就安心tńg去各自ê城市。

第17到18節，非利士人所送ê「五個金鑄瘡皰模型」，是teh代表非利士人ê五個城市，而「五隻金老鼠」，teh代表五個城市ê首領，以及in所管轄ê城市、庄頭，chiah-ê lóng teh表示全部非利士人lóng向耶和華上帝認罪。

第19節，這是真值得注意ê一節。Tī民數記第四章17到20節特別提起，一定tio̍h有資格ê利未人chiah thang看守約櫃等聖物。若無，會付出死亡ê代價。chit-má chia講有「七十個伯‧示麥人」因窺探約櫃來死亡。M̄-koh mā有學者認為這bē是上帝ê意思，而認為可能是當伯‧示麥城ê人歡喜去迎接約櫃ê時，無小心接觸tio̍h非利士ê五個首領，結果感染到鼠疫而往生。M̄-koh有kóa聖經版本ê翻譯表示：chiah-ê人是無去迎接約櫃ê人，m̄-koh無論是甚麼原因，這至少說明一件非常重要ê認bat：bē-tàng輕藐約櫃，它teh代表上帝ê同在。

第20節到第七章1節，可能是受tio̍h第19節發生有人因摸到約櫃來死亡ê事件，致使伯‧示麥城ê人開始緊張起來，因為án-ne mā希望約櫃遠離in。Chit時chūn，基列‧耶琳城ê人表示願意kā約櫃khǹg tī in ê一個「亞比拿達」ê厝裡，同時委派伊ê kiáⁿ「以利亞撒」負責看守約櫃。根據出埃及記第六章23節ê記載，「以利亞撒」kah祭司ê家族有關連。Iáu有，就是tī頂pái ê戰爭中，示羅ê聖幕可能已經遇tio̍h破壞。M̄-koh為甚麼beh送到亞比拿達ê厝裡去khǹg，而且一khǹg就長到二十年之久，這就bē-tàng而知。