撒母耳記上 22章11節 到 22章23節   背景資料  上一筆  下一筆
Chit段經文描述掃羅做一件非常不應該ê殘酷事件,就是大屠殺祭司亞希米勒、伊ê族人,kah挪伯城ê居民,這是非常不應該ê事,mā是上帝所無法度容忍ê事件。

第11到12節,tī多益ê告狀了後,掃羅隨時傳喚祭司亞希米勒kah伊ê全家,共計有85名,這mā teh表示chiah-ê人根本就m̄知發生甚麼事。

第13節,掃羅直接提出控告亞希米勒ê罪狀:一是陰謀對抗國王;二是為何資助朝廷通緝要犯大衛?三是為甚麼替chit種人求問上帝?掃羅提出chiah-ê控訴ê主要原因,是認為亞希米勒「背叛」伊,而且準備ài「刣伊」。Tī當時,背叛國王等於是叛國。因為án-ne,伊認為亞希米勒幫助大衛,就等於是kah大衛共同「陰謀對抗」仝款。

第14到15節,這是祭司亞希米勒ê答辯。伊並無認為大衛是叛國者。理由有下列幾點:大衛是「siōng忠心ê臣僕」,而且國王ê kiáⁿ婿,是宮廷裡siōng受敬重ê人,而且伊執行祭司ê職務,向上帝詢問旨意,mā m̄是第一pái。M̄-koh伊承認家己並m̄知大衛是朝廷要犯。因為án-ne,伊請求掃羅息怒, mài怪罪伊á是伊ê全家。不過,當亞希米勒提起大衛是「宮廷裡siōng受敬重ê人」ê時,chit句話tú好刺傷tio̍h掃羅ê心,因為伊siōng驚ê就是民眾mā有仝款ê講法,這mā是掃羅對大衛產生嫉妒ê原因(參考十八:9),而且因為大衛戰勝非利士人有功,tī民間ê聲望大大超過掃羅(參考十八:16、30)。

第16到19節,掃羅當然bē接受亞希米勒chit種辯解,隨時就講伊kah伊ê親屬lóng該死。隨時下命令ài侍衛刣死亞希米勒kah伊ê全家,m̄-koh無人敢án-ne做,原因可能是in知影掃羅想刣大衛ê理由並無充分。因為án-ne,掃羅故意嫁禍hō͘ chiah-ê祭司。In表現出來ê,就是m̄敢殺害無辜ê,因為這m̄是摩西律法所禁止ê事(參考出埃及記廿三:7)。因為án-ne,掃羅ài這檢舉人多益去殺害chiah-ê祭司。果然,多益照掃羅ê話去做。多益會án-ne做是因為伊是檢舉者,就一定tio̍h先出手刣死伊,m̄-koh照摩西律法規定,mā一定tio̍h有兩個人以上做證人chiah thang(參考參考申命記十七:6—7,列王記上廿一:10),掃羅ê命令連chit種基本要件mā無符合。不過,多益若無出手,就表示伊ê舉證是假ê,變成伊做偽證,換伊會被處死。不過有另外一個原因,是多益想beh討好掃羅,án-ne,chiah ē-tàng保全伊ê官位,hō͘伊留tī宮廷teh過富裕ê生活。多益chit-ê刣,竟然刣死chē kah八十五位「有資格穿戴以弗得ê祭司」,這是一種「趕盡刣絕」ê作法,掃羅認為án-ne,就bē有後顧之憂。Koh khah殘酷ê是m̄-nā kā所有「穿戴以弗得ê祭司」全部殺害,而且連挪伯城裡所有ê人,「不管男女、嬰á á是幼童」,甚至連動物lóng刣死。Chit種作法已經teh表明:掃羅ê心中根本to̍h無上帝。因為chiah-ê「牛、羊、驢á」等動物,lóng thang用來當做獻祭ê動物,連in mā被掃羅刣死。Án-ne,伊m̄-nā毀了所有thang協助、參與祭典之工作者祭司,mā毀了所有thang供做獻祭ê用品。Koh講,chit-má連想beh詢問上帝旨意ê「以弗得」mā無à。表示掃羅kah上帝ê關係真正是一刀兩斷à。

第20到23節,chit段經文講tī大屠殺中,亞希米勒ê一個kiáⁿ亞比亞他逃掉了,伊逃到大衛hia去,大衛收留了亞比亞他,並表示會保護伊ê安全。另外一方面,大衛bat tī宮廷生活ê人,伊mā知影掃羅是一個殘酷ê君王。因為án-ne,伊講當時伊發見多益在場ê時,就深覺不妙,一定會發生抄家滅族ê殘酷報復行動。伊對亞比亞他承認chit件事kah伊有關係,所以伊有責任負起亞比亞他ê安全。



重新查詢 專卷研經 撒母耳記上系列
錯誤回報,請聯繫