Chit段經文thang看tio̍h早期先知通常lóng會以講故事ê方式，á是用身軀語言來表達上帝ê旨意。親像先知以西結就是用身軀語言傳達上帝信息ê高手（參考以西結書第四到五章），而先知耶利米mā有過chit種方式（參考耶利米書第十三章）。chit-má chit段經文mā是，先知用身軀語言ê方式向以色列王亞哈講出上帝ê信息，hō͘以色列王亞哈知影，伊kā敘利亞王便‧哈達tháu放是一件嚴重ê錯誤。

第35到36節，chit兩節講出上帝ê奴僕先知，若是拒絕上帝ê命令，只有死路一條。因為in lóng是先知，而且同齊學習傳達上帝ê信息，聽tio̍h「奉上主ê命令」，這應該就tio̍h注意聽，而且去實踐，án-ne chiah是先知該有ê態度。

第37到40節，這是一段先知用身軀作語言，傳達上帝ê信息之方式。故事題材真親像先知拿單對大衛王犯罪了後，用講故事ê方式，hō͘大衛家己做出判決。Chia是以色列王亞哈看tio̍h chit段身軀語言了後，mā隨時做出判決，講chit-ê故事主角「非受懲罰bē-tàng」。這表示亞哈王並無清楚這是一齣先知ê「行動劇」。

第41到43節，當亞哈王講完判決後，先知真清楚指出亞哈王kā敘利亞王便‧哈達tháu放 tńg去，伊teh-beh付出代價，因為伊違背上帝ê旨意。亞哈王聽了後，心內「悶悶不樂地tńg來撒馬利亞ê王宮去」。

頭前ê兩pái敘利亞王挑釁以色列，結果lóng hō͘ 上帝phah了tńg去。M̄是以色列王á是人民本身有甚麼能力，因為in ê國勢kah國防力量lóng遠不如敘利亞，若m̄是上帝親自帶領，根本就無法度贏過敘利亞。因為án-ne，對以色列國來講，siōng重要ê就是國王kah全民lóng tio̍h忠實tī上帝，聽從上帝ê話，卻m̄是家己決定ài怎樣做就怎樣做。有關亞哈王違背上帝ê旨意ê tāi-chì，是tī tháu放敘利亞王便‧哈達ê事件上，無先詢問上帝ê旨意án怎。因為ē-tàng掠敘利亞王，是有上帝親自出征。雖然後來亞哈王得tio̍h外交上ê利益，包括設立貿易中心，m̄-koh伊無遵行上帝ê旨意，所得tio̍h ê一切lóng會成做泡影。