第十二章mā ē-sái講是先知撒母耳「退休」ê告白，ná親像約書亞tī往生chìn前對以色列人民最後ê忠告仝款。chit-má先知撒母耳一再叮嚀以色列人民，一定tio̍h專心事奉上主，遵守祂ê誡命，án-ne chiah ē-tàng保有上帝所賞賜hō͘ in khiā起ê土地。為tio̍h beh表示伊所講ê話是thang信ê，先知撒母耳iáu施行一pái神跡，來顯示伊所講ê話lóng實現à。

Chit段經文是先知撒母耳用以色列人出埃及ê歷史，hō͘ in知影選擇君王所呈現出來ê信仰問題。Chia雖然無寫出是tī甚麼情形之下聚會而講ê，m̄-koh真可能kah重要節期有關，chit點thang tùi第17節所講ê「旱季」看出，是tī收割ê季節，mā可能就是「五旬節」ê時chūn，民眾聚集相當chē，真chē遠地ê以色列人，lóng會相聚到當時ê敬拜中心—米斯巴，獻上「初熟ê果子」hō͘上帝（參考利未記廿三：9—11、14）。

第1到3節，先知撒母耳表示伊已經為以色列人選出一位新ê王。chit-má伊自認是「已年老」。第3節是非常特別ê一節經文，先知撒母耳為甚麼會提出chiah-ni̍h嚴肅ê問題，tio̍h以色列人指出伊有無犯錯？伊提出幾個問題：一是貪婪、二是欺騙、三是收受o͘-se。Chit三項其實lóng是teh指tio̍h一點：誠實。先知撒母耳認為家己真誠實地teh帶領in。因為án-ne，伊問以色列人民是m̄是有發覺伊犯了頂面所講三件事，若是有，thang tī新王ê面前控告伊。伊án-ne講是為tio̍h beh表示家己是真清白ê卸下領導者ê地位kah角色。伊會提出ê chiah-ê問題，真可能teh暗示以色列人民中間有人控訴伊kiáⁿ有頂面所講chiah-ê不正當ê行為，是kah伊有關係。Á伊chit-má beh表明ê是：如果伊ê kiáⁿ真正犯chiah-ê事，是kah伊有關係，伊願意接受新王ê制裁kah懲罰。

第4到5節，民眾m̄-nā當場表示in承認先知撒母耳確實是清白，而且用chiù-chōa ê語句表明in對先知撒母耳的確信。

第6到8節，先知撒母耳真清楚tùi歷史經歷來提醒以色列人民，伊先tùi上帝揀選祂ê奴僕摩西kah亞倫帶領in ê祖先出埃及，這是上帝所行ê奇妙神跡。伊若是beh hō͘以色列人民知影謹記出埃及ê歷史，chiah會hō͘ in知影保存感恩ê心，ài會記得in今á日ē-tàng有chit片迦南土地thang khiā起，就是上帝特別ê恩典。

第9到12節，續落來先知撒母耳beh「指控」以色列人，講in不時bē記得上帝以及kah上帝ê誓約，而棄sak上帝，去拜別ê神明（參考士師記二：10—13、18—19），mā因為án-ne chiah會有外族人，包括非利士人、摩押人，kah夏瑣城ê將軍帶領軍隊來攻打in，這mā是in承認ê事。當以色列人民tī異族統治之下受苦ê時，in呼求上帝，上帝就差遣「基甸」、「巴拉」、「耶弗伊」等士師帶領in，hō͘ in有平安ê日子thang過。M̄-koh chit-má為tio̍h beh抵抗亞捫王the̍h轄ê攻擊，竟然是要求先知撒母耳為in立一個王，只是為tio̍h beh chhōe人領導in抵抗外族人ê侵犯（參考撒母耳記上八：20、九：16）。先知撒母耳認為這是因為以色列人民已經對上帝ê帶領、庇護，會失去信心ê緣故，所以chiah會提出chit-ê要求。