撒母耳記上 24章1節 到 24章15節   背景資料  上一筆  下一筆
Tùi第廿三章19節開始,一直到第廿六章25節:
連續記載三段有關大衛本thang出手輕易殺害掃羅,以及kah伊對敵ê 拿八,m̄-koh伊都無án-ne做。Chiah-ê lóng tī說明一個重要ê主題,就是tī第廿五章31節所講ê,hō͘大衛bē致使因為無故刣人,á是替家己報仇而後悔。Chit種觀念對tī一個準備會成做君王ê大衛來講,是非常重要ê。Mā teh說明一個以色列君王,一定tio̍h用chit種態度治理上帝ê子民。換句話講,掃羅一再殺害無辜ê,chit種君王bē是上帝所歡喜ê。

第19到20節,chia講西弗城人出賣大衛,kā大衛bih起來ê所在kā掃羅講。Tī大衛看起來,真正敵人是非利士人,因為án-ne,只要是非利士人phah以色列人民,伊就beh出面抵擋,ná親像基伊拉城ê事件仝款。伊不想beh kah掃羅對抗。

第21到23節,掃羅聽tio̍h西弗人án-ne對伊表示忠chiâⁿ之心,就回應in。掃羅講大衛是一個「真奸巧」ê人,必要ê話,即使總動員搜遍了各部落,mā無teh可惜。伊mā o-ló西弗人,講in對伊真好。西弗人是南方猶大族ê人,而基伊拉城居民mā是南方猶大族ê人。In lóng對掃羅忠chiâⁿ。當掃羅聽tio̍h西弗人ê通報了後,隨時ài in koh再去查清楚,看大衛bih tī tó位,甚麼人看過伊,chiah-ê話lóng已經teh暗示,若發見大衛藏匿tī tó位,hit家人會親像亞希米勒ê家族hit種遇tio̍h滅族大屠殺。甚至連看見而無通報ê,lóng會列做被屠刣ê對象。

第24到25節,chiah-ê西弗人真緊to̍h phah探出大衛藏匿tī「瑪雲荒野」之地。這地點就是現今ê「瑪因廢墟」(Khirbet Ma’in)。設tī希伯崙南方大約有十三公里、西弗以南約七公里處。Chia mā是拿八ê故鄉(參考廿五:2)。In趕緊向掃羅通報。掃羅隨時chhōa部下搜捕。M̄-koh大衛mā有眼線,當掃羅開始大肆搜捕伊ê時chūn,有人來向伊通報。因為án-ne,大衛就koh bih起來,m̄-koh顯然搜捕伊ê人相當chē,hō͘伊ê行蹤真緊to̍h顯露出來。

第26到27節,因為大衛身邊帶著有六百個隨從,只要小khóa一動,就真容易引起掃羅chit pêng搜捕隊伍發見。果然,掃羅ê部下真緊to̍h發見了大衛kah伊跟隨者ê蹤跡,並且差一點á就被掃羅ê搜捕隊伍掠tio̍h。作者siōng想beh表達ê一個信仰觀念:有上帝同在ê人,tī siōng危險ê時刻,mā會得tio̍h上帝ê庇護、看顧。

第28到29節,就tī掃羅teh要掠tio̍h大衛ê時,非利士人卻tī chit時chūn來à,這說明時間掌控tī上帝手中,一切lóng是上帝奇妙ê安排。逼kah掃羅只好趕緊班師tńg去抵擋非利人ê侵犯。

Chit章是延續第廿三章掃羅搜捕大衛ê事件。前一章講tio̍h tī瑪雲荒野,掃羅差不多就teh要緝拿-tio̍h大衛ê時,忽然接tio̍h信報,講有非利士人來進犯以色列國境,hō͘掃羅不得不趕緊率部下tńg去防禦。等到phah退了非利士人之進犯後,伊koh繼續chit項緝捕ê行動。換句話講,tī掃羅心中,除非刣死大衛,若無,伊一定bē善罷甘休。可見伊是jōa-ni̍h-á痛恨大衛。Chit章講大衛有機會殺害掃羅,m̄-koh伊無án-ne做,因為伊是上帝所揀選出來ê君王。

Chit段經文講掃羅一直無停地四界去搜捕大衛,m̄-koh搜捕ê行動m̄-nā無成功,反tńg是被大衛「突擊」差一點á殺害。M̄-koh大衛無án-ne做,伊留落來掃羅ê性命,並且hō͘掃羅知影為甚麼伊無出手殺害伊。

第1到3節,這是緊接第廿三章28節,講掃羅「tńg來師去phah非利士人」。chit-má已經kā非利士人「進犯」以色列ê事處理好勢,伊koh tńg來到大衛藏匿ê地點「隱‧基底」。大衛歡喜藏匿tī chit所在,可能kah chit所在ê地理環境有關,除了附近山丘上洞穴多之外,koh講,hia水源豐富,有具備人生存ê要件。當掃羅知影大衛藏匿地點,就率領以色列精銳部隊三千名beh去搜索大衛。當掃羅來到一個磅空,想入去解手ê時chūn,伊萬萬無想tio̍h大衛就藏tī chit磅空內。Á這tú好hō͘大衛一個真好ê機會,thang突擊掃羅,何況掃羅tú好落單,無侍衛tī身邊。

第4到7節,chit-má換做大衛ê部下發見掃羅tī洞穴內解手,hō͘大衛知影這是一個反撲除掉掃羅ê機會。就án-ne大衛是悄悄地爬到掃羅ê身後,然後「割落掃羅所穿ê棉袍ê一角」,chit種動作已經說明大衛有夠額ê機會kah力量殺害掃羅。M̄-koh伊無án-ne做,而只有kā掃羅ê衫褲切割一塊落來而已。大衛用chit種方式teh證明:伊無想叛變、密謀殺害掃羅ê意思。所有過去掃羅聽tio̍h有關大衛ê事,lóng是錯誤 ê訊息。若chiâⁿ實beh殺害掃羅,伊m̄免只割落伊穿tī身上之棉袍ê一角。然後大衛認為有必要對伊ê部下解釋,伊之所以有chit種「割落棉袍ê一角」動作ê原因。大衛強調掃羅就是國王,因為án-ne伊tī chia稱呼掃羅是「我主」、「伊是王」,koh khah重要ê是伊hō͘部下知影掃羅就是「上主所選立ê君王」。殺害上帝選立ê君王(奴僕),等於是teh抵擋上帝仝款。這mā是聖經作者beh表達ê一個重要觀念:上帝ê奴僕,一定tio̍h尊重、維護。就án-ne大衛說服伊ê部下不准傷害掃羅。

第8到15節,當掃羅解手了後起身行出磅空ê時,大衛chit時追出去kah伊說明kui個事件ê經過。伊the̍h出一塊伊割落ê布hō͘掃羅知影,伊原本有機會殺害伊,m̄-koh伊無án-ne做,因為:一是伊無做出失禮掃羅ê事。二是伊hō͘上帝當公正ê審判者。Tī第13節伊用「死狗」、「ka蚤」來形容家己,mā用chit種方式來描寫掃羅已經會失去王者ê風範,竟然去做chiah-ni̍h無tap-sap ê芝麻小事,卻m̄是帶領以色列人去對抗、防禦非利士人侵犯ê chit種大事。

Tùi第12到15節thang看出基督教信仰非常重要ê信息之一:伸冤tī上帝,祂是會報應ê上帝(參考羅馬書十二:19,約伯記三十四:11,箴言廿四:12)。

重新查詢 專卷研經 撒母耳記上系列
錯誤回報,請聯繫