撒母耳記上 11章1節 到 11章7節   背景資料  上一筆  下一筆
第十一章主要是teh回應第十章27節所記載ê,tī以色列人中間,有人因為抽籤選出來ê第一位國王是掃羅而感覺不滿,認為伊無法度「救」以色列人民脫離敵人ê手。Chit章就是teh說明只要是上帝揀選ê人,必定有能力帶領上帝ê子民脫離敵人ê壓迫、攻擊。因為上帝會kah祂所揀選ê人同在,hō͘伊有能力完成被揀選ê使命。

掃羅雖然已經被抽中選立為以色列人民ê國王,m̄-koh伊並無王宮á是特定ê所在執行伊做國王ê工作,卻是和平常仝款,繼續tī田裡工作。這可能kah in過去從來無過君王制度有關。Koh講,當時以色列人民要求設立國王ê主要目的,是為tio̍h beh相刣(參考八:20、九:16)。因為án-ne,平時若是無戰事,國王ná親像平民一般過生活。

第1到3節,chit段經文記載亞捫人beh攻打以色列人民khiā起ê基列境內ê雅比城。而且in ê態度傲慢,高傲到連hit-ê城人民想beh投降,mā得每一個人挖出一隻目睭當做投降條件,是非常殘酷。為tio̍h投降而挖掉正目,m̄-nā是一種凌辱,koh khah嚴重ê,是hō͘ in失去作戰ê能力,因為使用弓箭需要用正目。雅比城ê長老要求寬限七工去請求援助,如果無結果chiah接受the̍h轄ê統治。

第4到7節,掃羅tī聖神感動充滿下,馬上hō͘伊tùi一個作穡人,成做一個正港ê軍事領袖。伊決定帶領以色列人民去kah亞捫人相刣。為tio̍h beh激勵以色列人民,伊宰刣兩頭牛,除了當獻祭之外,mā teh表明所有ê以色列人民lóng一定tio̍h參與相刣,這是關係tio̍h kui個民族生存ê要件。Tio̍h注意ê是第7節,chia講上帝ê震怒hō͘以色列人民驚惶,chia ê「震怒」mā thang當做「驚惶」來解釋。意思是上帝hō͘以色列人民lóng意識tio̍h:這是生死存亡ê關鍵,kui個民族可能會淪為殘廢ê奴隸,是in有尊嚴生存落來ê一pái機會,進一步koh激發出連結ê強烈意念。果然,以色列人民lóng「同心合意出來應戰」。

重新查詢 專卷研經 撒母耳記上系列
錯誤回報,請聯繫